هل الرياض تعالو هنا ابيكم بكلمة راس

**معاند الكورد** · 02-07-2011, 12:02 PM

:d

الســلام عليكم ورحمة الله وبركاته

كيف حالكم اخواني طيبين

اليوم انا داخل على الله ثمن عليكم لاتردوني خايب وزعلان

انا معي هوندا كورد 2006 معذبتني تعذيب موب صاحي كل شهر لازم تطلب شي

والحين المشكله في القير حقها معد تحرك انا مدري هل هو من الكلتش او القير الله يستر

وانا ابي منكم تدلوني على ورشة في الرياض مزبوطه ولو تكون في صناعية الخرج او الشفا

كان احسن تكفون علموني منو الي يصلحون السيارة عدل لاتخيبوني يا اهل الرياض

**aalhamdan** · 02-07-2011, 01:11 PM

اذا موترك نظيف ونظره ومحافظ عليه حلها حاجه وحده

طببه المعارض وخل الناس يسومون بس سوم وامش من اول الشارع لاخر الشارع وخلهم يسومون بدون نية بيع
وان شاء الله ماراح تبي منك الا زيت وبنزين
<< اقولها لك مثل ماصار لي انا كانت معي لومينا موديل 2001 يعني اللي يعرف الموتر والموديل ماهو حاط عينه عليها بس كنت محافظ عليها كثير لدرجة جننتني بالطلبات واتصل على شيخ المعارض جاب رقمي له واحد وقلت له السالفه كذا وكذا وكذا
قال طببها المعارض وخذ فيها لفه لفتين وخل الناس يساومونها واطلع وبعدها الحمدلله اخذت 6 شهور ماطلبت شي ابدآ

**القايله** · 02-07-2011, 01:30 PM

المشاركة الأصلية كتبت بواسطة aalhamdan

اذا موترك نظيف ونظره ومحافظ عليه حلها حاجه وحده

طببه المعارض وخل الناس يسومون بس سوم وامش من اول الشارع لاخر الشارع وخلهم يسومون بدون نية بيع
وان شاء الله ماراح تبي منك الا زيت وبنزين
<< اقولها لك مثل ماصار لي انا كانت معي لومينا موديل 2001 يعني اللي يعرف الموتر والموديل ماهو حاط عينه عليها بس كنت محافظ عليها كثير لدرجة جننتني بالطلبات واتصل على شيخ المعارض جاب رقمي له واحد وقلت له السالفه كذا وكذا وكذا
قال طببها المعارض وخذ فيها لفه لفتين وخل الناس يساومونها واطلع وبعدها الحمدلله اخذت 6 شهور ماطلبت شي ابدآ

اخوي عندي تعليق بسيط على ردك

لو النفس او العين تنعالج بالحراج او بسومت الناس لها

كان اي شخص فيه عين او نفس حرجنا عليه او سمناه وتطلع العين منه

انا سمعت عن هالكلام كثير لاكن ما اعتقد انه صحيح

**aalhamdan** · 02-07-2011, 02:04 PM

اخوي اولا العين حق

ثانيا المقصد ماهو في الناس
المقصد في السيارة يمكن نفسها في المعارض
عاد هذا شي راجع لك
يعني اذا كنت محافظ على السيارة وش يخربها كل شهر

الله يطرح فيها البركة ويعطيك من خيرها ويكفيك شرها

**معاند الكورد** · 02-07-2011, 08:20 PM

مشــــــكورين ياشباب وكلكم والله على العين والراس ومن فوق

بس انتو مافهمتوني عدل

انا ما اقول انها عين وكذا لا والله ولو انها عين انا راضي بقدر الله وثاني شي سيارتي مو موديل السنه موديل 2006 ومثل كذا وانا راضي بقدر الله

بس ابيكم تعلموني با اسامي الورشات الي شغلهم جيد في مجمع صناعيات الخرج او الشفا

عشان ازين سيارتي عند ايادي امينه وكويسين بالعمل مو ادبس في اي صناعيه

ولا العين تورد القبر ومابالك بالحديد

الله يكفينا شر العين والحسد يارب

**بلال العلمي** · 02-07-2011, 08:42 PM

القير اذا اوتوماتيك وفيه مشكلة واحتاج لتوظيب لابد انك تستبتدله افضل لك واحسن

لان التوظيب ما يتقنه كثير من الناس

على العموم روح الوكالة وقول ابي اقيس ضغط الزيت داخل القير هم اثنين بس يعرفون يسوونها في فرع الرياض واحد في فرع خريص وواحد في الخالدية

روح للي في فرع خريص وقول للاستقبال ابي اقيس ضغط الزيت في القير واعطينا النتائج هنا وانا باقول اذا كان فيها مشكلة لكن للمعلومية الكلام هذا فقط للقير الاوتو والحركة هذه تغنيك عن نصب الورش وانه لابد توضب والكلام الفاضي حق الورش

**بلال العلمي** · 02-07-2011, 08:47 PM

للمعلومية قياس ضغط الزيت يستعمل فقط للحالات اللي يكون فيها النقلات غريبة او فيه تأخير في التلقيم او ضعف في العزم غير مبرر او وجود انفلات في احد الغيارات

**معاند الكورد** · 03-07-2011, 12:22 PM

لا انا احس ان القير زين مافيه الا العافيه

احس المشكله في الكلتش طالع قاسي والقير مايتحرك

لو تدلوني على ورشه سنعه كان ماتقصرون

وماتقصر ياخوي على ردك الراقي

وان شاء الله مايطلع القير خربان وانشب بوه

**hanadi** · 03-07-2011, 12:47 PM

يمكن الاخ يقصد تخويف للسيارة عشان ما تطلب شي :d

**بلال العلمي** · 03-07-2011, 10:48 PM

اذا سيارتك قير عادي

سوي تنسيم للزيت حق الكلتش يعني خل واحد يفك لك الصامولة من تحت ودبل الدعسة اكثر من مرة وخليه يفتحها الين يطلع كمية من الزيت وتكرر العملية 4 الى 5 مرات وبعده عبي زيت جديد

والدعسة تلين معك باذن الله

**ب د ل ACCORD** · 04-07-2011, 08:46 AM

أخي بلال

أنا عندي نتعه أحياناً أول ما أحطه d

ممكن يكون المشكله في ضغط الزيت؟؟

**بلال العلمي** · 04-07-2011, 08:53 PM

المشاركة الأصلية كتبت بواسطة ب د ل accord

أخي بلال

أنا عندي نتعه أحياناً أول ما أحطه d

ممكن يكون المشكله في ضغط الزيت؟؟

لها اسباب مختلفة في الغالب النتعة القوية هي سببها الكراسي لكن فيه اسباب بعد مثل اهتراء الكلتشات كمثال لكن التأخر في التلقيم مثل ما يحصل في بعض السيارات تتأخر في التلقيم هنا معناه يكون فيه مشكلة في ضغط الزيت