السلام عليكم ورحمة الله وبركاته

ياشباب ماني عارف كيف ابداء الصراحه مقهوووور قهر

اليوم كنت موقف في مواقف سفليه في احد الابنيه

و جاء واحد وقف جنبي المهم جلست حوالي 10 دقايق وانا بالسياره ونزلت

اول ماصكيت الباب سمعته يقول هيه طنشت انا احسبه يكلم احد ثاني

بعدين التفت على سيارتي لقيته واقف عند باب سيارتي .. انا قلت امكن نزل ياخذ اغراض من المرتبه الخلفيه لسيارته

وكملت المشي ودخلت المبنى وسبحان الله قلبي نغزني حسيت انو وراه مشكله

رجعت لقيته يسوي شي عند سيارتي اول ماشافني مشى بسرعه وركب سيارته وحطها بالريوس ودعس

انا على طول لقطت رقم اللوحه < والله كنت حاس انو مسوي هرجه بسيارتي ..وفعلا صدق احساسي

لقيته عادم لي الباب حقي مخوش بالمفتاح حفر البويه لي حفرر حسبي الله عليه ولو مارجعت كان كمل عالباقي

المهم ما امداني الحقه وطلعت عالخط الثاني ولقطت اقرب حجر واستناه لكن للاسف طلع من الحواري من الخلف

وبلغت الشرطه وارسلوا دوريه وجاء حضرته بعد نص ساعه وقال لي كلمتين ومشى !!< تعب نفسه صراحه

قال لي روح بلغ مركز الشرطه الفلاني "التابع للمنطقه اللي حصل فيها الاعتداء"

وفعلا رحت بلغت وعطيتهم وصف السياره ورقم اللوحه و اوصاف الجاني

وقال لي الضابط تعال بعد يومين ..

الخلاصه من القصه

وش تتوقعون يسوون لان مافيه شهود.. انا الصراحه ناوي ما اترك حقي والكلام اللي باللون الاحمر انا كتبته عشان اوضح لكم اني ماعرفه ولا عمري شفته بحياتي ولا لي عداوه مع احد بس مجرد واحد مريض اعمى قلبه الحسد < وقتها كنت ملمع السياره وفاك الفتحه وكاشخ بالعربي

وانا اتوقع باذن الله راح يجيبونه .. ولو يجي ابوه يحب رجلي ماتنازلت قهرني قهر الله لايوفقه

الشيء الثاني ابي ارجع السياره زي ماكانت وش الحل

وكم التكاليف طبعا باذن الله الواحد الاحد مايدفعها الا هو


والمعذره على الاطاله اخووووكم محمد