-
ساعدوني يا إخوتي في إختيار سيارتي
السلام عليكم و رحمه الله و بركته ,
في الحقيقة يا أخوان أنا نويت أشتري سيارة جديدة الحمد لله , لكن المشكلة أني احترت بين سيارتين
و هم / الأكورد أو الكامري . طبعاَ موديل 2012
بكل صراحة لي أسبوع وانا متحير وش أخذ الكامري أم الاكورد , الفلوس موجوده الحمد لله . لكن أنا
اللي أخاف منه أني أخذ مثلاَ الكامري أتحسف أو العكس
يا أخوان أنا لا أهتم لشكل و الرفاهية كثير قد ما تهمني الجودة و الاداء /
االفئة اللي باخذها سياحي لسيارتين .. و نظامي كرف ممشى لا يقل عن 200 كيلو يومياَ .. عندي سيارة عائلية
و هذي السيارة بخليها العمل و المشاوير .. عندي عقدة من الخربات كان عندي التيما عذبتني بخرباتها فعلموني لا هنتم اقل سيارة من الثنتين خرابات
أنا طرحت موضوعي في منتدى تويوتا العربية لكن كل الشباب قالوا لي خذلك كامري ! أنا قلت أكيد السالفة فيها تعصب لسيارتهم
فقلت خلني اطرح موضوعي في مندى الهوندا و أشوف .
اريد ارائكم بكل صراحة بدون تعصب للأكورد لان يشهد الله اني محتار مره ..
و شكرا
-
هلا بك اخوي
السيارتين ما عليهم كلام بس لو انا مكانك راح آخذ هوندا لا تقول تعصب لكن من واقع تجربه كان عندي اكورد 97 كرفتها لين قالت آمين ثم بعتها من باب التغير فقط وشريت فورد وتحسفت بعتها وشريت لومينا وكالة وشفت الويل قلت ما لك الا هيفا ورجعت شريت اكورد 2006 وبعد سنتين نزل الشكل الجديد وبعتها وشريت 2008 ولله الحمد ماشيه معي زي الحلاوه كل 70 الف ادخلها صيانه
اتمنى ان افدتك بشي والقرار اولا واخيرا لك
بالتوفيق ،،،،،
-
مادام مايهمك الا الجوده خذ اكورد وانت مطمئن
بالتوفيق
-
-
اذا قلنا ان السياراتين يمتلكون نفس القوة والصبر، فأنا ارشح الاكورد على الكامري، 1 الاكورد اجمل من الكامري2 الاكورد كل انظمة الفرامل موجوده فيها مانع انزلاق وتراكشن والتوزيع الالكتروني للفرامل 3 محرك الأكورد اقوى من الكامري وكلاهما 4 سلندر4 الاكورد من الداخل اجمل بكثير من الكامري وكلامي على اللون الداخلي للاكورد البيج، اما الرمادي فعادي غير جميل، لون البيج روعه وكأنها bmw ، يعيــــــــــــــــــــب الهوندا قطع غيارها النار، ما ادري ليش بصراحه؟؟!! تخيل سألت عن سعر طاسة الأكورد قالي بـــ 400 وكسور ما اذكر بالظبط، تخيل طاسه فوق ال400 ، وهي بلاستيك اجل لو كان جنط او قطعه تحت غطاء المحرك ايش بيكون سعرها. اهم شي صل صلاة الاستخارة باستمرار .
-
ارشحلك اكورد وانت مغمض ..
كنت استخدم اكورد 2004 لمدة 6 سنوات .. كرفتها كرف لين قالت بس .. بعتها في 2010 واخذت لي افالون ولا ارتحت لها ابد ..
وتدور الدورة واخذ لي اكورد فل 2012 .. بصراحة موتر يستاهل كل ريال يندفع فيه ..
-
بصراحة ما انصحك بالاكورد الا بالسوح فقط لانها اقل قيمة وياليت تكاسرهم لين 82 الف وهذا حدها بصراحه لانها بدون مواصفات رفاهية لكن
الاكورد 2012 رساوتها مب مثل 2011 وتحت ، قطع الاكورد غالية ، العزل الخارجي والارضي سيئة واسوء من الكامري بكثير خصوصا الارضي
شكلها بيتغير 2013 ، سعرها يدج او ينزل بقوة اذا نزل موديل بعده واذا نزل موديلين بعده ما تجيب لك شي خصوصا انها بتكون امريكية
صيانتها مكلفة خصوصا لدى الوكالة صيانة 10 الاف ب 475 ريال وكلها تبديل كفرات وزيت وسيفون وموية مقطرة للراديتر وللمساحات وفك الفحمات ونفخها وتمسيحها بس وتنظيف فلتر المكيف والهواء بالهواء
اما تشيكات على الزيوت الاخرى مثل ما تكذب الوكالة ما عليك منهم كذابين قدام عيني لا تشيكات ولا تربيط ولا غريبه
الاكورد لازم تحرص على صيانتها هي مكلفة لو ما تحرص عليها بتنفض جيبك انا اتكلم عن مدة ( 4 سنوات فما فوق تبدا تطلب قطع غير استهلاكية وتبهذلك صح )
قطع غيار الاكورد غالية مثل الفحمات ، والزيوت ، الفلاتر سوا هواء او مكيف او زيت وفلتر المكيف غالي بصراحه ، وتعليق الاكورد قاسي وغير مريح والمقاعد سوا جلد او مخمل غير مريحة .
