اكورد 2012 ، أو 2013؟؟ (مجموعة أسئلة تحتاج خبير يجاوبها)

**مقطوع راسي** · 06-12-2012, 09:15 PM

السلام عليكم ورحمة الله وبركاته

صبحكم / مساءكم الله بالخير

وشلونكم يا اخوان؟؟

انا اخوكم في الله عاشق من عشاق علامة هوندا المنتشرين في كل مكان وزمان

كنت مالك اكورد 2004 ومشيت عليها الى 317,000 كيلو ينطح كيلو :(

واقل ما اصف فيه السيارة انها لا مثيل لها

فعلاً لا اعتقد ان هناك سيارة مثل جودة الاكورد 2003-2007

اكلت مطبات ، حفر ، ارصفة (ينفجر الكفر بعد الرصيف واروح اغيره بالمحطة ولسان حالي يقول : الرصيف اللي بعده)

مشكلتي النظر عندي شجرررر فلا بد بالاسبوع اكل لي مطب على سرعة سبعين وفوق

مجنت السيارة مجن بالسفريات على سرعات عالية

كان نظامي معها : الزيت والأمور الدورية من عند الوكالة وفارق التكلفة بسيط

اما غيره انحش من الوكالة لانهم بيمصونك مص (وهذا اللي اطلق المفهوم الخاطئ بين الناس ان الهوندا قطع غيارها نار ، هي اغلى بفارق بسيط والله فقط وفارق الجودة كبير)

اما القطع اشترها بنفسك ولازم اصلية وركبها عند ورشة مضمونة وانتهى الموضوع ولا ارتفاع اسعار بقطع الغيار ولا هم يحزنون

المهم جميعكم هنا مُلاك المَلاك الجميلة الاكورد وتعرفون جودتها ما يحتاج

انا قدر الله علي وطلعت بنص الليل دايخ اجيب دواء لاخوي الصغير ومسرع

فما كان مني الا وتودشت ام الرصيف على سرعة ثمانين تقريباً .. وكان رصيف جامد و ولد حمايل فراحت السيارة فيها

حسبوها التأمين علي خسارة كلية وعوضوني 25,000 سعرها بالسوق (الحمدلله على كل حال نعمة والله)

المهم طولت عليكم والله ابيكم تفهمون وضعي

انا قاعد اللحين على سيارة اجار افيو والاجار ماكلني اكل

ولا يمكن اشتري سيارة غير الاكورد

فالسؤال اللي يطرح نفسه وبحكم اني غير متابع للسوق

1. متى بتنزل الاكورد 2013 عندنا بالسعودية؟؟

2. تتوقعون إذا نزلت اقدر اشتريها واستلمها مباشرة؟؟ وهل فيه احتمال آكل تبن كم اسبوع زيادة على بال ما استلمها؟؟

3. كم بيكون سعرها؟؟ الاستاندر كم؟ وباقي الفئات كم؟؟

4. هل فعلاً راح يكون فيها عيوب مصنعية؟ بسبب انها اول دفعة من الشكل الجديد؟ او مجرد كلام؟؟

5. هل جودتها راح تكون مثل سابقاتها؟؟ ولا تختلف؟؟

6. ماهي الفروقات الجوهرية بين الاكورد 2012 و 2013 ، غير الشكل والداخلية؟؟

7. وش تنصحني؟ بـ12 او بـ13 ؟ وليش؟!

لاني انا بين خيارين ومحتار اشد الحيرة

اشتري سبيشل اكورد 2012 او انتظر الـ 2013

الـ 2012 حلوة وشي ممتاز انها اخر دفعة ميزة اعتقد ان العيوب كلها المفروض اختفت

لكن شكلها ما عجبني مرة وداخليتها ايضاً نفس الشيء

السبب طبعاً إن 2013 افضل بكثيييييير هههههههههههه ما يبيلها كلام

وأيضاً 2013 سيارة جديدة كلياً بعد اربع سنوات فراح يكون مستواها التقني مختلف جداً وهذا اللي حارقني ابيها

لكن المشكلة زي ما قلت ما اقدر انتظر مدة طويلة بتاكلي الاجارات

وخايف انتظر ولا تستاهل بعيوب او غيره

انا اهم شي عندي الجودة بشكل رئيسي فقط .

