الموضوع: قصه غريبة

السلام عليكم يا شباب المنتدي
هل اللي صار معي سوء تصرف واختيار أم هو حظي العاثر دوماً
ورجاءً ما أبغى تجريح في الردود لأن اللي فيني كافيني
واللي عنده كلمة خير ايقولها أو نصيحة عن تجربة إيفيدنا
اليكم القصة:
سيارتي أكورد سبيشل 2008 وأنى مهتم فيها لأبعد الحدود سافرت عليها قبل فتره وأكلت فيها حفره
جابت لي العيد وبسببها غيرت التالي:
مساعدات أماميه سير الماكينه طقم إصلاح لطرمبة الباور وبما ان السياره كانت بالورشه فغيرت الفحمات وخرطت الهوبات وكل شي قطع أصليه بس الورشه بره وصارت السياره الحمد لله تمام
مافي أسبوع طلع لي موضوع جديد الكشافات قامت تشتغل وتفصل على مزاجها وبعد معاناة 3 أيام متواصله ومبلغ مو سهل صلحتها وهنا تبدأ الحكاية
وانا بمحل التصليح جا بجنبي أكورد سبيشل عليه جنوط فل اللي هي 17 وكان مسوي فيها تعديلات وحركات المهم ... تكلمت مع راعيها والله رجال شرواكم بالخير محترم قلتله جنوطك أصليه قالي إيه وماخذهم وكاله وسألني تبيهم بدل معي وادفعلي الفرق ولو شي بسيط أنا خفت من كلامه قلت أكيد فيهم بلا سألته ليه تبي تخسر نفسك قال انه يبي يبيع سيارته ويبي ايرجعها وكاله فقلت له والله انا قاعد ادور جنوط بس ما ببدل الين اسوق سيارته واشوفهم نظيفين ولا لأ فوافق الرجال وحلف يمين بالله انهم وكاله وانهم كلفوه حوالي الاربع الاف وشوي المهم طلعت سقت سيارته وفعلاُ مافي رجه ونظيفين فقلت له موافق ابادلك الجنوط بس وضحت له ان الكفرات اللي عسيارتي قديمه قالي هي نظيفه قلتله ايه بس قديمه قالي مافي مشكله انا ببيع موتري ورحنا لورشة بنشر كبيره بمنطقتنا وفك الجنوط حقته ولقيت مكتوب داخلها صناعه يابانيه وفحنصناها عالماكينه حقت الترصيص وكانت نظيفه لكن كفراته كانت مقطعه واضطريت اشتري كفرات ودفعت له الفرق 600 ريال واعطيته جنوطي بالكفرات وبعد أسبوعين ظهرت عندي رجه عجيبه غريبه من 100 الى 120 هي خفيفه لكن تقهر وكمان ظهر عندي فجأه من حيث لا أعلم حذفه يسار وعدت الترصيص مرتين والرجه الخفيفه رافضه انها تختفي قولولي وش اسوي هي عين ولا هي الجنوط منحوسه و محتار لي 3 ايام ادور بالنت والقوقل ايش احسن محل ميزان كمبيوتر وترصيص واحترت ناس تمدح العضيب ونا تعيب فيه ناس تقول اليرموك والمجد افضل ناس تقول العضيب اللي بالصناعيه افضلهم ولا تروح عاللي بالمناطق السكنيه لان العمال ما يفهموا ونا تقول الترصيص الارضي للسيارات الكبيره والجيبات وناس تقول بالعكس الترصيص الارضي ممتاز لانه ترصيص على سرعات عاليه ارجوكم قوليلي ايش اسوي خسرت جنوطي ودفعت حق كفرات 2000 ريال و600 فرق حق التبديل يعني لولا اني مركب كفرات جديده كان كلمت الرجال ايرجعلي جنوطي وما ابي الـ 600 بس ترجع سيارتي مثل ما كانت والله راسي بيفقع من الموضوع لاني محافظ على سيارتي جداً ...
وأعذروني على الإطاله