الموضوع: ساعدوني بالحل بارك الله فيكم

الســلام عليكم ورحمة الله وبركاته
الله يمسيكم ويصبحكم بخير وعافية

سيارتي جابت لي المرض فيها ( حنننننه !! ) << تشبيه للصوت .. ورحت خضرية الدمام ورشة خاصة بالهوندات وقالوا لي عندك علبة الباور وفعلاً فيها تهريب بسيط واضح مع الجوانب .. المهم قلت لهم وش الحل يعني .. قالوا لابد تغيرها أو تشتري لها اصلاح ونسويها لك .. أو نركب لك من عندنا وحدة ونظمنها لك مدة 10 ايام .. واحد من الشباب كان موجود قال لي نصيحة اذا بتسويها اشتر اصلاح كامل .. المهم رحت ادور اصلاح لفيت محلات هوندا كلها مالقيت ورجعت له يوم قلت له اني ماحصلت اصلاح قال حتى بالوكاله ماراح تلقى الا طلبيه من الرياض ولعلمك لو سويت لها اصلاح راح ترجع مثل ماهي تهرب زيت مره ثانية وبأقرب وقت << كلام المهندس .. المهم قلت وش الحل يعني قال انا اجيب علب دركسون من برا اشتريهم وابيعهم مع التركيب بـ 700 ريال وعلبة زيت بـ 35 ريال = 735 ريال مع تبديل الحالية ( يعني اللي راكبه عندك تبدلها بهذي مع 735 ريال ) قلت له بعطيك المبلغ وتخلي قطعتي آخذها معاي قال على كذا بـ 1500 ريال .. المهم طلعت من عنده ورحت التشليح ( البلادي بـ 1600 ريال ) الشلالات ( بـ 1200 ريال ) وغيرهم يبيعها بـ 2000 وبعظهم يقول 2500 يعني تفاوت في السعر غريب ... حتى السوداني اللي قال بـ 2500 قلت له الناس تبيعها بـ 1200 وانت تقول 2500 قال مين المجنون اللي يبيعها بهذا السعر روح له ولا تشاور !! .. المهم ما اقتنعت بالأسعار حسيت انه مبالغ فيها وقلت 700 ريال ازين من ادفع اكثر وعادي ابدل العلبة اللي عندي .. المهم رجعت الوشة وقلت له خلاص ركب .. وركب اول علبه وطلعت ماااش فيها صوت .. الثانيه نفسها .. الثالثة تدقر تقول يعني << بس ما اقتنعت فيه صوت وانت تلف الدركسون من الثبات مع ثقل في الدركسون .. المهم لفيت كذا لفة ما ارتحت طلعت صوت الحنه الأولى وانت تمشي .. قلت والله مافي الا التشليح وروح التشليح واخذ ام ( 1200 ) واروح للمهندس واقول له خلاص شيل علبتك ورجع العلبة حقتي .. قال لا فيه عندي علبة اوكيه قلت له خلاص ما ابيك تركبها .. المهم اصر الا يركبها قلت له لا انا بشتري علبة من التشليح ( ماقلت اني شريت عشان بركبها بورشة واحد اعرفه ) المهم دقيت على المهندس اللي اعرفه قال لي خله يركب لك اعلبة اللي قال عليها ورجع اللي انت شريتها .. المهم ركب العلبة الرابعة .. الا هي اردى من الأولات كلهم <<< قال المهندس غريبة لا تهريب ولا نقص في الزيت ولا اي شي وهذي العلبة الرابعة نركبها لك ولا راح الصوت خلاص خلها على سيارتك احس ان عندك مشكله في الشداد أو غيره .. بكره الصبح تعال واشوف لك .

الورشة اكيد يعرفوها شباب الشرقية بخضرية الدمام ( مديرها اسمه شاهد باكستاني ) ومتخصصين بسيارات هوندا .. اللي أبيه منكم تساعدوني بحكم خبرتكم وتنصحوني ( وش اسوي ) ؟؟؟ مع العلم انه فيه اكثر من مهندس سألته يقول ( لا تسوي للعبة اصلاح ماينفع بدلها افضل ) .. وللعلم سألت المهندي من وين تجيبو العلب هذي ( قال من اليابان نطلبها ) ؟؟؟؟
يسر الله اموركم ووفقكم جميعاً