رد مع اقتباس17 مشاهده ولا واحد كتب حرف ؟
روح موت ياعم <<<<
هذا الي صار لي اليوم بصيانه 20.000 - صدمه -
صباح الخيرات لكم جميعا
حبيت انقل لكم الي صار معي ,, رحت ابي اسوي صيانه 20.000 سيارتي 2010 فل لها معاي سنه و 7 شهور وواضح لكم الممشى قليل .. احمد الله انا مو راعي قومات ولا سرعات عاليه ومحافظ على سيارتي الحمدلله وملتزم بالصيانه من يوم ماطلعتها
قبل الصيانه بيومين تفاجات البوري ضرب صار صوته غريب لمن رحت للوكاله اكلم المهندس الفلبيني بالانجليزي طبعا مايعرف عربي قال خلاص نشوفها وقلت له بعد ابيكم تدورون الكفرات وتشوفون لي البطاريه كم فيها نسبه قال طيب قلت انا ماني برايح ابي تسوون الصيانه واشيلها الان خصوصا اني بموعد قالي ok
شوي طبع لي فاتوره بحوالي 1250 الى 1500 ماني فاكر بالضبط
قلت له حقت ايش ؟
قال تغيير اقمشه وخرط هوبات !!!!!
عنبو ابليسك انت الحين شيكت عليها ؟ عرفت وش الخربان ؟
قلت كنسل الشغلات ذي وشيك فقط ولو في شي ترجع تكلمني وتقولي السياره فيها كذا كذا وانا اعطيك الاقريمنت يا ياقولك ايه يا لا
قام عدلها الى 550 اعتقد با تزيد بشوي يا تنقص بشوي الي هي قيمه صيانه العشرين!!!
ماعلينا
..
المهم قعدت بصاله الانتظار اقلب بالايباد لين شفتهم جابو سيارتي ورفعوها وجا المهندس تحتها مسكني فضول الا اني اروح للمهندس.. فعلا رحت
سالت المهندس قلت له قريت بالمنتدى انه في شغلات تتشيك على 20000 وفي اشياء على 40000 قالي كل الصيانات وحده وتشييكنا واحد سواء 1000 او 5000 او 100.000 .... هنا صراحه اكلت معي شوي
ولا شفته سوى تدوير للكفرات ولا غيرها ولا شي ولا اهتم بالبطاريه ونسبتها وتنظيف الاصابع على الاقل
قلت له ليش ما تبدل الكفرات وتشوف البطاريه ؟ قالي مو مكتوب لي !!
قلت ياحبيبي انا قايل للفلبيني وبعدين مو شرط سالفه تدوير الكفرات تنكتب المفروض تتغير بدون في كل صيانه
قالي طيب بغيرها ولكن والله مو مكتوبه وفعلا غيرها وعقبها جاب الجهاز حق قياس البطاريه
عنبو ابليسكم وكاله ... ولازم اوقف على راسك يامهندس ؟!
وش خليت لابو يمن بالورشه اجل ؟
ماعلينا ومالكم بالطويل لمن جا يغير البوري راح يغيره على الضمان طبعا .. طبعا غير البوري الواطي والعالي الاثنين
والله ثم والله مكتوب اكياس البوري الي ركبها صنع بالفلبين ولمن فك الي عندي مكتوب عليها صناعه اليابان
قلت له الحين شلون كذا .. طبعا قالي الحين كلها امريكيه .. قلت له عارف انها من 2011 امريكيه بس وش دخل الفلبينيه ؟؟ للاسف مافي اجابه
المهم تركته ورحت اطقطق بالايباد ..
قالولي خلصت السياره جيت اشغل ابي امشي
شغلت المكيف الا في صوت زي التنسيم خفيف محل فلتر المكيف داخل الدرج كلمت المهندس قالي صح في صوت وراح للفلبيني .. شافها الفلبيني فك الفلتر قلب فيه رده صك المكيف شغله ثاني قال طبيعي
قلت السياره معايه من سنتين وفاكها زيرو من الوكاله ومشيتها 20000 ولا سمعت هالصوت الا بعد صيانتكم تقوم تقولي طبيعي ؟ قالي صدقني طبيعي
قفلت معي واروح للمدير حق الصيانه وشرحت له الوضع ويرسل معاي كبار المهندسين على قولته شاف السياره
قال طبيعي !!
