الموضوع: مساعده يا أخوان بتنظيف البخاخات حق المكينة

وعليكم السلام ورحمة الله وبركاته

انا ما عمري نظفت بخاخات سيارتي إلا بمحلول تنظيف البخاخات اللي يحط مع البنزين
فيه انواع كثيرة أصلية صناعة امريكية .. بساكو
وأسعارها تقريباً تتراوح بين 20 إلى 40 ريال
وطريقته تصب علبة بتانكي البنزين ثم تعبي بنزين فل

فلتر البنزين داخل التانكي .. لكن فيه غطاء داخل الشنطه تفتحه وتطلع الفلتر وطرمبة البنزين

يعني بالعربي اذا بتغيره بورشة .. دور لك ورشة محترمة عشان ما يخربون عليك شيء ( مثل عوامة البنزين أو طرمبة البنزين أو يكسرون شيء )

اذا تبي تشتري راحتك وراحة بالك .. دخلها الوكالة وخلهم يغيرون فلتر البنزين
لكن اتوقع أغلى من الورشات

أهم شيء لا تنظف البخاخات إلا بعد ما تغير فلتر البنزين

و دائما اذا جيت تعبي بنزين طف السيارة .. لأن الأوساخ اللي بقاع تانكي البنزين تتحرك مع تعبئة البنزين
وممكن تدخل وتؤثر على البخاخات وطرمبة البنزين والخ...

البخاخات النظيفه والسليمه تبخ وتوزع البنزين داخل السلندر بشكل صحيح .. عكس البخاخات اللي يكون فيها مشكلة او فيها اوساخ



وترى بخاخات البنزين فيها فلتر .. اذا اهملت فلتر البنزين يتوسخ فلتر البخاخات

المشاركة الأصلية كتبت بواسطة السهم221

وفي تنظيف المكينة يكون تنظيف الزيت الاسود اللي ماسك داخل المكينة وهذا سعره (250 ريال )

كلام فاضي .. لا يهمونك
وترى ممكن تتأثر المكينة .. لأنهم يحطون زيت خفيف جدا لتنظيف المكينه .. وممكن بعد التنظيف تصير المكينه تنقص زيت

اذا تبي تنظف المكينه من الزيت الأسود .. غيّر الزيت مع سيفون " أصلي وكالة " .. واحذر التجاري الموجود بالبناشر

وترى فك الصرة وتفريغ الزيت بالكامل .. أفضل بكثير من الشفط

كل 5 آلاف غيّر الزيت .. وغيّر السيفون مع التغييره الثانيه للزيت

4 علب بدون تغيير السيفون
4 علب وربع مع تغيير السيفون

لكن عاير الزيت كل فتره وفتره

وأضمن لك ان مكينتك ان شاء الله بتكون من أحلى ما يكون .. وبلا نصب وكلام فاضي

# تكلفة تغيير الزيت مع السيفون .. بالبنشر
14 سعر علبة الزيت × 5 علب = 70 ريال
سعر السيفون بالوكالة 20 ريال
شغل يد البنشر 10 أو 15 ريال
المجموع = 100 او 105 ريال بالكثير

متى آخر مره غيرت ( البواجي - زيت القير والفلتر الخارجي - فلتر الهواء - فلتر البنزين ) ؟
لأن الأشياء هذي مهمة وبتحس بالفرق بالعزم وكل شيء و تحافظ على سيارتك