لمبة المكينة ظاهره و لمبة الدي تومض !

**علي عبدالعزيز** · 07-06-2011, 11:11 AM

السلام عليكم ورحمة الله وبركاته
اليوم الصباح لاحظت على السيارة ان لمبة المكينة الصفراء او البرتقاليه شغاله

ولمبة الدي تومض اثناء حركة السيارة

و المؤشر حق السرعة مره يشتغل ومرة على الصفر

و السيارة متنحة واخر شيء توصل للغيار الثالث !!

اش المشكله يا ناس والله احترت معاها

افيدوني الله يرضى لي عليكم

لكم تحياتي

**King** · 07-06-2011, 01:32 PM

الله يعينك شكلها توظيب المحرك او القير!!.

لأن هذه علامات تخبط القير والمحرك للسيارة, انا توقعت بالبداية قلت اتوقع حساس او برمجة لكن يوم قلت لي ان القير مايكمل التغيير الثالث عرفت ان القير مخبط حسب وصفك!.

انا اتوقع انك المالك الثاني للسيارة!؟

او انك ماغيرت زيت القير من زمان مع العلم تغييره لأول مره على الـ 60 ألف بعدها كل 40 ألف..

**علي عبدالعزيز** · 07-06-2011, 04:42 PM

يا هلا كنق يا رجال ان شاء الله ما يكون ها الكلام صحيح , مع كل شكري لتجاوبك وتفاعلك معي

وفعلا كلامك في محله من ناحية اني المالك الثاني ولكني اخر مرة غيرت الزيت تبع القير قبل شهرين يمكن حق هوندا الاصلي

ولكن حبيت اضيف انه اليوم وانا راجع من الداوم صار العكس

السيارة تمام وما فيها لمبات ولا شيء وتعشق كويس وتاخذ الغيارات كامله !

وش السالفه ؟

بعضهم يقولي البطاريه وبعضهم يقولي الحساسات فيها مشكله

ما ادري كيف اتاكد !

**King** · 07-06-2011, 05:14 PM

طيب عشان ترتاح سوي هذه الخطوات وبإذن لله ماراح تواجه اي مشكلة مستقبلا ً..

البطارية إذا ماتغيرت غيرها وركب 60 أمبير (اعتقد حقت الوكالة 55 لكن مايفرق!)

{البطارية عمرها الافتراضي مابين سنة وسنة ونص انت وحظك}

تأكد من زيت القير ولزوجته ومايكون اسود وتأكد من المعيار (يعني مايكون ناقص)
مشكلة لمبة المكينة محتمل يكون من حساس الشكمان امامي مدري خلفي لازم تفحصها بعد ماتغير البطارية (محتمل يكون المسكلة من البطارية)
تأكد من زيت المحرك ومايكون محترق

بشكل عام سوي صيانة بنفسك على الزيوت وتأكد من لونها على ان ماتكون سوداء يعني لونها يكون مائل مابين الذهبي والذهبي الغامق..

*انا استغرب واتعجب لما الواحد يشتري سيارة مستعملة سواء إستعمال شخصي او غيره وبعد مايفحص يتضح ان كل شيء تمام وان السيارة سليمة من المشاكل والعيوب.. لكن بعد فتره من الزمن وهي غير محدده تنزل عليك المشاكل والبلاوي مثل المطر!!.

**alkasr777** · 07-06-2011, 06:34 PM

^^^

أنا ولد عمي ماخذ لاند موديله 2000 و فحصه و كل شي تمام

و تخيل بعد اسبوع بس أنواع الأصوات و الخرابات و طبعا احنا و اللاند ربع طرمبة الدركسون :d

والله من شراه ما تهنى فيه و باعه و افتك من شره

والله ان الواحد يتخوف إذا بيشتري سياره مستعمله الموضوع انت و حضك :(

**علي عبدالعزيز** · 07-06-2011, 06:38 PM

الله يعطيك العافيه يا كنق والله انك كنق

انا بسوي الحاجات اللي قلتها انت اليوم وربك يسهلها ان شاء الله

شكرا لمرورك اخوي الكاسر

واذا فيه اي اضافات او تعليقات انا اصغي :d

تحيتي

**علي عبدالعزيز** · 07-06-2011, 10:00 PM

السلام عليكم ورحمة الله وبركاته

دفيت عليها طال عمرك اليوم 470 ريال غيرت الزيت مع السيفون وبطارية جديدة اي سي ديلكو 60 امبير

