تعددت الاسماء لحماية واجهة السيارة ومنهم من يقول واقي امامي ومنهم من يقول حماية الطلاء وايضا حماية من الترمل

والخلاصة هي حماية واجهة السيارة من ذرات الرمل والغبار وخاصة على الطرق السريعة والصحراوية التي يكثر فيها اصطدام واجهة السيارة بهذه الاجسام الصغيرة والصلبة مما يترك اثر على طلاء السيارة ويصبح واضح للعيان مع مرور الوقت وكثرة السفر

لذلك تعددت وسائل الحماية لواجهة السيارة وعلى سبيل المثال

قناع واجهة السيارة (البرقع) << مجرب والنتيجة جيدة وله حماية قويه ولكن مع مرور الوقت يدخل ذرات صغيرة من الرمل بين البرقع والصدامات وتبقى تكشط في البويه حتى تعدمها والنتيحة دماااار+اعدام ... وفي الاخير على طريق سفر انفك مشبك صغير من البرقع في الجهة اليمنى وبقى يضرب في صدام السيارة مع الهواء وشفت الكارثه بعد ان وصلت من سفري كانها صدمه مو من البرقع

التغبيره او الرشه << مجربة حمايتها سيئة جدا وقد لا تذكر وجربت منها انواع واشكال ويبقى اثرها على بوية السيارة وحتى بعد الغسيل والشفافة منها نفس الشيء راح تلاحظ زي التشققات الصغيرة على البوية بعد الغسيل وما تروح الا بالتلميع الساطع :(

الفيري << مجربة نفس اضرار التغبيرة + يشيل لمعة البوية والشمعات تتحول صفراء نصراوية :p لانه فيه مادة كيميائية قويه وخاصة بعد ما ينشف

خلطات اخرى << مجربة متعبه عديمة الجدوى توحي لك بالبئس والشقاء وعدم وجود حل لهذه المعضلة الي نعاني منها في طرقنا الملتهبة بحر الرمضاء واللهب

أن شاء الله تكون مقدمة علمية مفيدة وزي ما يقولو اسأل مجرب ولا تسأل طبيب ^_^

نبداء في المهم
بسم الله الرحمن الرحيم

بعد كل الحلول المطروقه لم يبقى لي سوى حل وحيد وهو مع افلام حماية واجهة السيارة من الترمل الشفاف << مجرب رائع يعطيك هيبه ووقار وراحة نفسيه لا تشيل ولا تحط ولا تركب ولا تفك ولك وللعمر وريح راسك وراس سيارتك :d

الافلام هذي مصنوعة من مادة غير قابله لتمزق او التلف وميزتها ايضا لا تأثر على طلاء السيارة متى ما تبي تشيلها تروح بدون اضرار وحتى تحمي البويه من الحكات والكشطات الي نعرفها في مواقف السيارات عندنا ^_*

بس هنا مربط الفرس ... انتبهو
رحت الغرابي مره وحصلت خوينا ابوبنقل هناك وقالي انا سوي حماية واجهة شفاف قلت بكم صديق قال 120 ريال ورحت اشوفها حصلتها تجليدة حقت الكتب اضن كان مكتوب عليها (ROCO روكــو) بس عدله وكتب صناعة كورية << ههههه امزح بس الاكيد جودة الفلم سيئه وضررها على البويه ومع الشمس والمطر والوقت بتحترق وتمسك بسيارة وشكلها يطلع زززفت

فيه شركات امريكيه واوربيه كثير متخصص في صناعة الافلام هذي وبجودات عالية جدا وضمانها مدى الحياة وهذا دليل على ثقتهم بجودة منتجاتهم
شركة جيوشيلد افلامهم رائعة جدا تكلف الصدام مع المرايا والشمعات والرفارف ونص الكبوت تقريبا 2500
كذلك شركة 3M شفت افلامهم اقوى وجودة افضل ولكن تقريبا بـ 3 الاف وشوي

لذلك لم اتعامل مع هذه الشركات المزايده في السعر بشكل مبالغ فيه للغاية فقمت اخذت لي جوله في النت وفي المواقع الاجنبية بصراحة وبقولها لكم اكتشفت احنا شعب ملعوب علينا من جميع الجهات بس خليها على ربك

هناك في الموقع الشهير ايبي eBey حصلت تاجر رهيب ورائع في تعاملة واسلوبه واسمه cleardefender امريكي رجل صاحب امانه وصادق وكان يبيع افلام حماية 3M يبيعها بالرول وتقدر تطلبه الطول الي تبيه وهو يقصه لانه حسب كلامه قالي انه عنده رول كبير جدا ويقص لك منه حسب رغبتك

المهم شريت منه رول طويل مقاس (141*12 انش او بوصه) يعني طول 3 متر ونص في 30 سم بتكلفة 99 دولار يعني 370 ريال تقريبا

