خذها تقسيط بنك، هل فيه طريقه ثانيه أخذ السياره أقساط ؟!
السلام عليكم ورحمة الله وبركاتة ،،
بالبدايه صراحه ما أدري أن مكان موضوعي صح أو لا ..
لو غلط أرجو من المشرفين نقله للمكان الصح ..
ثانيا ،،
أنا كنت ناوي على أفالون وعازم عليها ، ووصى الوالد واحد من الزملاء في أمريكا أن يبحث لكن للأسف ما لقى شئ زين ، وهنا الأسعار خياليه طبعا كل هالكلام بالنسبه للمستخدم ..
جينا لتويوتا طلع ما فيه تقسيط ! ما فيه غير نظام التأجير وصراحه يقولون أنه حرام وصعبه تدخل بهالأمور ..
قالي الوالد أصرف نظري عنها وأشوف سياره ثانيه ، لقيت الأكورد وأعجبتني لكن فيه كم ملاحظه لي عليها ..
أول شئ سعرها عالي شوي يعني أغلى من الأفالون اللميتيد لقيتها في الوكاله بـ 138 ألف
6 سلندر - و 4 سلندر بشاشه 115 و بدون شاشه 105 ..
صراحه أشوف أسعارها عاليه بالحيل وما أشوف في السياره ذاك الشئ إلي يستاهل هالسعر .. غير كذا بيطلع شكل جديد وبعد 2012 جايه من أمريكا غير الموديلات إلي قبل وتخاف مب نفس الجوده ،، والسياره يعني فيها مواصفات وكذا لكن عاديه ..
لكن المميز أنه عندهم نظام تقسيط وهذا الشئ إلي مسوي قلق ، وطلعت علي دفعه أولى 12 ألف + قسط لمدة 4 سنوات 3400 للـ V6 ..
هل تنصحوني آخذها ولا مبالغ في قيمتها ؟! وهل هي واسعه من جوا للعلم ما عمري ركبتها ؟!
وكيفها من ناحية راحة المراتب كثير ناس يقولون أنها قاسيه وما ترتاح فيها ،..
طبعا كله كلام ناس وأنتم إلي جربتم وتقدرون تنصحوني ..
وهل فيه ملاحظات على الـ v6 لإن ما ودي أخذ سياره 4سلندر ،
كل إلي أبيه متوفر في الأفالون 2011 xl بس المشكله الوحيده نظام التأجير والوالد ما يقدر ياخذ قسط جديد وما وده يدفع كاش ، هل فيه طريقه ثانيه أخذ السياره أقساط ؟!
فهل آخذها ولا أشوف لي سياره ثانيه ووش تنصحوني ؟ أهم شئ السياره 6سلندر وما فوق
ووكيلها تمام ،،
وأتمنى يكون كلامي مب ملخبط ،، شاكر لكم ..
ورمضان كريم ..
خذها تقسيط بنك، هل فيه طريقه ثانيه أخذ السياره أقساط ؟!
3400 قسط شهري >> لكزس gs300 ;)
جوده وهوندا ... والخ ع العين والراس لاكن بها السعر اذا سعرها كاش بحدود الـ 140 الف !! وقسطها مرتفع
الاجمالي كم ؟ !!!
وكلها سنه وبتتغير جذريا
ما انصحكـ سوا للاكورد او حتى للافلون
وبالنسبه لنظام التقسيط حسب ما اعرف ان بنكـ الراجحي و الانماء يقسطون ((بدون تامين )) وشرط تحول الراتب
وعليكـ بالاستخاره يا الغالي
وعساء ربي يكتب لكـ الي فيه الخير
عندك الازيرا والكادينزا الجدد والتورس كلهم بحدود هالسعر
وصراحة لا اجد مبرر لرفع السعر لـ 140 الف علي ايش ياهوندا ؟ يعني ويش الي اختلف بين الاكورد 2008 و 2012 ؟
اخوي خذ الكادينزا من كيا جبارة جدا جدا ومواصفاتها كثيرة :
شاشة وكاميرا خلفية وتحكم خلفي بالصوت ونظام صوت انفنتي وايرباقات كثيرة وانظمة الدنيا للثبات ومكينة 290 حصان وزنون وستارة خلفية وجانبية ومراية تنصفط وذاكرة تخزين للمقاعد وطبلون ليزر بوظائف عديدة مو مثل الاكورد الي فيها بس كم ماشي الموتر وعدادين رحلة هع وبانوراما ووو
واذا شفت في الكيا مشاكل فتأكد ان في الاكورد مشاكل ولاتنسى ان الموترين وكالة بضماااان
هلا أخواني ..
وإي مثل ما قلت مشكلتي أنه ما أقدر آخذ قسط لأن الوالد ناوي ياخذ قسط كبير بعد فتره ولو أخذ للسياره الحين ما يقدر ياخذ بعدين ..
وأنا إلي خلاني أفكر بالهوندا سبب واحد بس أنه الشركه تعرض بالتقسيط لا أكثر ..
وبالنسبه للكيا صراحه جباره ، إلي ما يعرفها يقول مرسيدس بس مشكلتها الوكيل أعرف واحد شراها وبعها بسبب الوكيل لا أكثر عذبه وجاب له المرض ..
وشاكر لكم ،
اجل توكل على الله و خذ الاكورد
منها ترضي نفسسك دامها من خياراتك و منها عشان الوالد
و صدقني ما بتندم عليها ان شاء الله السيارة سمعة و جودة ممتازة
جرب الثنين :d
ولا تنسى صلآة الاستخآرة
من وجهة نظري عندك ( ماكسيما ) أو ( توروس )
بلا أكورد بلا أفالون ...
اخوي الاكورد حلو لاكن المشكله اذا القسط 3400وربي حرام ومع ذالك دافع دفعه اكثر من 10000ريال ليش
الله يسهل امرك
3400×48شهر مدة 4سنوات=163200ريال+الدفعه الاولى 12000ريال=175200 ريال
اجمالي المبلغ 175200 ريال+الرسوم الاداريه
القيمه كاش138000ريال -175200ريال المبلغ الاجمالي=37200ريال مكسب الشركة
مكسب الشركة واجد اخوي لاتستعجل استخير
التعديل الأخير تم بواسطة القايله ; 26-07-2011 الساعة 01:35 PM
طلع عن طريق بنك الراجحي افضل بكثير
لو على النوع الافالون اقوى وافضل والوتيوتا ماااااااسك سعرها لو قرنبع
مواقع النشر (المفضلة)