الموضوع: اتمنى تساعدوني قدمت على اكورد 2012 وشكلي بتراجع عنها !!!

المشاركة الأصلية كتبت بواسطة نور الدرب

السلام عليكم

والصلاه على رسول الله صلى الله عليه وسلم

بصراحه قدمت على اكورد 2012 فل 4 سلندر جلد شاشه وسعرها 117

المهم بصراحه تخوفت منها كثير ومن بعض المشاكل اللي تحزن

وحاب اذكرها لكم

1- رجه والسياره جديده !!
الحين أنت شريت ولا .؟!
واذا انت مجرب سياره واحد تعرفه .. لاتحكم على الأكورد بشكل عام ,, يمكن صاحبك (( مو مقصر معها كارفها كررف !! ))
أو أنك متعود على موترك الحالي .. يمكن تكون الرساوه فيه أقوى من الأكورد ,, عشان كذا أنت تحس بالرجه ..

2- حذفيه في الموتر مو معقول الموتر جديد وش حذفيه !!!
المشكله هذه من موديلات سابقه .. هي حظ .. فيه ناس ماتكون عنده الحذفه ,, وفيه ناس تكون عنده ..
هذه مصنعيه لاحظتها للاسف والان مع مشاكل عامه للموتر

جربت قيادتها ولاحظت

1- قساوه في الموتر مثل المطبات
والله أخوي أنا ما أشوف أنها قاسيه .. انا جربت موديلات متفرقه للأكورد ,, 1999-2007 - 2008-2010 ما أشوف انها قاسيه ,, انت يمكن تقارنها بسيارتك الحاليه
القساوه الي يتفق عليها أغلب الي يملكون الأكورد .. هي القساوه بالأسيات (( الكراسي ))

2- صوت الشارع نوعا ما مزعج

يمكن فيه مشكله بالكفرات .. حتى لو كانت جديده يمكن من التخزين
2- المكينه ضعيفه ادعس عليها ما تعطي والله للاسف ( 4 سلندر ) تهمني المكينه
تبي قوهـ .. خذ لك 6 سلندر

طبعا السياره فيها مميزات مثل قوتها وفيها متعه واعجبني فيها المسجل قوي ;)

والله حاب تشورون علي دعيت استخاره وانا في حيره وقلت لكم اللي عندي

لا اخفيكم انا املك حاليا فورد اكسبلورر

كانت خياراتي ماليبو فل - مكسيما ايضا فل -فيوجن فل - رينو سافران فل ايضا 2012

اتمنى تساعدوني الله لا يحرمكم الاجر يا رب ويفرج همومكم

وشاكر لكم

الله يكتب لك الخير بخياراتك .. انا مقدم على 2012 .. وان شاء الله الشباب راح يفديونك ويفيدوني ..

المشاركة الأصلية كتبت بواسطة d7emoooh

الله يكتب لك الخير بخياراتك .. انا مقدم على 2012 .. وان شاء الله الشباب راح يفديونك ويفيدوني ..

الله يعطيك خيرها ويكفيك شرها وتتهنا فيها يا رب

بيض الله وجهك الف شكر لتجاوبك معي

حتى الان ما طلعت السياره يالغالي

الـ6 سلندر غاليه وقيمتها ما تستاهل اشوفها

والسياره مثل ما قلت غير مريحه اسياتها جدا غير مريحه

والله يكتب اللي فيه الخير وشاكر لك

المشاركة الأصلية كتبت بواسطة gogo

بسمه تعالى :


لا تعاتب نفسك فخيارك سهل ممتنع ....لما شراء سيارة كاملة المواصفات و تحمل محرك أربع v , بالرغم من أن خياراتك للسيلرات الاخرى تصب في صالح المحرك فجميعها V6 .....أفضل قرار و أنت صاحب الإختيار و كرأي شخصي شراء أكورد V6 بدون شاشة و ملحقاتها أفضل و يمكن ان تقارب قيمة الاكورد L4 كاملة المواصفات ...عندما نفكر بمزايا الأكورد كاملة المواصفات و التي تحتوي على الشاشة فلا أتوقع أن تعطيك تلك الصفات المميزة للأكورد الأمريكية باسواق أمريكا كميزة راديو XM الفضائي و غيرها كاحوال الطقس محدثة بصور تفصيلية عدا أنها تحتوي على ميزة الجي بي إس و هي ميزة قد تحتويها جميع السيارات المزودة بالشاشات ...فرق شاسع بين الاكورد EX و قريناتها ...و للعلم خلاصة خبرات هوندا هي في الموديلات الاخيرة قبل تغييرها و لننظر للكامري 2011 و دقة الصنع و جمالية التصميم مقارنة بأول كامري تنتج لعام 2012 و التي تحتاج لسنوات لتحقق تلك المفارقة بين آخر موديل لها قبل التحديث ...شاشات الأكورد مثل السيل العارم و باسعار متفاوتة و جودات مختلفة حسب الصانع و تحتوي على مميزات شاشات الأكورد الاصلية بالرغم من بعض الإختلافات و التي تخص السلامة حيث أن بعض الشاشات تتوقف عند سير المركبة لسرعات معينة ....و بالنسبة لموضوعك فخيار ال V6 هو الافضل و فرق شاسع بينه و بين السيارات التي ذكرت كخيارات و بالتوفيق.