شوروا علي يا اخوان وخذوا راحتكم بالكلام والتفصيل

(بعد ما اشتريها بإذن الله بتكون رابع اكورد تشتريها العايلة الكريمة خخخ عندنا هوس اكورد بالبيت) -- لا إله إلا الله ماشاء الله تبارك الله

الله يوفقكم يا اخوان وييسر اموركم وانتظر ردودكم ونصايحكم

**THE SILVER ACCORD** · 06-12-2012, 10:27 PM

المشاركة الأصلية كتبت بواسطة مقطوع راسي

1. متى بتنزل الاكورد 2013 عندنا بالسعودية؟؟
ما أدري والله
2. تتوقعون إذا نزلت اقدر اشتريها واستلمها مباشرة؟؟ وهل فيه احتمال آكل تبن كم اسبوع زيادة على بال ما استلمها؟؟
ما أدري والله
3. كم بيكون سعرها؟؟ الاستاندر كم؟ وباقي الفئات كم؟؟
ما أدري والله << أجل وش تدري عنه:d

المشاركة الأصلية كتبت بواسطة مقطوع راسي

4. هل فعلاً راح يكون فيها عيوب مصنعية؟ بسبب انها اول دفعة من الشكل الجديد؟ او مجرد كلام؟؟
ما أدري والله .. لكن حتى لو كان فيها عيوب مصنعيه بتصلحها على الضمان .. لكن ممكن بعض العيوب ما تبين الا بعد ما ينتهي الضمان :d
5. هل جودتها راح تكون مثل سابقاتها؟؟ ولا تختلف؟؟
ما أدري والله .. ما نقدر نحكم على السياره وهي توّها جديده وحتى ما نزلت !! .. يعني اصبر لها سنين وتمشي كثير وتجارب الناس لها عشان تعرف حقيقتها .. اذا كانت جودتها مثل الموديلات السابقه او لا ...
اغلب السيارات الجديده تجميع .. مو مثل قبل MADE IN JAPAN يعني يابانيه 100%
سواءا كانت تجميع امريكي أو يابانيه .. اهم شيء تكون جودتها عاليه و ممتازه
نظام التعليق والمساعدات بالأكورد الجديده تغيرت عن قبل .. يعني رساوتها ممكن ما تكون مثل قبل
القير الأوتو تغيّر صار CVT
والخ...
6. ماهي الفروقات الجوهرية بين الاكورد 2012 و 2013 ، غير الشكل والداخلية؟؟
قير عادي 6 تعشيقات أو قير CVT
زر لتشغيل السياره
يقولون طرمبة الدركسون بتكون كهربائية ;) < ما تأكدت
حساسات لضغط هواء الكفرات
بلوتوث
كاميرا خلفيه
ومواصفات كثيره ما اقدر اكتبها كلها .. لكن وش بتاخذ فل كامل او ستاندر سياحيه ؟؟

7. وش تنصحني؟ بـ12 او بـ13 ؟ وليش؟!
2013
شكل جديد ومواصفات أفضل
ولكن لا تدعي علي اذا صار فيها عيوب مصنعيه بسيطه وتنحل على الضمان .. ويتفادونها بالموديلات القادمه

واذا طلع لك العيب قبل ينتهي الضمان .. حضك حلو
واذا طلع لك العيب بعد ما ينتهي الضمان .. حضك سيء

وعليكم السلام ورحمة الله وبركاته

مساء النور

الحمد لله على سلامتك

أنا أنصحك بـ 2013 شكل جديد وافخم ومواصفات أفضل .. لكن سعرها يمكن يكون أغلى من 2012 + يمكن تتأخر ما تنزل وانت مستعجل

ميزة 2012 يمكن يكون عليها تخفيض شوي عشان يصرفونها .. وتقدر تشتريها الحين .. لكن يمكن تندم بعدين لأنك اخذت 2012

بس المشكلة اذا انتظرت 2013 الأجار بياكلك

مواصفات وفئات الأكورد
http://automobiles.honda.com/accord-sedan/price.aspx

وأنصحك بالإستخاره

**hasan1982** · 07-12-2012, 02:43 AM

1. متى بتنزل الاكورد 2013 عندنا بالسعودية؟؟

اختلفت الأخبار و المصادر و لكن اخر خبر يقول بتنزل بداية فبراير 2013 م .