يرحم امكم وربي سيارتي تحت يدي ولا عمري سمعت هالصوت فيها .. قالولي لا تخاف انت سيارتك تحت الضمان ولو صار شي احنا مسئولين وبنوريك سيارات ماشيه اقل من ممشى سيارتك وفيها هالصوت واصلا احنا ماقربنا فلتر المكيف ومن هالكلام
شلت سيارتي ببواري فلبينيه وبصوت بالفلتر حق المكيف ويعنني مسوي صيانه بالوكاله !!
هل انا انلعب علي ؟! هل اترك الوكاله واجرب مع ابو يمن ؟!
ابي اعرف وش سالفه البواري الفلبينيه ؟؟
اخوي بلال فيدني بالبوراي الفبينيه ذي
شاكر لكم ومقدر يا اخوان
التعديل الأخير تم بواسطة شانزليزيه ; 09-10-2011 الساعة 02:42 AM
17 مشاهده ولا واحد كتب حرف ؟
روح موت ياعم <<<<
ماشآء الله تبـآرك الله ،،
يعطيك خيرهـآ ويكفيك شرهـآ ،،
بنسبه لي موضوعك في الوكالهـ انا والله ما اعرف شي بالوكاله ولا بالصيآنه ،،
حتى صيآنة الآلف اقرب بنشري ،، خخخخخخخ
لكن ان شآء الله الاخوان يفيدونك ،،
الله يجبر بخاطرك
تابع الموضوع كامل
http://www.hondaarabia.com/club/t50951/
وهذا رقم الشركه اليابان في الام
Honda Motor Co., Ltd.
2-1-1 Minami-Aoyama, Minato-ku
Tokyo, 107-8556, Japan
Phone+81-3-3423-1111
بيردون عليك بالياباني .. قولهم سبيك انقلش .. بيحولونك للمدير بيعطيك اميل حق الشكاوي ارسله الهيكل حق موترك وكل شي
وان شالله امورك بتظبط .. هنا ملعوب علينا
طريقت الاتصال برقم هذا ولا فيه مفتاح خط
Tokyo, 107-8556, Japan
Phone+81-3-3423-1111
بنسبه لموضوعك والله انا كل ما اروح للوكاله ارفع عليهم شكوى ولا في اي فايده بس انا مكمل معهم لا تسالني ليش يمكن عشان خايف تطيح بيد اليومنا
والله يا خوي انا البارحة رحت الوكالة اعمل صيانة الألف .... تبي الصراحة
الصيانة حقهم مهي بزينه والله العظيم . قال انت سيارتك بعدها جديدة 2012 امريكية ما نعلم عنها . الله اكبــــــــــــــــــــــــــــــــر يا اخي انتوا وكالة ما تدرون عن سياراتكم . استغفر الله العظيم
اخوي انا اتابع المنتديات لمعرفة مشاكل وحلول واضافات سيارة الهوندا . نصيحتي لا تسأل حد في الوكالة صدقني ما يعرفون لمبة الايرباق من حزام الامان.
الوكاله ماعندك احد .. انا نهائيا ماعترف فيها .. الا صيانه 60 الف و 100 الف ...
بلا وكاله بلا خرابيط ياشيخ ..
طريقه الاتصال باليابان
Phone+81-3-3423-1111
علامه + صفرين يعني 00
0081-3-3423-1111
أخوي ( شانزليزية ) ... أنا طرحت استفسار للإخوان في هالمنتدى الطيب قبل يومين وهذا الرابط : -
(( http://www.hondaarabia.com/club/t51609/ ))
وبعد ما قريت موضوعك ومعاناتك مع الوكالة ... صراحة ... غسلت يدي بموية نار مهوب صابون ... أجل وكالة وهذا تعاملهم وردودهم ... أجل وش خلوا للورش حقت أبو يمن وأبو شكيب .
شكلي ( وهذا رأئي الشخصي + أخذ مشورة بعض الاخوان في موضوعي اللي ذكرت ) ... إني أسوي الصيانة بنفسي وأستبدل قطع الغيار من الوكالة وأركب بنفسي أو عند ورشة محترمة وقدام عيوني .
بس زي ما قال أخونا ( فتى سدير ) على طول ولا تتأخر ولا يوم ... كلم أو أرسل بريد إلكتروني للشركة الأم وأشرح فيه كل شيء صار لك مع ذكر ( اسمك ، رقم جوالك مع فتح الخط الدولي ، نوع السيارة ، موديلها ، رقم الشاصيه ، إلتزامك معهم بإنتظام في الصيانة الدورية ، وشكواك ضدهم ، وحدد الفرع اللي سويت الصيانة عندهم ، ورقم تليفون الفرع أو الوكالة المباشر ) .