حياك الله عزيزي الفاضل

اعاتب لما اراه ولا اتمناه

كلامك سليم والله

لو فيه 6 سلندر بدون شاشه كان بحول الله شريتها علطول

لكن للاسف v6 تأتي بفئه وحده اللي هي الفل بشاشه فقط لا يوجد 6 سلندر بدون شاشه

لان الفرق بالسعر كبير كما تعرف و4 L جربتها ضعيفه وعزمها تعبان واانا تهمني المكينه

السعر 4 سلندر 102000 و6 سلندر 135000 شفت الفرق !

واشكرك على تفاعلك والله يوفقك ويحفظك

انا مثل وضعك تماما ..

اقول في نفسي اوريون سياحي 2012 ولا اكورد

عيوب الاكورد القساوه في المراتب ومع عيون القطط والحفر تحس الديكور يبغا ينفك
وضعف المكينه الاربعه الاسلندر
وثاني شئ سعر الاكورد2012مبالغ فيه
عليك بالافلون يكفيك فرق الفخامه والمكينه
نصيحه لاتستعجل استاجرها اقل شئ اسبوع واستخير

خوفتونا والله دفعت عربون وللحين خايف من الي يقول صوت الخط ماهمني القوة اهم شي اكرة الاصوات الازاع بالسيارة

المشاركة الأصلية كتبت بواسطة شرقي

خوفتونا والله دفعت عربون وللحين خايف من الي يقول صوت الخط ماهمني القوة اهم شي اكرة الاصوات الازاع بالسيارة

والله ياخوي انا عني كل اشوي اوسوس احسب القزاز منزل وهو مرفوع
وثاني شئ مدري عن2012
والله مت خسران شئ استاجرها وستخير
لانك بتدفع دم قلبك فيها
ولك الخيار

المشاركة الأصلية كتبت بواسطة alkasr777

سمعت ان في عرض على الأكورد 6 سلندر عند عبدالله هاشم

و لو تحصل في المعارض 6 سلندر جديد راح يخصم لك مبلغ كبيييير لأنها غير مرغوبة

العرض هو 135 الف مع صيانه مجانيه

والمعارض شوي تعب لكن ان شاء الله بحاول

وشكرا لك وشرفتنا يالكاسر

المشاركة الأصلية كتبت بواسطة d7emoooh

في عرض الحين علىv6 , بـ 125 ألف ريال .. أو 130 ألف ريال + التشيك مجانا الى 5 سنوات او 80 الف كيلو
رآجع نفسك .. ورتب أفكارك ,, والله يكتب لك الخير

* ملاحضه : انا رحت 3 فروع لعبدالله هاشم بالمنطقة الشرقية الاسبوع الي راح ..
1- الفرع الأول قال لي 130 ألف ومافيه عروض وبنزل لك من قيمه السياره الفين !!
2- الفرع الثاني قال لي 135 ومع العرض تصير 130 !!
3- الفرع الثالث (( الفرع الرئيسي بالمنطقة الشرقيه - طريق الدمام الخبر السريع )) قال لي 130 الف مع العرض 125 .. وانا حجزت السياره الحين على العرض .. اذا عنك استفساارات انا حاضر ,, لأني براجع الواكله مرتين خلال الاسبوع هذا

هلا بالغالي

استغرب والله اسعار حلوه !

عندنا ( الرياض ) رحت لهم الفل 135 مع صيانه و129 الف بدون صيانه

واسعار الصيانه غاليه فلو تحسبها تاخذ 135 مع صيانه افضل

غريبه الاسعار تختلف ! وفرق كبير

شخصيا اتمنى القى 130 الف مع صيانه كان بحول الله ما اتردد لكن المعارض

ممكن القى عندهم والله يعين

واشكرك دحووومي على طلتك

المشاركة الأصلية كتبت بواسطة هوندانا

انا مثل وضعك تماما ..

