السلام عليكم ورحمة الله وبركاته

انا بدخل بالموضوع على طول وما راح أكتب مقدمات طويله عشان ما أضيع وقتكم ووقتي

لاشك أن كل واحد مننا يحاول أن يحافظ على سيارته ويطيل من عمرها قدر الإمكان ويحاول ان يكون أدائها أعلى ما يمكن قدر الإمكان مع أقل إستهلاك ممكن للوقود

المهم :

1) أول ما تشتري سيارتك شّيك على ضغط هواء الكفرات ونزلها إلى الضغط المناسب ( تلقى ورقه أو حديده .. بعد ما تفتح باب السواق بتلقى حديدتين أو لصقتين .. وحده منها يكون مكتوب فيها الضغط المناسب للكفرات ومقاس الكفرات والخ... والثانيه يكون مكتوب عليها وين مصنوعه السياره ورقم البويه والخ... )

 لأنهم يخلون ضغط هواء الكفرات عالي عشان التخزين والخ...

واذا سقت سيارتك وضغط الكفرات عالي .. على حفر ومطبات قويه ممكن تأثر على بعض الأشياء وتضرها

برأيي أن 30 يعتبر مناسب .. وحاول تتجنب الحفر والمطبات اذا تقدر


2) دائما لا تدق سلف وتمشي على طول .. سخّن سيارتك

وإذا كنت مستعجل جدا .. سخن سيارتك شوي إلى أن ينخفض الـ RPM شوي ؛ ثم سق سيارتك ببطئ وبهدوء إلى أن تصل حرارتها الطبيعيه


3) مدة تمرين السياره الجديده 1000 كيلو والبعض يقول 1600 كيلو ( بكتالوج سيارتي 2006 مكتوب 1000 كيلو ) .

Break-in Period = فترة تمرين أو تليين المحرك

* تجنب المقاومات والدعس المفاجئ خل سواقتك هادئه .
* لا تغير زيت مكينه السياره الجديده إلا حسب المسافه الموصى بها بكتالوج السياره ( في 5000 كم الأولى )
* تجنب إستخدام الفرامل بعنف ( لأن الفحمات الجديده تحتاج تليين وتمرين خلال الـ 300 كيلو الأولى بالإستخدام المعتدل )
^ هذي هي الأشياء المذكوره بكتالوج سيارتي الأكورد 2006 اللي مكتوب جنبها *


4) في التغييره الأولى للزيت ( أول 5000 كيلو ) أنصح وبشدة تغيير فلتر الزيت .. عشان الرايش ( برادة الحديد ) الناتجه عن تمرين المكينه الجديده

+ لا تستخدم 20W50 في السيارات الجديده ( ثقيل جدا ويقلل العزم شوي + ما يتوزع بسرعه على المكينه أثناء بداية تشغيل السياره وهي بارده + يزيد صرفية البنزين بنسبة بسييييطه مقارنة بالزيوت الخفيفه )

5) إستخدم بنزين برقم أوكتان مناسب ( اذا مكتوب بكتالوج سيارتك إستخدم 95 نصيحه لا تستخدم 91 )

أنا مكتوب بكتالوج سيارتي أن البنزين المناسب أوكتان 91 ( حد أدنى ) .. يعني اتوقع اذا استخدمت 95 يعتبر أفضل .. وأنا أستخدم بنزين 95 في سيارتي

6) خذ كرتون زيت تخليقي fully synthetic اصلي بالجمله 5W30 أو 5W40 من محل جمله معروف ومعتمد < أرخص من البناشر بكثيييييييير

وخذ سيفون أصلي من الوكاله بـ 19.20 ريال

وغيّر الزيت عند بنشر كويس وتحس ان نفسه طيبه

شغل يد تغيير زيت فقط ( بدون تغيير سيفون ) 10 ريال
شغل يد تغيير زيت ( مع تغيير سيفون ) 15 ريال

وغيّر الزيت التخليقي بالكامل .. كل 7500 أو 8000 كيلو ( للإحتياط )
مع فحص مستوى الزيت كل 1000 كيلو وتعويض النقص إن وجد


# عب الزيت حسب الكميه الموصى بها بكتالوج السياره ؛ ولا يزيد عن الـ MAX

# اذا شفت براز طيور أو الخ... ( الله يكرمكم ) على بوية سيارتك .. أمسحه بأسرع ما يمكن ؛ لأنه مع الوقت يضر البويه

# انصح الجميع بقراءة كاتلوجات سياراتهم .. لأن فيه معلومات مهمه جدا + جدول صيانه + الكميه المناسبه للزيوت والسوائل

# لا تغير ماء الراديتر إلا حسب المسافه الموصى بها بكتالوج السياره + اذا نقص زده ماء مقطر ...( لأن اللي يجي بالسياره من المصنع عمره طويل و أفضل بكثير من ماء الراديتر الموجود بالسعودية والوكاله ) .

# الأكورد 2013 صار دركسونها كهرب ؛ وإلا كان قلت لكم لا تستخدمون إلا زيت دركسون هوندا .


مواضيع أخرى مفيده :

ارشادات عن كيفية استخدام السيارات والمحافظه عليها - حسن كتبي

زيت هوندا الجديد 5w30 ؛ سعره 40 ريال ؛ لكن فيه بدائل بـ 25 ريال


إن أصبت فمن الله وإن أخطأت فمن نفسي والشيطان


أتمنى أني أفدتكم .. ولا تحرموني من دعائكم

ملاحظه :

لن أسامح ولن أبيح من ينقل موضوعي بدون ذكر المصدر ( THE SILVER ACCORD - محبي هوندا )

لأن للأسف فيه ناس من ( خارج المنتدى ) يسرقون المواضيع ( نسخ - لصق ) وينسبونها لأنفسهم في منتديات أخرى مع أنهم ما تعبوا على المواضيع ولا شيء