2. تتوقعون إذا نزلت اقدر اشتريها واستلمها مباشرة؟؟ وهل فيه احتمال آكل تبن كم اسبوع زيادة على بال ما استلمها؟؟

أتوقع تقدر تشتريها مباشرة مو مثل حركات وكالة فورد تجلس ثلاثة شهور و يمكن أكثر على التورس و الايدج

3. كم بيكون سعرها؟؟ الاستاندر كم؟ وباقي الفئات كم؟؟

اتوقع الاستاندر تبدأ من 85 الف ريال و انت طالع

4. هل فعلاً راح يكون فيها عيوب مصنعية؟ بسبب انها اول دفعة من الشكل الجديد؟ او مجرد كلام؟؟

الامريكيين اللي عندهم السيارة يمدحونها بقوووة

5. هل جودتها راح تكون مثل سابقاتها؟؟ ولا تختلف؟؟

أتوقع نفس الجودة هوندا ما تفرط بسمعتها

6. ماهي الفروقات الجوهرية بين الاكورد 2012 و 2013 ، غير الشكل والداخلية؟؟

الفرق نظام التعشيق صاار عندك اتوماتيك نفس الاوتامتيك الاول أو نظام جديد اسمه اتوماتيك cvt

cvt نظام تعشيق سلس يخليك ما تحس بنقزة السيارة من نمرة لنمرة و موجود في سيارات نيسان لكن نيسان مو مثل هوندا في القير اكيد هوندا افضل بدون مقارنه

الشي الثاني عزل الهواء صار احسن من اول بنسبة تحسن 40 % حسب المستخدمين الامريكيين

7. وش تنصحني؟ بـ12 او بـ13 ؟ وليش؟!

13 أكيد لإنك بتشتري سياره تحط فيها دم قلبك و شوي شكلها متغير و لا يغرك اللي يقول: ما تفرق خذ 12 الحين اهم شي الموتر جديد لإن الناس جبلت على حب الجديد هذا اول سبب ،، ثاني سبب لو جيت تبيع بعد اربع او خمس سنوات رح تمسك سعرها لانها باقي نفس الشكل و مثال ذلك الحين لو احد معاه اكورد 2008 الشكل الحالي و واحد معاه اكورد 2007 الشكل القديم مع ان يمكن السيارات ما بينها الا شهرين شوف فرق السعر بينها في البيع.

**عزآه** · 07-12-2012, 03:32 PM

باقي شهر تقريباً و تنزل

و إذا انت تشوف 2012 ماعجبك شكلها لا خارجياً ولا داخلياً

خلاص انتهى الموال اخذ لك 2013

رغم ان 2013 خلفيتها بايخه كأنها سيفيك

و إذا تبغى نصيحتي اخذ 2012 :

اولأ لأنها من وجهة نظري شكل خارجياً افضل و رسمياً اكثر

2013 ماتدري عن عيوبها و دائماً اي سياره جديده توها نازله في سوق تكون فيها عيوب مصنعيه

و الدليل على ذلك .. اكورد 2008 كل العيوب و الخرابات فيها .. ليش ؟؟

لأن اول مانزل شكل جديد و الناس اغترت فيه و عجبها الشكل و خذوه و توهقو في العيوب و الخرابات

ياكثر المشاكل في اكورد 2008 من طربة الدركسون و اصوات الديوكرات و الشنطة بلااوي لا تعد ولا تحصى

و اذا ماعجبك شكل 2013 و فكرت انك ماتبغى تغامر فيه

اخذ 2012 في ذاك الوقت راح تصير عليها عروض قويه و تنزيلات في المعارض

**hasan1982** · 07-12-2012, 03:59 PM

انا عندي اكورد 2008 و مع ذلك ما فيها المشاكل الي يقول عنها الاخ عزاه بالعكس آخر حلاوة و الحمد لله ماشية 194000 كم الى الحين و ما شكت من شي لإني اوديها صيانه الوكالة كل 45 الف كم و اخر صيانه 180 الف كلفتني 2500 ريال غيروا التروس و عدة قطع و شيكوا عالقير و كل شي اخر حلاوة و لله الحمد

**ابو حمزة العمري** · 08-12-2012, 01:36 PM

انا رحت الوكاله بالرياض العليا

2013 بتنزل 1/3/2013 بكم تنزل ما احد يدري

سالت هل هي امريكيه او يابانيه قال نفس المصنع بالطاقم الكامل نقلناه امريكا للظروف اليابان مع الزلالزل

الاسعار مخفضه 2012

نص فل 90 الف قبل كانت 95 الف ( كنت ناوي اشتريها بس طلعت بايخه من داخل لا ديكورات ولا جلد على الابواب ولا كشافات اماميه ما تفرق عن السياحي الا جنوط وفتحه )

فل المخمل الاسبيشل صارت 97 قبل كانت 104 بس الالوان محدوده فضي وعودي ورصاصي واسود