اقول في نفسي اوريون سياحي 2012 ولا اكورد

هلا


الاوريون شيلها والله نصيحه الا اذا انت تحب السرعه

مع اني ما انصح الله يبعد عنا كل مكروه

وشكرا لك

المشاركة الأصلية كتبت بواسطة صووصوو

عيوب الاكورد القساوه في المراتب ومع عيون القطط والحفر تحس الديكور يبغا ينفك
وضعف المكينه الاربعه الاسلندر
وثاني شئ سعر الاكورد2012مبالغ فيه
عليك بالافلون يكفيك فرق الفخامه والمكينه
نصيحه لاتستعجل استاجرها اقل شئ اسبوع واستخير

فهمتني 100%

والافالون تطلب ولا تصبر وحساسه جدا بعكس الاكورد التي تتحمل عندنا

ومع الشوارع مشكله كبيره في الافالون ولا اشوف المواصفات العاليه فيها

والشكل والمكينه والفخامه لافالون اكيييييد لكن كما ذكرت انها حساسه ولا تتحمل الكرف


وجزاك الله خير اسعدني مشاركتك

^^

بالضبط هــ الكلام صحيح اذا الشارع اووك والله متعه و تحس ان القزاز جدار من العزل الكوويس

انا معاي 2012 لهاا اربع اشهر هالشيء ملاحظه بقووه

المشاركة الأصلية كتبت بواسطة ب ق ل _ 2012

^^

بالضبط هــ الكلام صحيح اذا الشارع اووك والله متعه و تحس ان القزاز جدار من العزل الكوويس

انا معاي 2012 لهاا اربع اشهر هالشيء ملاحظه بقووه

الله يعطيك خيرها ويكفيك شرها يا رب وتتهنا فيها

جربتها اذا الشارع ممتاز تحس بقوه وعزل ومتعه ماشاء الله

لكن اذا متعرج الصوت واضح للاسف

وشوارعنا بشكل عام الله يخلف بس

شاكر لمرورك

[quote=[/quote]لو انا مكانك وعندي هالمبلغ راح اخذ ماكسيما دامها من خياراتك فئة أكبر وافضل ومكينة اكبر ومواصفات افضل وشكلها ماراح يتغير قريب
ولو حاب الأكورد انصحك تنتظر لـ 2013 وتشتري الشكل الجديد اخاف تشتري الحين وتندم
او تصبر وتشوف صور الفيوجن الجديده اللي بتنزل صراحه انا ماعجبتني بس بوريك صورتها



وفيه خيار رابع اللي هي الالتيما نزل لها صور تجسسية والسياره حلوه افضل من الاكورد في .( العزل ) اتكلم عن الموديل الحالي وهذي صور تجسسية لالتيما 2013


والله يكتب لك اللي فيه الخير وانا ماانصحك تشتري قبل ماتنزل السيارات بشكلها الجديد بعد تقريبا 8 شهور بالكثير خصوصا ان معك سياره ثانيه .. فليه الاستعجال ؟

اخوي لا تطرح الموضوع بهذا الشكل
جرب السياره اول بعدين انت تقرر الشباب اللي جرب الاكورد كل واحد جاء من تجارب مختلفه
بنسبه لي عندي 2012 4 سلندر بنسبة لي تعتبر نقلة قوية وفي بعض الاحيان حسيت نفسي ماقد سقت سياره
اتكلم عن قيادة كامري 1999 وبعدها هيونداي تراجيت 2008 والاخيره اخذت من فلوسي وراحتي الشى الكثير
نصيحه لاتلتفت للمواصفات او الشكل اوالكماليات
استخير الله
وقرر

المشاركة الأصلية كتبت بواسطة تألمت بس تعلمت

لو انا مكانك وعندي هالمبلغ راح اخذ ماكسيما دامها من خياراتك فئة أكبر وافضل ومكينة اكبر ومواصفات افضل وشكلها ماراح يتغير قريب
ولو حاب الأكورد انصحك تنتظر لـ 2013 وتشتري الشكل الجديد اخاف تشتري الحين وتندم
او تصبر وتشوف صور الفيوجن الجديده اللي بتنزل صراحه انا ماعجبتني بس بوريك صورتها



وفيه خيار رابع اللي هي الالتيما نزل لها صور تجسسية والسياره حلوه افضل من الاكورد في .( العزل ) اتكلم عن الموديل الحالي وهذي صور تجسسية لالتيما 2013


والله يكتب لك اللي فيه الخير وانا ماانصحك تشتري قبل ماتنزل السيارات بشكلها الجديد بعد تقريبا 8 شهور بالكثير خصوصا ان معك سياره ثانيه .. فليه الاستعجال ؟

هلا بك

المكسيما رياضيه وغير مريحه صراحه ووكيلها شيء

والصور اللي جبتها مشكور وما قصرت يالغالي هذه اسمها فورد موندو وليست فيوجن

بصراحه مستعجل لي سنه وانا ادور دخت دوخه كبيره صارت طياره مو سياره

مشكور

المشاركة الأصلية كتبت بواسطة شيخ الغفر

اخوي لا تطرح الموضوع بهذا الشكل
جرب السياره اول بعدين انت تقرر الشباب اللي جرب الاكورد كل واحد جاء من تجارب مختلفه
بنسبه لي عندي 2012 4 سلندر بنسبة لي تعتبر نقلة قوية وفي بعض الاحيان حسيت نفسي ماقد سقت سياره
اتكلم عن قيادة كامري 1999 وبعدها هيونداي تراجيت 2008 والاخيره اخذت من فلوسي وراحتي الشى الكثير
نصيحه لاتلتفت للمواصفات او الشكل اوالكماليات
استخير الله
وقرر

اانا جربتها عزيزي ودونت ملاحظاتي ومحتار

بس اعذرني السيارات اللي معك قبل شوي تعبانه فممكن تعجبك.

