الأسبوع الماضي رحت الوكالة وحاولت معهم على ان يدرجوها تحت بند عيب مصنعي ولكن لا حياة لمن تنادي قالوا أكثر شي نسوي لك نسويه لك خصم 15% قلت ما يخارج قيمة القطعة 2479 ريال وشغل اليد 400 ريال يعني الخصم ما يتعدى 400 ريال حاولت معهم يسوون اصلاح قالوا لا زم تغيرها بالكامل ما ينفع رحت لقطع الغيار بالوكالة وسألته أنتو عندكم إصلاح طرمبة دريسكون قال إيه قلت حق موديل 2007 قال نعم قلت وشلون تبيعونه دامه ما يتصلح ابتسم الموظف بوجهي وقال سياسة شركة.
المهم خذيت بنصيحت الأعضاء ورحت لورشة الجنوبي قلتلهم بالمشكلة قالوا نركب لك اصلاح بس ما نضمن اذا الصوت يروح أو لا ولكن راح يتوقف التهريب والصوت مومشكلة تمشيك الطرمبة قلت وكم تكلفني قال شغل اليد 100 ريال والاصلاح 100 ريال وعلبة زيت 40 ريال الاجمالي 240 ريال أهون من 2500 ريال قلت إتكل على الله (صابت وإلا ماضرها) المهم بدو يشتغلون وأنا معهم بصراحة شغلهم مرتب ومتخصصين بهوندا فقط أخذ الوقت تقريباً ساعة وربع وهالحين السيارة ولله الحمد كويسة الصوت راح والتهريب وقف.

والله من وراء القصد