السلام عليكم ورحمة الله وبركاته
بدخل بالموضوع على طول بدون مقدمات
خربت بطاريه ريموت سيارتي وصار الريموت ما يفتح السياره ولا شيء
واذا ضغطت زر الريموت ما تولع لمبة حمراء صغيره بنفس الريموت << يعني البطاريه فاضيه وتحتاج تغيير
المهم رحت للوكاله اليوم وقلت أبي بطارية لريموت السياره
جاء المصري و قال الكمبيوتر خربان .. قلت يا اخي جاي من بعيد وآخرتها الكمبيوتر خربان .. قلت طيب ابي بس بطارية ريموت
قال بس بطاريه ريموت ؟
قلت نعم بس بطارية ريموت .. وسألني عن موديل السياره وقلتله وعطيته رقم البطاريه المكتوب بالكتالوج
المهم جابها وقال بـ 40 ريال !!!!
قلت يا اخي بطاريه صغيره جدا لا وبعد اندونيسيه بـ 40 ريال !!! << مب عاجز ادفع 40 ريال .. لكن معطيني السعر من راسه لأن الكمبيوتر خربان
قلت طيب تأكد من السعر بالكمبيوتر قال الكمبيوتر خربان حتى السعر ما اقدر اتاكد منه .. قلت خلاص بعدين اجي اذا صلحتوا كمبيوتركم
المهم رحت لمحلات الزينه وقلت لهم عن رقم البطاريه CR1616 .. ما توقعت ألقى عندهم .. واخذت حبتين بـ 10 ريال وانا مبسوط :d
عندهم انواع كثيره من بطاريات الريموت ورخيصه جدا بـ 5 ريال يا بلاش
ورجعت للبيت وركبتها بنفسي ( سهله جدا اذا كنت تعرف الطريقه .. لكن تحتاج حذر عشان ما تكسر الكلبسات .. ومسمار الريموت أول شيء فكه صعب لأن فيه مادة زرقاء لكن بعدين يصير أسهل لأن المادة الزرقاء تروح .. وتحتاج مفك كويس وصغير عشان ما تخرب سنون مسمار الريموت )
و الحين الريموت عال العال
ملاحظه :
البطاريه اللي من محل الزينه بانوسونيك اندونيسيه ( مكتوب عليها made in indonesia) .. وبعضهم يقولون صينيه ما أدري وش سالفتهم
وبطارية الريموت الأصليه ( شد بلد ) بانوسونيك يابانيه .. كثّر خيرها صبرت 6 سنين تقريباً .. موديل سيارتي 2006 وحنا الحين بـ 2012
رقم البطاريه CR1616 لريموت 2006 و 2007 ويمكن الموديلات الثانيه
رد مع اقتباس
مواقع النشر (المفضلة)