بينما انا لا معي فورد وابي افضل واعمل مقارنه بينهم

مشكور على مرورك

ياشباب .. أنا عدلت مشاركتي السابقة .. ياليت تروحون فوق وتقرونها

المشاركة الأصلية كتبت بواسطة نور الدرب

هلا بك

المكسيما رياضيه وغير مريحه صراحه ووكيلها شيء

والصور اللي جبتها مشكور وما قصرت يالغالي هذه اسمها فورد موندو وليست فيوجن

بصراحه مستعجل لي سنه وانا ادور دخت دوخه كبيره صارت طياره مو سياره

مشكور

ياغالي هذي فيوجن بس خلفيتها تشبه مونديو

هذي 2013 مابعد نزلت شف الوجهيه غير

المشاركة الأصلية كتبت بواسطة نور الدرب

حياك الله عزيزي الفاضل

اعاتب لما اراه ولا اتمناه

كلامك سليم والله

لو فيه 6 سلندر بدون شاشه كان بحول الله شريتها علطول

لكن للاسف v6 تأتي بفئه وحده اللي هي الفل بشاشه فقط لا يوجد 6 سلندر بدون شاشه

لان الفرق بالسعر كبير كما تعرف و4 L جربتها ضعيفه وعزمها تعبان واانا تهمني المكينه

السعر 4 سلندر 102000 و6 سلندر 135000 شفت الفرق !

واشكرك على تفاعلك والله يوفقك ويحفظك

لي تعليق بسيط أخوي نور الدربّ
آنآ سيآرتي أكورد 2010 v6 طلعتهآ من الوكآله قبل 7 أشهر يعني كنآ تقريباً في
2011
كآنت مخزنهّ عندهمّ وكآن عليهآ عرض في شركة عبدالله هآشم في جدهـّ - طريق المدينه -

العرض كآن عليهآ 109 آلآف تقريباً .. طبعن بدون رسوم المرور واللوحه و الخ ..

ثآني شي سيآرتي بــدوووونّ شآشه من الوكآله .. كآنت زي موآصفآت الفل الـ 4
بس الفرق كآن عندي زنون وكآله والمكينه اللي هي 3.5 طبعاً .. وبآقي الموآصفآت معروفه للفلّ .

مآ أختلف معآك إنه في ملآحظآت على الـ 6 سلندر وعلى قسآوة الأكورد عموماً ..

لكن صدقني إنهآ خيآر جداً رآئع ومآ رآح تندم أبداً .. سوآء قوة + رسآوة + تحملّ
بشرطّ .. وحط تحتهآ مليون خطّ !!!!!

1. تكون مستمر ع الصيآنه الدوريه
2. تحآفظ عليهآ وتعتني فيهآ لأنهآ -نوعاً مآ - دلوعــه :d !

وفي الآخر لآ تنسي , لآ تنسى , لآ تنسى
الإستخـــآرهـّ ~

ربي يسعدك وتختآر الشي اللي ينآسبك وترتآح فيه ّ ..

بالتوفيقّ

عننن عنننننن عننننننننننننن عننننننننننننننننننننن عننننننننننننننن عنننننننننننننننننننننننننن عنننننننننننننننننننننننننن عنننننننننننن تكوك ما وصلت ميه كمل عنننننننننننننننننننننننننننن
عنننننننننننننننننننننننننننننننننننننننننننن عنننننننننننننننننننننننننننننننننن

عننننننننننننن عننننننننننننننننننننننننننننننننننننننننننننننننن ننننننننننننننننننن 90 توك باقي

عننننننننننننننننننننننننننننننننننننننننننننننننن نننننننننن اخيرا 100


شوف لك خيار ثاني ...

السيارات كثيرة ووكالة هوندا نصابين في الاسعار كل يوم كلامهم يتغير ...

مره يقولون بنعطيك خصم 25% على قطع الغيار

ومرة يقولون لا الخــصم يبدا من 1% - 20% (( فوق ما نقص 5% قالوا تبدا من 1% ))

هذولاء ما ينفع معاهم الا تكتبتهم اوراق على اوراق اي شيء يقولونه وبخط يدهم ...