رخيص يا بلاش وانا الي حصلتها بـ 3 الاف ونفس الشركه ونفس الجوده ونفس كل شي

المشكلة الي وقعت فيها لعدم خبرتي في طريقة تركيبها انها صارت موعريضه بالقدر الكافي حتى تركب على صدام سيارتي الاكورد لان التركيب يحتاج لشد وسحب من الاطراف ويكون له مقاسات محدده

هنا تكفون ركزو معاي شوي مهمه جدا النقطه هذي

صدام سيارتي كان يحتاج لرول مقاسه 60 سم عرض وطول 3 امتار اي 24*120 ويكون مثالي لها ;) ولو اطول من 3 امتار مو مشكلة افضل
وكذلك تحتاج لرول آخر وهو لكبوت السياره يجي من النص والرفارف وكذلك المرايا والشمعات
ركزو الصوره التالية تشرح المقصد من كلامي اللون الاحمر هو الرول الاول مقاس 24*120
......................................اللون الاصفر هو الرول الثاني مقاس 18*130
 ..........الخطوط الزرقاء لقياس الصدام عشان تشتري الرول المناسب وتتاكد انه راح يركب






الغلط الي ارتكبته وانتبهو منه هو المقاس الي اخترته لاني بحثت وقريت كثير ما احد قالي عن المقاسات هذي لان اغلب الي يركبها تركيب شدر مدر يعني اي كلام يرقع بالفلم على واجهة السيارة حتى يغطيها كامله

خلاصة الكلام عشان ما اتوهكم معاي

لو رجع الزمن وشريت لسيارتي الاكورد 2012 راح اشتري رولين 2 رولات
واحد مقاس 24*120 انش هذا صدام السيارة من الامام
والثاني مقاس 18*130 لغطاء المحرك +الرفارف + المرايا


وهذا رابط للمساعدة يالله عشانكم مع انه يمكن يزعلو علي الادارة ولكن لعيونكم نتحمل زعلهم

http://www.ebay.com/sch/i.html?_odkw...+Film&_sacat=0

وهذا الرابط الثاني لرول الثاني

http://www.ebay.com/itm/18-x-129-Gen...f32003&vxp=mtr

وتكلفتها هذي كلها تطلع عليك يا حبيبي 292دولار يعني 1100 ريال تقريبا وتركيبها لو في شركه كبيره ولها اسمها تاخذ عليك 150 الى 200 ريال وكذلك الشحن اعتقد راح يكلفك 100 ريال
يعني تكلفه 1400-3200 وهو سعرها عند شركه 3M راح توفر 1800 ريال

بنسبة لما حصل لي قمت بتركيب في شركة جيوشيلد مجانا لاني ومع الاسف الرول الثاني شريته من جيوشيلد فرع البديعة لاني كنت مسافر رحلة خارج السعودية وكانت عودتي بعد شهر يعني مع بداية الدوامات وما فيه وقت من الطايره على سيارتي وامسك خط الجنوب عشان كذا اخذت الرول الي هو مقاس 24*120 بقيمه 1500 ريال مع التخفيضات مع انه قالي 2000 بس مع الاخذ والعطاء قال 1500 مع انه الصدق انه سعره 600 ريال في الخارج استغلالXاستغلال وعيني عينك

تابعت التركيب كان احترافي حقيقة مع انه تاخرت يوم عندهم وسألت الفني العامل عن الفرق بين الرولين قال بالعباره التالية هذا حق انت مره قويه انا معلوم غالي مره هذا:d
وسألته يقول رول 3M جودته عاليه افضل واقوى ولكن بالطبع اغلى

أتمنى شرحي يكون واضح لكم واعتذر اشد الاعتذار طولت عليكم وقلت تفاصيل ممله بس يالله للي يبي يقراء ويستفيد من التجربه
وهذا
 وعشان ما تقولو وين الصور هذي الصور جبتها لعيونكم الحلوه الصور بعد التركيب الواقي بما يقارب 7 اشهر وماشاء الله جديد لا تغير لونه ولا توسخ ولا شي مع اني في حر الصيف اكون بالرياض وفي برد الشتاء في أبها عاد حلوها ^_^

قولو ما شاء الله تبارك الله


هذه الوجهيه وكما هو واضح من التصوير غير مرئي الفلم الواقي

خلونا نقرب التصوير شوي ونركز عليه اكثر



وهذي على جنب








وهذا والحمد لله على تمام الموضوع
ولا اخفيكم استغرق مني جهد ووقت اسأل الله ان يجعله مبارك لي ولكم
ويقدرنا لرد بعض جميلكم يا احبابنا اعضاء وادارة هوندا

وانا هنا لخدمتكم الي تامرو عليه انا موجود واي سؤال استفسار خدمة لا يردك الا الكيبورد

ترقبو قريبا شرح شراء عازل حراري من شركة لومار الامريكية من الخارج لهوندا اكورد 2012 مع بعض النكبات والاخطأ الي متأكد اي احد راح يشتري سوف يقع فيها كما وقعت فيها أنا
صورة تشويقة :p

اخوكم
/
\
ابو باتل