الموضوع: انصدمت من نظام المرور و منك يا هشومي بعد ما شفت بعيني !!

السلام عليكم ورحمة الله وبركاتة
أنا عارف اننا مظلومين من زمان بالسيارات و هذا مو شي جديد ، الاسعار المبالغ فيها و المواصفات العقيمة هي العوامل الرئسية في هذا الظلم.
تحصل الوكيل يجيب الشي الي هو يشوفة بدون الرجوع الي العميل، و طبعا الاسعار يقدرها هو بكيفة في ظل غياب الرقابة و عدم المنافسة.

تعرفت قبل فترة علي احد الاخوان العرب في كاليفورنيا عندي وهو معروف بين الاخوان الموجودين بمعهدي بأنه يجيب السيارات و يشحنها لك للمنطقة الي تبيها. توجهت له بنفسي ( 5 ساعات رايح و جاي لمنطقة اسمها سان ديقو ). تقابلت مع الرجال شخصيا و بدا يعرض لي السيارات بموقع المزاد ، الفرق كان بين السماء و الارض، فالاكوردات بكل الانواع و الأشكال و المواصفات !! ممكن تحصل 6 سلندر بكامل المواصفات ولكن جير عادي !!
و ممكن تحصل اكورد اقل الاقل لكن 6 سيديهات ! ( وكالة طبعا )

اما عن الاسعار ، فحدث ولا حرج ، طبعا ما نخلص من عبودي نجي للشريطية بسياراتهم الخايسة و كذبهم المفضوح. السيارات لما تشتريها جديدة سعرها خيال ، لكن مجرد ما شيطانك يبدأ بعزف الحان بيع السيارة بإذنك،و تنزل الحراج، تحصل ان فيه ناس هم الي اعطوا الشيطان دروس في الكذب.
السيارة المنتهية الي ماشية 100 الف و انباعت مليون مرة، و استملت للتحميل و للتطعيس و احيان لقيادات الفورميلا 1 ، تحصل سعرها 50 و 60 الف و عينه قوية بعد و يحلف لك انها استخدام دكتور !! طيب يعني الدكتور انسان تعدى الوصف ووصل لمرحلة الكمال بحيث انه كل ما بغى يروح مشوار يجيب سطحة و يحط عليها السيارة و يروح مشوارة !!
حصلت هنا ان السيارة تنباع علي حسب الممشى ، بمعني انك تحصل 2006 أغلي من 2008 !! و السبب الممشي في المقام الاول و ثم نظافة السيارة في المقام الثاني.

اما عن المبايعة :
بدون مبالغة يا إخوان ، أنا ممكن اشتري السيارة و انقلها بإسمي اسرع من أني ادخل بقالة و اشتري بيبسي !! << مثال غبي لكن !!
اما عن نقل الملكية فهو يحصل في دقيقة الي دقيقتين ، ممكن انك تشتري السيارة في 5 دقائق لكن اذا جيت تحول الملكية ياخذ منك دقيقتين و اللوحات و الاستمارة توصلك علي البريد، و يعطوك لوحات موقتة تطقطق عليها ( طبعا لوحتك ممكن تحط فيها الاسم الي تبيه و الحروف كأنك في لعبة سيارات علي PS3 )

اما عن التامين ..
اصلا ما يحتاج ان الموظف يشوف وجهك الكريم اصلا ، كل الي عليك انك تتصل و تعطية بياناتك و ترسل له بالايميل اوراقك ( الرخصة ، الاستمارة ... الخ ) و خلال دقيقة تجيك بطاقة التامين علي الايميل و بعد بيومين تجيك البطاقة الاصلية علي البريد.
علي سبيل المثال : رحت تشري سيارة ، وانت في في المكتب عند البائع او تحت بيت الشخص الي بيبيع السيارة ممكن تكلم الشركة و تخلص الموضوع ، و تطير علي اقرب مكتب FEDEX و تطبع التامين و انتهي الموضوع.
اما السعر للاكورد 2009 فل كامل مع GPS من ( نظام الملاحة جاب من الوكالة علي السيارة مو الصيني البندق ) سعرها اقل من الـ 4 فل في بعض الاحيان و انظف بكثير من الي بالسعودية .

اما عن الأمان وقت الشراء :
بكل بساطة لما تجي تشتري السيارة اطلب تقرير اسمه Carfax و وظيفة هذا التقرير انه يوريك تاريخ السيارة من حوادث و صيانة و عدد ملاك من يوم ما طلعت السيارة الي يوم الشراء !!
اما عن اذا ما عجبتك السيارة :
قانون ولاية كاليفورنيا ينص، اذا ماعجبتك السيارة خلال 30 يوم تردها و تاخذ فلوسك كاملة ولا دولار ناقص. لكن اهم شي يكون الاسترجاع لسبب معقول مو صوت طقة بالشنطة !! ممكن اداء او عزم السيارة ما عجبك .. الخ
.....
ما اقصد التحطيم او أني انتقد نظامنا ، لكن أنا من يوم أخذت اسم المستخدم و كلمة المرور و أنا جالس اقلب في هل مزاد و ناسي موضوع الدراسة

في تجربتي .. ارسلت سيارتين للسعودية :

الاولا فورد كراون فكتوريا ماشي فقط 2000 كيلو متر و كان سعرها 80 الف ريال و سعر الشحن واصل ميناء جدة 5000 وشوي ، بمعني 86 الف و فيها كل شي و فئتها كانت XL ( معرف في الفوردات شي لكن اضنه نوع جدا ممتاز لانه جلد و CD و غيرة )
الثانية : مرسيدس E350 موديل 2008 أرسلتها لصاحبي ممشاها 70 الف كيلو بعد ما اتصل علي قلبة محروق من سعر E350 او E250 و كان موديلها 2006 و ممتاشها 90 الف بعد و طالب صاحبها 86 الف ريال !!

ملاحظة : تصدقوا أني ماشفت السيارة ، السيارات جات لراعي المعرض الي اتعامل معاه و ارسلها من ميناء long beach علي السعودية !!<< بعد ماشيك عليها طبعا و طبعا بعد ما تكاد انها نفس المواصفات و نفس الصور


شكرًا لكم