وإن شاء الله راح يجيك أحلى إعتذار منهم غصب عنهم مهوب برضاهم ... والله يقدم اللي فيه الخير .
كان الله في العون
المشكلة انه وكالتنا المحترمة تلغي الضمان في حال عدم الالتزام بالصيانة الدورية
ولا في الأساس كل الصيانات زي بعض
الفرق فقط في
والاقمشة يغيروها فورا بمجرد مايكون عمرها اقل من 10 الاف كيلو وتضاف قيمتها على مبلغ الصيانة
والحمدلله على كل حال
وشكرا حماية المستهلك
الله يلعنهم الوكاله
ياخي صيانه ٢٠ الف يبدل كفرات وتشيك بطاريه وزيت وفلتر وسيفون و و و و
كيف هذا يقولك ماهو مكتوب
إلي فهمته من الموضوع إن عندك اي بااد...
امزح امزح
شوف حبيبي انا وجهة نظري ما اشوف داعي للوكاله والسعر حق الفحص إلا للضرورة ..
وانت ماشاء الله عليك فاهم وعندك اي بااد يعني مفروض ماتروح الوكاله وتسحب عليهم ترا ماراح تستفيد منهم كثير
والوكاله ترا فيهااا ناس رافعه خشمهاا وتحس إنك تطره عشان يشتغل ..وانا ما احب اتعامل معهم لسرعة نرفزتي وانفعالاتي :d
واتمنى تقبل وجهة نظري اسحب على الوكالة وسوا صيانتك بنفسك بورش محترمه معروف سمعتهاا ابرك لك والله يبارك لك بالسياره
بعد ازمة اليابان يا اخي شانزيليزيه صار فيه نقص في بعض القطع اضطرت هوندا انها توكل بعض الشركات انها تصنع القطع هذه في فرنسا والصين واندونيسيا والفلبين وايضا امريكا وتصنعها باسم هوندا نفسها يعني الشركات هذه تعمل كمقاول يعمل وفق مواصفات محددة تحددها هوندا لها
لاجل كذا تلقى مكتوب صناعة فلبينية او صناعة فرنسية او اندونيسيا
الشي هذا مؤقت الين ينظر في امر المصانع اليابانية من جديد وايضا تكتمل مصانع امريكا لتغطية الطلب الخاص بالشرق الاوسط
مع العلم ان مصنع هوندا في بريطانيا يغطي بعض الامور الالكترونية
اما بخصوص صوت التنسيم اللي تسمعه اثناء تشغيل المكيف هو فقط المروحة بخ عليها هوا اثناء تنظيفه للفلتر ولو فيه تنسيم للفريون بيخلص عليك في نفس اليوم
ارجع للوكالة وخلهم يبخون هوا مضبوط على المروحة حقت المكيف داخل الدرج
قريبا اكيورا فخر صناعة هوندا الامريكية على هوندا العربية
اكيورا RLX 2013
يعطيكم العافيه جميعا .. و رايتكم بيضا كلكم
والله ماودي اني اشرككم بالاحباط الي اعيشه مع الوكاله
لكن سالفه روح اشتك شركه الام ماراح تجيب نتيجه بتاتا
هوندا باليابان بتترك شغلها وبتوقف مع شانزليزيه براس تنوره عشان بواري فلبينيه ولا صوت الفلتر !!
اسف كلامي انهزامي ومحبط
لكن هي الحقيقه
لو عندنا حمايه مستهلك ماصار الي صار
اخوي بلال الف شكر لك
طالما الدعوه قلبت قطع فلبينيه بنقول يالله السلامه والله
اما بالنسبه للصوت بسويه بنفسي بروح لبنشري واخذ الهوى
بس المروحه حقت المكيف تبين لا فتحت الدرج ؟؟ وبعدين وش سبب ظهور الصوت ؟؟
شاكر لكم جميعا يا اخوان
أجل الله يعينك ... والله يجعلها أكبر الخرابات يا رب ...
ولا إحباط ولا شيء ... هي وجهات نظر نأخذه من بعض ونتساعد فيها
مشرفين وأعضاء ... واللي ما أعرفه أنا ... أنت تعلمني أيـــــاه .
