الموضوع: أكورد 2012 زيت الدركسون ينقص

وعليكم السلام وررحمة الله وبركاته

طبيعي ان زيت الدركسون يتمدد مع الحرارة ( يوصل للخط العلوي )

واذا بردت السياره وبرد الزيت ( يكون بين الخطين أو قريب من الخط السفلي )

أهم شيء :

1) لا تستخدم الا زيت هوندا ( الزيت الاحمر اللي عند البناشر وغيرها أو أي زيت ثاني هو سبب الخراب ) . واذا رحت لبنشري أو مركز بترومين لتغيير الزيت والصيانه البسيطه أو ون ستوب فوكس

قلهم ( لا يزيدون زيت الدركسون ولا يلمسونه ) خلك عندهم عشان تضمن انهم ما يزيدون زيت الدركسون

كلامي من تجربة مع البناشر وغيرهم .. صرت ما اثق فيهم

2) لا ينقص الزيت عن الخط السفلي ولا يزيد عن الخط العلوي . وأقرأ كتالوج سيارتك لمعرفة المزيد وركز زين وانت تقرأ

3) حاول قدر الإمكان انك ما تكسر الطاره للأخير الين تطق ( لكل السيارات , مو بس الهوندا )

المشاركة الأصلية كتبت بواسطة dhomovic

ي عيال , زيت الدركسون له فتره لازم اغيره او ازيده ولا كيف ؟

مشيت سيارتي 65000 ولا عمري شيكت عليه , ولا ادري وين مكانه اصلاً

شف دامك ما عندك خبرة كبيره بالسياره

نصيحة لا تتسرع وتعبي زيت الدركسون أو تلعب فيه

لأن زيادة الزيت مضر وممكن يسبب لك تهريب بالدوده ونقصه مضر وممكن يسبب لك تآكل وتخرب الطرمبة والدوده

قبل تفحص مستوى زيت الدركسون .. لازم تكون السياره بارده وعل ارض مستقيمه

الزيت لازم يكون بين الخط العلوي والخط السفلي << اذا كان كذا .. أمورك تمام

اذا الزيت كان اقل من الخط السفلي .. عب (زيت دركسون هوندا فقط) الين يوصل بين الخطين


صور من الانترنت للتوضيح







العلبه اللي غطاها أحمر

لو تلاحظ فيها خطين .. الزيت لازم يكون بين الخطين هذولي ( والسياره بارده و الزيت بارد )

لأن زيت الدركسون مع الحرارة يتمدد شوي ( يزيد شوي )


تقدر تشفط الزيت اللي بالعلبة هذي , وتعبي زيت دركسون ( هوندا ) الين يوصل بين الخطين

انا عن نفسي اشفط بمضخه يدويه تلقاها عند ساكو




تحط الطرف الطويل من اللي بعلبة زيت الدركسون .. وطرفها القصير بقارورة ماء صحه ( لكن تكون ناشفه ومافيها ماء )
وتضغط وترخي الجزء الأحمر .. عشان تشفط الزيت من علبة زيت الدركسون

و قارن لون الزيت القديم وريحته ولزوجته .. بالزيت الجديد


حاول تستخدم محقان عشان ما ينصب زيت على دينمو كهرب السياره أو على السيور
واسهل بالتعبئة وعشان كل شوي تشوف مستوى الزيت




اذا ما تقدر تشوف مستوى الزيت

بعد ما تبرد السياره

1) بلّ منديل بشوي ماء و اعصره ثم امسح العلبه من الخارج
2) امسح العلبة من الخارج بمسحات طبيه ( فيها 70% نسبة كحول ) " تلقاها بالصيدليات " ورخيصه لكن فائدتها كبيره بالجروح والتنظيف


أو بخاخ Isopropyl Alcohol 70% .. تبخ بمنديل فاين وتمسح العلبة من الخارج فقط

3) امسح العلبة من الخارج بمنديل مبلل بالماء فقط .. بعد ما تعصره


التنظيف فقط للعلبة من الخارج .. حاول اللّيات وغيرها ما يجيها لا ماء ولا كحول