الموضوع: أتمنى مساعدتكم يا أعضاء المنتدى برجة أسفل السيارة

السلام عليكم ورحمة الله وبركاته /

شكرا شكرا شكرا ومن أعماق قلبي لكل شخص رد علي بهالموضوع وحاول يساعدني .

أخوي ( أكورد سبورت )

اليوم رحت لمركز القحطاني اللي قلت لي عليه , وما شاء الله تبارك الله , المركز كبير ومحترم ومن أجمل ما يكون واستقبالهم ممتاز لأبعد حد وتحس الفلبينيين فهمانين

لما دخلت قابلت مديرهم الهندي , وقلت له على مشكلتي وأول ماعرف بإنه السيارة جديدة فقال لي من الصعب بإنه يكون الأذرعة فيها شي ولذلك ما أنصحك تسوي فيها أي شي لا وزن ولا ميزان يدوي ولا إلكتروني أبد سواء عندنا أو عند غيرنا , ولكن أنا متأكد بإنه كفرات سيارتك هي أساس المشكلة ويوم شافني موسوس ( أعوذ بالله من الوسوسة ) قام وطلب من الفلبينيين بإنهم يشيكون على السيارة حتى أنا أطمئن من الداخل , وطبعا يوم فكو الكفرات وفحصوها طلعت الكفرات يا صديقي وكأنها منتهية من 5 سنوات وجالسة تدور بشكل غير طبيعي حتى إنه الفلبيني قالي ( مدير كيف أنت إمشي سوا هدا كفر , هدا كفر ما في دور كويس ممكن بعدين مشكلة على طول , هدا سيارة جديد شوف كفر جديد لازم تغيير على طول ) وبالفعل حبيت أشوف لفة الكفرات وهي على الجهاز وبكل أمانة من سوء لفة الكفرات , كنت حاب أروح وكالة هوندا لأنها جنب المركز وأمسح بكرامتهم الأرض بسبب تخزينهم السيء لأنه حرام 16000 كيلو ماشية السيارة والكفرات معدومة وخصوصا مافي مكان أروحله إلا ويقولون بإنه شركة عبدالله هاشم هي أسوأ وكالة في تخزين كفرات سياراتها بسبب مشاكل الرجات . وفي فلبيني ثاني متخصص بالأذرعة وها الفلبيني أول ما شاف السيارة قالي الأكورد نظامها ما فيه مسامير توازن والرجة الحاصلة ما راح تكون من الأذرعة وكان صادق معي ووضحلي بإنه لا ألعب بالسيارة ولا أوزن ولا أسحب ولا هم يحزنون بحكم إنه السيارة جديدة ( وبكل أمانة ما استفسرت منه عن علاقة مسامير التوازن والأذرعة والرجة لأنه أكثر شي أكرهه بالسيارة هو مسامير التوازن بسبب سيارتي اللومينا السابقة وخصوصا إني كل شهر كنت أغير مسامير توازن من كثر ما كانت تتكسر وأغيرها ) , والحمدلله طلعت من عندهم وأنا مرتاح بعد ما عرفت بإنه المشكلة كفرات فقط . وشكرا لك من كل قلبي لأنك دليتني على ها المركز .

أخواني ( القايلة والمسافر وتعلمت ) / طلع توقعكم صحيح والكفرات طلعت معيدة ومنتهية وما منها فايدة , فياريت تدلوني على نوعية كفرات ممتازة وبصراحة أنا محتار ما بين الميشلان وقساوتها وما بين الهانكوك ونعومتها , مع العلم بإنه الميشلان تعمر وتخدم أكثر ولكن مع الأكورد الميشلان تتحول من كفرات إلى معزوفة موسيقية مزعجة جدا , ولكن في ناس تقول لي في نوعية ميشلان ناعمة وما أدري مدى صحة هالكلام ؟

أعتذر جدا على الإطالة بالرد وأنتظر ردكم ورد الجميع ولكم مني كل الشكر .