ضعف عزم مكينة الاكورد هذي نقطة لكنها اقتصادية نوعا ( ما ) بالوقود حسب دعستك
الاكورد لو سويت فيها حادث بعد الشر ان شاء الله راح تنفض جيبك نفض
حادث امامي مثلا يكلفك مبلغ كبير جدا وروح اسئل الي سووا حوادث وشوف يعني حادث ممكن يكلفك نص قيمة السيارة لانها الاكورد معقدة في التصليح وقطعها غالية والوكالة ما توفر كل القطع
تخيل قدامي واحد لاطعينه الوكالة مدة طويلة بصيانة سيارته عشان قربة موية مو متوفرة بيطلونها من جدة او من برا ماني فاكر بالضبط
-
صدام خلفي اكورد ( بدون رش بدون حساسات ) بـ 1280 تقريبا بعد الخصم بعد
-
والله الاكورد برقبت الكامري 2012
مو تعصبب ابداا يكفيك شكلهاا بسس ملكةةةة
وبالدات اللون الجديد يعني شي شي خياال وانت استخيرر والله يعطيك على قد نيتك
والا في بالك والا مرتحله يارب
-
الله يعطيكم العافية ما قصرتم كفيتم و وفيتم ,
أخي " هوندانا " أشكرك شكر خاص
بعد كلامك اخي بديت اخاف من الاكورد لاني نوعا ما لا أهتم بالسيارة لضيق الوقت
انا ما أقدر على الخرابات القوية أو تصليح الحوادث لا قدر الله
الاكورد سيارة جميلة خارجيا و داخليا مع اني ما اهتم للنقطة هذي كثير لكن تنفض الجيب مثل ما يقول اخي هوندانا
الكامري سيارة أرى أنها جميلة و قطعها معقولة لكن انا اللي باخذها سوح و احس اني مغشوش اذا شريتها أبو جميل مفكك
فيها .. لكن اليوم أن شاء الله بروح الوكالتين و بدرس الوضع ممتاز و يارب منك التيسير
أشكركم أخوتي
-
الله يوفقك ان شاء الله
ومبروك مقدما على السياره
ويعطيك خيرها ويكفيك شرهاا
واهم شي صلاها الاستخاره
-
عضو فعال
ماعليك من كلام بعض الناس
والله الاكورد عن تجربة سنين افضل من الكامري
الان عندي السياره ماشيه 350 الف وولاعمري دخلتها الوكاله وسياقتي عنيفه على الموتر
وترى في واحد بالمنتدى تخصصة يطلعة عذاريب الهوندا وانا اقول لويوقفون اشتراكة ويفكونا افضل
انا اتكلم من واقع سيارتين اكورد استعملتهم واكورد لخوي سيارات تعدي 200 الف وكأنها وكالة ماشاء الله لااصوات ولااعطال وهيئة قويه ورساوه بالخطوط
-
نصيحه اخوي صل الاستخاره والله يكتب لك اللي فيه خير
واذا على الخربات كل السياره تخرب حتى الانسان لو يمشي يوميا 50 كليو بعد خمس سنوات الا هو مخبط
-
مراقب
وعليكم السلام اختر الاكورد وانت مغمض ياخي الكامري ماهي مثل اول من عام 2002 الحين تبن وانت بكرامه هذي عند اخوي كامري 2007 الكمبريسير ولا كم قيمتها 4050ريال خرب واشترى جديده وكذلك اخوي الثاني عنده 2009 وخربت عليه عبدالطيف جميل صاير غشاش يستورد قطع غيار رقم 2 والكل يشكي مو الكامري بس كل التايوتا ياخذونها بس سمعه وان لها ماضي مادري كيف الناس تفكر
المهم انا انصحك انك تاخذ اكوردقطع غيارها رقم 1 غير القطعه وانساها يعني اكثر من خمس سنين اتوقع 7سنين ياخي على الاقل تريح خمس سنين من الاقساط ولما تنتهي تكون السياره سليمه الحمدالله ولاتصلح شي في سيارتك
-
اذا تقدر تصبر الشكل الجديد بينزل وبمواصفات حلوة وراح يستمر ع الاقل 5 سنوات وتظل فرحان فيها
نصيحة لا تغلط غلطتنا وتستعجل دامك تقدر تنتظر انتظر الدنيا ما طارت مشي حالك باي سيارة لين ربك يفرجها
-
ذكرتني في موضيع قديمة كانت في المنتدى بس كانو يقارنون الاكورد بالافلون
يعني مستحيل اقارن الاكورد بالكامري
عن تجربة اخوي الصغير معه كامري 2010 وانا معي اكورد 2010 السيارتين فل كامل
ساعات اخذ سيارتة وربي تقول ونيت موب كامري لا موصفات لاثبات ولا رساوه
-
نصيحتي اصبر لـ 2013
الاكورد 2012 مو مثل مثيلاتها 2011 وتحت
وشكل 2012 بيتغير بعد عدة اشهر طق جديد 2013 وافرح بشكله 5 سنين قدام
مكينة جديدة وقير جديد وانظمة اكثر وان شاء الله يحلون مشكلة التنسيم الي في 2012 و الرساوة
ضوابط المشاركة
- لا تستطيع إضافة مواضيع جديدة
- لا تستطيع الرد على المواضيع
- لا تستطيع إرفاق ملفات
- لا تستطيع تعديل مشاركاتك
-
قوانين المنتدى
[Output: 94.68 Kb. compressed to 81.72 Kb. by saving 12.96 Kb. (13.69%)]
مواقع النشر (المفضلة)