قدر الله وما شاء فعل !

[اكورداوي نيو !]

السلام عليكم ورحمه الله وبركاته
كيفك يا اخوان ان شاء الله بخير
قدر الله علي اليوم وانا رايح للدوام .. وانصدم من الخلف على الصدام والاستطب انكسر
والرفرف انطعج من بغد الاسطب الين قبل الكفر وحكه بالبداية :(
هذي الصور !



السيارة مغبره .. توني مطلعها ما كملت شهر ! :(
تهقون كم بتكلف طبعا شغل وكالة .. ؟ واي فرع تنصحوني ؟
انا حاليا من سكان الخرج ومدري اذا فرع الخرج يصلحون ؟
و كفانا الله واياكم شر الحوادث

[اكورداوي نيو !]

[غريبه الناس]

الله يعوضك
والله حسافه:(
السياره كرت وماتأخذ عليها تأمين حرام عليك
وشوف كم سعر الوكاله بعدها فكر تروح تصلح عندهم

[فـــيـــصـــل..607..]

يالغالي بسيطه ,,
هونها وتهون وصدقني ذي دفعة بلا عن السياااره

والحمدلله إننا مسلمين نتبع سنة نبيه محمد وخلفائه الراشدين
إننا نقول في حال المصيبه قدر الله وماشاء فعـل

والسياره راح ترجع زي اول واحسن لكن انا اقول لك غير الوكاله لا تروح ,,

[السيف القاطع]

الله يعوضك

[مجوووودي]

الحمدالله ع السلامة

بسيطة

غير الصدام والاسطب والرفرف .. فك وتركيب

وترشهم بالوكاله

وترجع وكاله

[اكورداوي نيو !]

يعطيكم العافيه يارب
لكم ما قلتو كم راح تكلف تقريبا .. صدام + اسطب + رفرفرف < مدري اسوي له شفط وسمكرة بسيطه ورش او جديد؟

[مجوووودي]

انا اشوف ان الرفرف ماتضرر مرة تعديل ومشي حالك

اللي يتغير اسطب وصدام

بالنسبة للاسعار ماعندي خلفيه عن اسعار القطع للموديل الاخير

لكن ممكن يطلع عليك القطع والشغل بحدود ال2000 الى 2500 تقريبا

لكن روح فرع الخالدية واسئل ماعليهم زحمة

[اكورداوي نيو !]

الله يسلمك مجود .. بس الله لا يهينك لو تعطيني وصف فرع الخالدية ^^

[n10]

الصدام الخلفي راح يكلفك 1500 مع الرش والتركيب

الاسطب بحدود ال700 اذا ماكنت غلطاان

[بلال العلمي]

شغل اليد في الخالدية 1800 ريال بدون رش فقط سمكرة بالسحب الكهربائي بدون معجون و بدون تبديل رفرف

تغيير اسطب والصدام يتصلح فقط تعديل ولحام وبوية ويتعدل وضعه

[MGRM]

الله يصبرك جاتني وحده زيها

بنفس المكان

شكلو الوان منحوس ا وانا اخوك

كل من شافو نتفو في عين

الله يعوضنا ..

[accord7]

الحمد لله على السلامه :o

انصحك ماتصلحها خلها كذا شد بلد وجهه نظر

[Silver Aurion]

الحمدلله على كل حال

الرفرف لا تغيره ابد و خله سمكرة .. لانك لو بتغير الرفرف يعني لازم يقصونها و يركبون الرفرف الجديد

و القص هذه لحالها مشكلة ما يضبطها الكل و فوق هذا السيارة جديدة

الله يعين

[nasser1430]

الحمد لله على السلامة ... دفعة بلاء ... في الحديد ولا في العبيد

في موضوع في الموقع عن ورشة أعتقد إنها في الرياض إذا ما خاب ظني ... شغلهم أحسن من الوكالة

ما أذكر رابط الموضوع .... إذا كان أحد المشرفين أو الأعضاء ... يتكرمون مشكورين يحطون الرابط

فأنا أنصحك بها ... لأن معد التقرير صارت لسيارته أقل من ضربة موترك وطلع شغلهم أحسن من الوكالة .

والشغلة بإذن الله بسيطة ( إصطب + صدام + كلبسات + إحتمال جزء من الجسر الداخلي ) وتعديل في الرفرف بطريقة فنية ... وترجع زي أول إن شاء الله .

والله ييسر أمرنا وإمرك .

[kakashi-san]

وعليكم السلام ورحمةُ الله وبركاته

حياك الله اخوي

احنا الحمد بخير ربي يعافيك ..

اخبارك انت ، عسآك مرتاح ان شاء الله ؟

في البداية أحب أبــارك لك خروجك من الحـادث بالسلامة ..

وصدمتك خفيفه جداً ، أنا أول ما طلعت سيارتي ما كملت 20 يوم ألا صادني حادث أقوى من حادثك ..

والحمد لله أمورنا ما شيه ..

الله يحفظك ، اللي يبغى لك حالياً صدام خلفي + كلبسـات + اصطب خلفي يسار

أما الرفرف الخلفي ، انت مضطر الى أنك تسمكره ، وإن شاء الله ما يضرك ..

وفيه كثير من الورش يضبطون لك اللون ، لدرجه ممكن أفضل من الوكالة ..

قل لن يصيبنا ألا ما كتبه الله لنا ، يمكن خيره لك ودفعة بلاء ..

ويا ليت تبلغنا وش صــار معك ..

[احبك يالاكورد]

الحمد لله على سلامتك اخوي

الحمد لله انها ع كذا بس لانها ماهي قوية ولله الحمد

لعلها خيرة لك

[aBuZiyaD]

عواااااااااااااافي الحمد لله ع السلامه
روح الوكاله اطلب صدام خلفي و اسطب يسار

وسمكر الرفرف
معوض خير

[اكورداوي نيو !]

يعطيكم ربي العافيه على ردودكم .. ويحفظنا واياكم يارب !
ان شا ء الله بعد العيد نشوف لها صرفة واعلمكم بكل الي راح يصير ان شا ءالله !
وكل عام وانتم بخير .. والله يسهل للجحاج حجهم .. وحج مبرور بأذن الله