والله يعطيك خير موترك ويكفيك شره وكل مسلم ..... آمـــــين
المشاركة الأصلية كتبت بواسطة nasser1430
شوف ياعزيزي بقولك سالفه صارت لي مع ابو يمن
مره رحت للوكاله بصيانه الــ 15000 وبرضو مسكني فضول اوقف مع المهنس
فضول هذا لو نفتك منه بترتاح:d <<<
قالي ترى الكفر الامامي الايمن فيه مسمار !!
قلت له طيب شيله
قالي حنا مانشيله ولا نسوي تيوبلس
حنا نشيل ونركب جديد !!
لكن روح لاقرب بنشري يسويه لك
طبعا لو ماكنت واقف عنده محد راح يقولي
ولا راح ينقل هالكلام لمسؤله اقل شي لتنبهي عن هالمسمار
ويمكن لو ماكنت واقف معاه كان ضرب علي الكفر وانا ماسك خط قطر بعز الصيف والرطوبه لاني اليوم الي بعده دقيت سلف لقطر
عموما مالك بالطويل
رحت لابو يمن
واول مره ادخل ملكتي بنشر للامانه
رفع السياره ودور الكفر بالجهاز حقه
قام قالي حطها بالــ P قلت له كيف ؟؟!!
قالي حطها بالـــ P !!!
حديث نفس سرررررررررررريع بيني وبين نفسي
الحين لو حطيتها بالـــ P وهو قاعد يدور الكفر تقريبا بسرعه 10 كــم مو يضر القير ويخرط ابوه !!
فجاه قلت ياعم انت بتكون احسن منه !!
مسكت معي لحضه ثواره بالعربي قمت سمعت كلامه وسويتها وهو كان برى السياره
شوي واسمع صوت القير
كذا
قرط قرط قرط قرط
وارجعها على الــ N سريع
ونزلت سفلت فيه
بغى يعطب ابو القير
مسمار بالكفر بغى يجيب القير حقي
للاسف راح امشي على المثل الي يقول خلك على قردك لا يجيك اقرد منه
ماسكه معاه اليومين هذي الروح الانهزاميه والاحباط:( <<<<<<
في مروحة داخل الدرج ؟؟
غريبة كل هذا ردود
يابو شباب انت قلت (قلت له عارف انها من 2011 امريكيه بس وش دخل الفلبينيه ؟؟ )
2012 فقط الامريكية 2011 اصلي
ولد شمر
مثل ماقالك بلال
الدعوه صارت قطع فلبينيه واندونيسيه
راحت ايام القطع اليابانيه
وصار من يسوي قطعنا عمال كونتراكت
مدري ليش حاااااااااااس ان الهوندا تبي تلحق تويوتا ااااااااااااه والله قهر
والله يا اخوك اخر مره زرت الوكالة في صيانة 10 الف اخذو مني 380 ريال بدون وجه حق بس تغيير زيت ويسيفون هذا اللي استفدته وبعدها سحبت عليهم وع ابو جدهم صرت اغير الزيت عند بنشري يماني صديقي وقلت له والله لو يصير شي بالسياره لتتحملها قال بس بشرط ما تغير عند غيري قلت ابشر والى يومك هذا وانا عنده والحمد لله والشكر لله ما اشتكي من شي
اسحب ع الوكاله ما وراها الا الفقر والصرف والمرمطه اللي مالها داعي ...
وجه نظر والقرار الاخير لك
الصراحه انا ما اثق في الوكاله وشغلها.. مدري بس احس انهم يبون يخربون ويدفعونك ثمن التصليح /:
الوكالة شطبت عليها من صيانه ال60:p
اليوم زاد الطين بله
طلعت من بيتي حصلت سيارتي محكوكه
ولا احد حولها
مع اني موقف صح وميه الميه
وتحديدا الرفرف الامامي وانقشعت الحمايه :(
والله ياهي ماسكه نحاسه هالاسبوع :(
بسم الله الرحمن الرحيم
تصدق بعد موضوعك هذا إني سحبت على الشركة بصيانة الـ (( عشرة آلاف )) ورحت اليوم وغيّرت زيت من بترومين اكسبريس عندنا بجده بـ 85 ريال فقط
مشكلتنا قدسنا الشركة وعطيناها فوق حجمها وهي بنفس الوقت تستنزف جيوبنا بلا رقيب ولا حسيب .!
دمتم لمن تحبون
ضوابط المشاركة
مواقع النشر (المفضلة)