السلام عليكم يا جماعة الخير
أنا متابع جيد للموقع من زمان و الموقع أكتر من ممتاز
يمكن مش بشارك كتير بس إستفدت كتير من الأخبار و النصائح اللي في الموقع
النهاردة انا عندي موضوع و أتمنى من أهل الخبرة يفيدوني فيه
أنا عندي أكورد 2009 2.4 و ماشي بيها لغاية دلوقتي حوالي 92000 كيلو
فضلت أودي السيارة للصيانة داخل الوكالة لغاية ما عدت ال40000 و بعدين إستحرمت الفلوس إللي بياخدوا
يعني يعمل صيانة للسيارة يغير زيت و فلتر و يشيك على كام شغلة تانية ويقولي 600 درهم في حين أنا ممكن أسويها بره ب150 درهم
المهم عشان مطولش عليكم أنا عايز أعرف دلوقتي أنا إيه المطلوب من لإني بدأت أحس إن السيارة فيها أكتر من صوت و حاجات مش زي الأول
مثلا فيه صوت غريب بيطلع من الموتور وانا ماشي على الخفيف يشبه صوت الفحيح المعدني على يعني و انا طالع المواقف مثلا في البناية بسمع صوت الموتور عادي و بسمع معاه صوت خفيف لبحة معدنية ؟؟؟ مش عارف إيه سببها و إيه حلها
كمان مثلا لما أقف بالسيارة فترة و حاطط على الn و مشغل التكييف .... كل ما مروحة المكيف تشتغل أسمع رجرجة و يعلى صوت الموتور فهل ده طبيعي ؟
كمان مثلا فيه صوت طقطة بتطلع من العجلة اليسار و على ما أعتقد الأمامي .... الغريب إن صوت الطقطة ده مش بيطلع إلا و أنا بلف دوار أو دوران ما و الصوت يشبه كتير صوت الكبالن لما تكون خربانة في السيارات القديمة لكن مكتوم شوية ... فما حل الصوت ده؟
كمان المشكلة الأساسية عندي إن كل ما أسأل حد من الشباب يقولي إنه بيغير تيل الفرامل ( السفايف ) كل 30000 أو 40000 كيلو ... الغريب إن أنا سيارتي لما وصلت مثلا 60000 كنت وقتها مغير السفايف أكتر من 3 مرات ... و أخر مرة وقتها قالولي الdrums اللي أحنا بنسميها الطنابير قالولي لازم تتخرط عشان مشرطة و خرطها و غيرت السفايف و زودت زيت الفرامل بس برضه نفس المشكلة بعد 10000 كيلو تقريبا غيرت السفايف تاني .. و دلوقتي محتاجة تتغير تاني فإيه المشكلة و هل ده طبيعي لإن يمكن بسوق بسرعة شوية و أفرمل كتير بس مش قوي و الله... إيه الحل ؟
كمان عندي مشكلة في المرايات الكهربائية .... حصلت المشكلة ديه مع المراية الشمال مرة و بعدين ظبطت و مع المراية اليمين دلوقتي . المشكلة إن لما أشغل السيارة ألاقي المراية فتحت و تتخطى الحد الطبيعي و توصل لدرجة إنها تقلب عكس خالص و تبقى موجهة للخارج تماما ... و أضطر أقف و أفضل أعدل فيه يدوي لغاية ما تثبت و لو الشاب إللي بيغسل العربية قفلها تاني و هوه بينضف ترجع تاني نفس المشكلة ؟؟؟ فهل فيه حل لده ؟؟؟
وعندي أكتر من مشكلة تانية بس مش عايز أكتر عليكم أكتر من كده
بس أنا عايز حد يساعدني و يقولي لو فيه حل للمشاكل ديه
كمان هكون شاكر قوي لو حد فادني في اللي جاي :
أنا مغيرتش بوجيهات قبل كده ( اعتقد بتسموها الشمعات ) هل لازم تتغير عند ال100000 ؟؟
أنا مغيرتش فلاتر (بنزين . موتور . تكييف ) قبل كده هل لازم تتغير عند ال100000 ؟؟
أنا مغيرتش زيوت ( جير . باور . فرامل ) قبل كده هل لازم تتغير عند ال100000 ؟
أتمنى مكونش ضيف تقيل و أتمنى تساعدوني و يجازيكم الله خير
و مشكورين مقدما
رد مع اقتباس
مواقع النشر (المفضلة)