الموضوع: أخطاء تعلمت منها وأكتسبت خبره .. وحبيت أشارككم ( الجزء الأول )

السلام عليكم ورحمة الله وبركاته

كيف حالكم ان شاء الله بخير

الموضوع اخذ من وقتي كثير و تعبت عليه لأفيدكم .. وحاولت أنه يكون مرتب قدر الإمكان عشان أسّهل القراءه عليكم ..

سيرة عن سيارتي ( حقل التجارب )

سيارتي كانت وما زالت حقل تجارب وتعلم واكتساب خبره و هي أول سياره أشتريتها .. أكورد 2006 ستاندر قير عادي .. وبالتأكيد أني أرتكبت بعض التجارب و الأخطاء الفادحه بشكل غير مباشر وغير مقصود :dولكن تعلمت منها ;)

ولأني تعلمت منها حبيت أشارككم بالخبره اللي أكتسبتها .. لأن ما ودي أحد ثاني يطيح بالأخطاء هذي

واللي ما يسوي شيء ولا يجرب ولا يعتمد على نفسه = ما يخطئ .. ولكن ما يكسب خبره

واللي يجرب ويحاول يتعلم ويعتمد على نفسه = يخطئ في البدايه .. ولكن يتعلم ويكتسب خبره ويتفادى الأخطاء هذي في المستقبل وفي سيارته الجديده

ومافيه أحد ينولد عالم وخبير وميكانيكي والخ ... لكن الإنسان يتعلم مع الوقت من التجارب والإنترنت والخ ...

وأنا بطبعي أحب أشتغل بنفسي لأن بعض العمال ( ما عندك أحد .. ما يدرون وش السالفه ويتعلمون على سيارات خلق الله ) وشغلهم مش حالك

أو على الأقل أكون أشرف عليهم يعني أشوفهم وهم يشتغلون وأتاكد من شغلهم .. لأني أحب يكون الشغل نظيف واحترافي


المهم


خطأي الأول ( خطير و قديم وقبل سنوات طويله )

تغيير ماء الراديتر بنفسي أول مره .. والنتيجه الحراره على H وفوقها بعد
والمشكله رحت عليها لأكثر مشوار ولا كنت منتبه لأمبير الحراره .. والحمد لله المكينه ما خبطت ( وهذا يدل على جودة الهوندا )

القصة بالتفصيل :

نويت أغير ماء الراديتر ( فقط مجرد وسوسه وصيانة دوريه .. يعني لا تحسبون غيرت الماء عشان الحراره )
شريت علب ماء مقطر وماء راديتر
وقفت السياره وخليتها تبرد
سميت بالله و فكيت غطاء الراديتر ثم فكيت صرة الراديتر وفرغت ماء الراديتر كله .. ثم صبيت علبة ماء مقطر عشان تطلع بعض الأوساخ والشوائب
وفكيت القربه ( الخزان الأحتياطي ) وغسلتها
ورجعت كل شيء مثل ما كان .. وكل شيء نظيف ومن أحلى ما يكون .. شغل روقان و إحترافي :d
عبيت الراديتر كله وعبيت القربه ( الخزان الإحتياطي ) إلى الـ MAX

شغلت ومشيت شفت الحراره أول شيء طبيعيه وعقب نسيت أشوف الحراره ورحت لأكثر من مشوار بدون ما أشوف أمبير الحراره
لأني كنت واثق لأني عبيت الماء إلى الـ MAX

وفجأة وأنا أتمشي طاحت عيني على أمبير الحراره أنفجعت .. الحرارة على الـ H وتوي أنتبه لها

سبب إرتفاع الحرارة = الماء كان ناااااااااااااااقص جدا جدا .. بعد ما أرتفعت الحراره وأخذتها للبيت وخليتها تبرد .. فتحت غطاء الراديتر مافيه ماء !! والقربه فاضيه
طبعا تغيير ماء الراديتر يحتاج خبره .. انا كنت عليمي وتوي صغير

وأنخدعت بماء الراديتر .. أحسبه فقط تفريغ وتعبي إلى الـ MAX .. ولكن صار يحتاج خبره وتشغل السياره وتعبي كل ما نقص ماء الراديتر


وعقبها .. صار عندي عقده من شيء أسمه تغيير ماء رديتر

وبصراحه صرت أشيل هم عند تغيير ماء الراديتر .. فيه مثل يقول ( مو كل مرة تسلم الجرة )

يعني هالمره ما خبطت المكينه بسبب الحرارة العالية جدا ونقص الماء الراديتر بشكل كبير جدا .. اخاف المره الثانيه تخبط


على العموم .. هذي الطريقه الصحيحه ( من كتالوج أكورد موديل 2006 )

صورتها من الكتالوج أسهل من كتابتها .. وأوضح وأفضل














والأخطاء الثانيه بذكرها بموضوع ثاني ( عشان ترتاحون من القراءة وانا ارتاح من الكتابه )

المواضيع الجايه ان شاء الله راح تكون عن ( زيت الدركسون والتهريب + تغيير زيت الكلتش + شمعات نور أقوى من الوكاله + إهمال بطانة الرفرف المكسوره + والخ...)

لأني أحس الموضوع صار طويل جدا .. وباقي أخطاء كثيره