المهم على حطة يدك مثل ما قلت لك ما طلعت لمبه المكينه ولا لمبة القير تومض

بس ما ادري اعتدلت ولا هدايه مؤقته وترجع لحالتها

لاني قبل ما اغير البطاريه كانت برضه لمبات التشييك سليمه

لكن اللي حصل قبل ما اوديها واغير

انا كنت فاصل البطاريه لمدة خمس ساعات وشبكتها ولاحظت ما ياتي

اول شيء امبير الضغط يترنح ما بين النص والواحد طلوعا ونزولا
ثاني شيء لمااشغل المكيف تضعف السيارة
ثالث شيء لما اضغط فرامل وهي واقفه تضعف السياره ولما اعشق تضعف اكثر وترجف

وما ادري بعد ما غيرت البطاريه والزيت اختفت الحاله الثانيه والثالثه لكن مع بقاء الارتجاف

وما ادري هل بكره اشغلها والاقى لمبات التشييك ولا لا مثل اليوم لكن بوافيكم بالجديد بكره

**متصفح** · 07-06-2011, 11:00 PM

اصابع البطاريه اذا مو مشبوكه بشكل سليم او فيه رواسب على اصابع البطاريه تشتغل لمبة المكينه

**King** · 08-06-2011, 01:06 AM

متصفح:

المشكلة هي لو الاصابع فيها ترسبات او غير مشدوده يطلع لك بلاوي ناهيك عن انها ممكن تشتغل وممكن ماتشتغل غير المواقف الحرجة!!. :d

انا عندي اصبع الموجب مكسور جزء منه من جهة المسمار إلي يمسك الأصبع, الحاصل ان مع الوقت وكثرة الترسبات انكسر علي وثبته بقفيز المهم شكل كثير منكم مايعرف القفيز بكرا اصور لكم صورة على نفس الموضوع هذا..

اخونا علي, إن شاء الله تكون بداية جيده لعدم ظهور آي مشكلة, دائما ً اغلب المشاكل واللمبات والتقطيعات يكون سببها الرئيسي البطارية لذلك ضعها او خيار للفحص بعدها يلي المشاكل الآخرى..

**علي عبدالعزيز** · 08-06-2011, 10:48 AM

الله يسمع منك ان شاء الله

والله انا افكر اروح الوكالة الاسبوع الجاي في جده احتمال اوديها فرع طريق المدينة

وودي اعرض عليهم مشاكل كثيره مثل مشكله الرجه بالسير كما في موضوعي السابق

http://www.hondaarabia.com/club/t48527/

بالاضافه الى تغيير زيت الجربكس والسير والتشييك على منظم الهواء لاني اشك فيه بصراحه

بس اخاف يصلخوني وما ادري وش اقولهم كيف اوضح لهم اني فاهم الشغلات هذي عشان ما يصلخوني بالسعر

الشيء الثاني سيارتي ماشيه تقريبا 140 الف

وقد وديتها سابقا الوكاله وعلى اشياء بسيطة اخذوا مني 2700 ريال اغلبها صيانه عاديه

تحيتي لكم

**علي عبدالعزيز** · 08-06-2011, 06:45 PM

ملاحظة لمؤشر الضغط عند تشغيل السيارة الصباح ( تحميه وتشغيل المكيف وتعشيق القير )

[ame="http://www.youtube.com/watch?v=OAvkrBYUGDE"]YouTube - ‪IMG 0848‬&rlm;[/ame]

**alkasr777** · 08-06-2011, 11:53 PM

اخوي علي ما شاء الله عليكـ في توضيح المشكله

و اخوي كأن بديت أشك ان المشكله من الدينمو حق كهربة السياره

شيك عليه قبل لا تكبر المشكله

**علي عبدالعزيز** · 11-06-2011, 09:49 AM

الله يعطيك العافيه يا الكاسر ومنكم نستفيد والله

والله الحين غيرت السير والشداد حق السير اللي كانت عندي مشكله في موضوع اخر لي

والحمدلله اعتقد ان المشاكل كلها انحلت وخلينا نشوف مع الايام وش يصير

والله يعطيكم العافيه لكل من شارك او ساهم برأيه

والله لا يورينا ولا يوريكم مكروه ولكم تحياتي وتقديري