السلام عليكم ورحمة الله وبركاته

صباح الخير لجميع أعضاء المنتدى

( أعلم بإنه موضوعي طويل جدا ولكن أتمنى اللي يقرؤه , يقرؤه للنهاية وأكون شاكر له )

طبعا أنا متابع لمنتداكم من ثمانية شهور , يعني بالتحديد من يوم شريت سيارة الأكورد موديل 2012

ولكن اليوم حبيت أسجل بالمنتدى وأطرح لكم مشكلتي , وأتمنى من رب العالمين ألقى عندكم أصحاب خبرة بالسيارة ويقدمون لي مساعدة لأني أخاف أغامر بشي معين وفي النهاية أطلع أنا الخسران

أنا من أربع شهور تقريبا كنت أحس برجة في السيارة من بعد سرعة 120 وطبعا رحت سويت ترصيص ( عادي ) عند أحد المحلات التابعة لوكالة الميشلان في الغرابي , وبالفعل طلعت من عندهم مباشرة وسقت على سرعة 150 فما فوق , وماشاء الله تبارك الله السيارة رجعت مثل ما كانت في الوكالة .

ولكن للأسف شهرين ورجعت لي الرجة مرة ثانية , ورحت للمحل مرة ثانية علشان يسويلي ترصيص من جديد وهنا أشارو علي بإنه أسوي ترصيص أرضي للسيارة وتاخذ عليه ضمان شهر وترتاح عليه أكثر من الترصيص العادي وأرسلوني لأحد المحلات المجاورة لهم , وبالفعل رحت سويت ترصيص أرضي وطلعت من عندهم ولكن للأسف السيارة تحسها مش طبيعية من تحت , ورجعت لهم بعد أسبوع مرة ثانية وقلت لهم بإنه الوضع مثل ماهو ما تغير , وسوولي ترصيص من جديد وطلعت بالسيارة ولكن للأسف الوضع ما تغير كمان ومن أسوأ لأسوأ , وهنا قالولي إحتمال كبير تكون الكفرات فيها مشكلة .

المهم رجعت للمحل التابع لوكالة ميشلان وشرحت له الوضع وقال لي على كذا لازم تروح لوكالة هوندا وتخليهم يشيكون على السيارة من تحت بالكامل , وبالفعل رحت لهم وفحصو السيارة من الأمام والخلف , وطبعا قالولي السيارة سليمة وما فيها شي والحمدلله , وفي شخص بالوكالة قال لي لو تغير الكفرات بتنحل المشكلة , وأنا بكل أمانة مستغرب شي وهو السيارة لها ثمانية شهور ومامشيت عليها إلا 16000 كيلو ( ستة عشر ألف كيلو ) , مو معقولة تخرب الكفرات بهالسرعة لأنه ممشاي دوام وبيت , يعني مافي لا بر ولا سفر .

وطبعا رحت أمس للغرابي وسألت كثير محلات ويوم أشرح لهم الوضع , الكل يقول لي إما الكفرات كان تخزينها سيء وخربت أو انقطعت الأسلاك داخل الكفر ولازم تركب كفرات جديدة أو الأذرع مش موزونة أو رمان الكفرات فيه مشكلة أو أو أو ... إلخ . وبصراحة أنا إحترت وما أبغى أغير كفرات وفي النهاية تكون المشكلة مش كفرات .

علما بإنه أنا ما أحس برجة بدركسيون السيارة بشكل كبير بالعكس رجة خفيفة , ولكن أحس السيارة من تحت وكأنه الكفرات مفكوكة وقاعدة ترج أو تهتز أو تحس الكفرات في أحد يضرب فيها وأحس الضرب من أسفل رجولي , يعني باختصار من الصعب أوصل لكم الحالة ؟

لذلك أتمنى من رب العالمين إنكم تشورون علي بالحل المناسب , ولكم مني دعواتي في كل صلاة .

أعتذر مرة ثانية على طول الموضوع لكن حبيت أشرح لكم بالتفصيل الحاصل معاي .