السلام عليكم ورحمة الله وبركاته


كيف حالكم ان شاء الله بخير ؟

أنصح اللي يقرأ الموضوع يكون معه بياله شاي أو أي شيء يشربه يخليه يمخمخ على الموضوع :d لأنه طويل ويحتاج تركيز


مثل ما أنتم عارفين دخل ( موسم - وقت - فصل ) الشتاء

والزيت يثقل مع البروده ويخف ويسيح مع الحراره .. يعني زيت 20W50 بالشتاء وعند بداية التشغيل يكون أثقل من الصيف

انا كنت استخدم 20W50 .. لكن اعاني منه عند بدايه التشغيل بالشتاء !! .. الزيت يبطي ويتأخر ما يتوزع على كامل المكينه .. لأنه هو أصلا ثقيل ومع الشتاء يثقل أكثر

فـ تضايقت وصرت أبحث عن أكثر من زيت .. ومالقيت 15W40 أو 10W40 غير كاسترول ماجناتيك وسعر العلبه بالبناشر 35 ريال للعلبه الواحده نصابين ( سعر الجمله على ما اظن 21 ريال للعلبه ) .. ولا يناسبني

لأن البعض يقول ما ينفع للسيارات اللي ماشيه كثير + البعض يقول ما ينفع ترجع من الزيوت التخليقيه أو شبه التخليقيه إلى الزيوت العاديه


المهم .. رضيت بالأمر الواقع وأن مافيه عندي إلا خيارين 20W50 أو 10W30

يا إني استمر على 20W50 واتحمل انا والمكينه تأخر توزع الزيت على المكينه بالشتاء لأنه ثقيييييل .. وبالشتاء يكون اثقل

أو

أخاطر وأجرب 10W30


وكنت محتار جدا وخايف الزيت الخفيف يأثر على سيارتي لأنها متعوده على 20W50 و مشيت عليها تقريب 50 ألف وانا أستخدم 20W50 سيارتي شاريها مستعمله


المهم قررت أجرب 10W30 .. واذا ما نفع .. برجع على طول لـ 20W50


وجربت السياره ولله الحمد .. الصوت خف بشكل كبير.. ويتوزع أسرع من 20W50 .. ودعسه البنزين صارت أخف .. مو مثل 20W50 يقلل العزم شوي لأنه ثقييييل


طبعا يمكن بعضكم يقول تراك مكبر الموضوع ومخاطره وما ادري ايش .. لكن معروف السياره اللي ماشيه كثير جدا جدا أو اللي متعوده على 20W50 .. وحطيت لها زيت أخف بكثير مثل 10W30 .. تبدأ تدخن مع الشكمان ( جلد بلوف أو تحرق زيت لأنه خفيف ) أو يقل ضغط الزيت .. وهذي مشكله بحد ذاتها .. ولازم تستمر مع الزيت الثقيل 20W50


لكن إلى الآن غير متأكد .. اذا كان الزيت ينقص أو لا .. واذا كان الشكمان يدخن أو لا .. لكن مبدئيا مافيه دخان

إلا بخار عند بدايه التشغيل والسياره بارده .. وبكرا بتأكد


بالكتالوج مافيه 20W50 بجدول الزيت .. يعني يمكن تكون اللزوجه هذي غير مناسبه .. لكن الشكوى لله اذا مافيه 15W40 .. مالنا إلا 20W50 بالصيف

وبالشتاء 10w30 مناسب للمكاين النظيفه جدا .. والسيارات اللي ما مشت كثير



ملاحظه :

الهدف من الموضوع .. ذكر تجربتي فقط وللفائده .. ومكينه عن مكينه تختلف ( مكروفه - متوسطه - محافظ عليه ) + ( ماشيه شوي - ماشيه وسط لا شوي ولا كثير - ماشيه كثير )

يعني ما أقدر أنصحكم بـ 20W50 أو 10W30


وانا عن نفسي بالشتاء .. ما راح استخدم 20W50 مره ثانيه .. 10W30 أو 15W40

وبالصيف 15W40 واذا مالقيته .. 20W50



وأنصح بالسيفون الأصلي وكاله فقط لا غير
سعره 19.20 ريال

احذروا التجاري .. لأن بعض الموجود عند البناشر = تجاري .. ويبيعه عليك على أنه أصلي