عندي مشكلة بالإصطاب الخلفي

[Accord Bin Jehad]

السلام عليكم
شباب أنا عندي أكورد 2011 ومركب عليه إصطابات زينة تجارية ليد ، مليت منها وفكيتها أمس بورشة بالصناعية ورجعت الأصلية بعد تعب من الفلبيني مو عارف يفك الصدام الله يهديه

ولما كان يركبهم قالي الشمعة أو اللمبة حقت الإصطاب محترقة ، ورحت شريت لمبة بـ 10 ريال مدري شكلها تجارية ، المهم :

رجعت البيت والأمور كلها تمام بعد ما فك صدام السيارة وركب الإصطاب الأصلي حق الوكالة ، اليوم تفآجأت أن الاصطاب الخلفي الأيمن ما يولع لما أضغط بريك!
بينما الإصطاب الأيسر الثاني شغال بالبريك أو بدون ، أيضاً أثنينهم شغالين أوكي لما أشغل الأنوار عادي! بس لما أضرب فرامل الإصطاب الأيمن ما يولع ، والإصطاب الأيسر شغال تمام يولع
ضربت الإصطاب العطلان ضربتين بـ يدي وضغطت بريك وأشتغل :p بس لما تجي مطبة أو أهتزاز في السيارة يرجع يطفي وأرجع أضربه ويشتغل " بضغطة البريك "

قالي خويي أن المشكلة شكلها بتشبيك الوايرات داخل الإصطاب ، ماهي مثبتة بالشكل المطلوب
أنتوا وش تتوقعون ؟ المشكلة من اللمبة ولا من الوايرات داخل
أرجع أفك الصدام مرة ثانية وأروح لنفس الفلبيني ؟ :(

[D7emoOoh]

والله أتمنى أني أقدر أفيدك .. بس بعطيك توقعاتي ..

يمكن مثل ماقال صاحبك غلط في تركيب الأسلاك أو ماركبها زين .. أو يمكن شي ثاني ..
بس شوف .. أرجع لنفس الفلبيني وقوله ,, بس اذا مايعرف اسحب عليه ,, شوف لك واحد فاهم ,, بس لا تتأخر ,, يمكن عندك إلتماس لاسمح الله ... أتمنى من الأخوان التفاعل ..

[صووصوو]

اتوقع والله اعلم اللمبه ماهي مشدوده زين اوالكلبس حق الاسلاك

[دنيآ الغرور]

مايحتاج تفك ثاني نهائيا

مجرد البطانه الخلفية ودخل يدك وشيك على الاسلاك

[Accord Bin Jehad]

جزاكم الله خير يا أخوان ، مثل ما قال أخوي دنيا الغرور فكيت الغطا من الشنطة وزبطت الأسلاك كانوا مو خاشين ببعض وهذا نتج عنه تقطيع في النور

الله يجزاكم كل خير ما قصرتوا والله