تقرير عن شرائ وصيانة اكورد 2008 v6 وخااااااب الظن ياهوندا

**dentist m** · 21-05-2013, 12:14 AM

بسم الله الرحمن الرحيم

هذي اول مشاركه لي في المنتدى وبصراحه من الحره الي بقلبي قلت اكتبلكم وش الي صار معي تستفيدون

المهم

شريت اكورد 2008 V6 فل الفل خليجي
الموتر ماشي 73000

ماني متكلم عن الخرابات الي لقيتها بالسياره لانها مستخدمه وشي طبيعي يكون يبيلها صيانه بس راح اتكلم عن صيانتها

اول شي سعر كراسي المكينه والقير ماهي خربانه عندي بس سألت عليها وليتني ماسألت والسعر 5550 من خارج الوكاله من محل النعماني مع خصم 25%
لييييييييييييييييييييييييييه ياهوندا ليييييييييييه معي بي ام ولا مرسدس ولا ايش؟

ثانيا سياره ماشيه 73000 وعلبة الدركسون فيها بداية خراب وتنديه في الدوده؟؟؟؟؟؟؟؟
بصراحه نظام الدركسون كله من الطاره للدوده للطرنبه للعلبه في الاكورد فاشل بكل ماتعنيه الكلمه وفي قمة الفشل لدرجة ان دركسون النترا 2011 الشكل القديم والله ثم والله افضل منه بمراحل وسنوات ضوئيه
لاني كنت امتلك النترا 2011 وبعتها وشريت الاكورد

برضو مااااااااااعلينا

الي بعده العزل الصوتي في الاكورد ان جيت اتكلم على العزل الارضي فهو يتقارن بالاكسنت وبدون زعل ياشباب والله اني اتكلم من تجربه والله انه سيء لابعد الحدود
اما العزل من البيبان او مثل مايسمونه تنسيم ارجع واعيد واقول الالنترا الي كانت معي افضل من الاكورد 70% من هالناحيه

اليايات وماادراك ماليايات
على المطبات العريضه ماعليها كلام بس على الحفر والمطبات الصغيره يااااااابسه

العزم: بالنسبه لسياره سيدان بمكينه 6 سلندر 3.5 اعذروني مستوى جيد لااكثر لايعتبر لا ممتاز ولا حتى جيد جدا
السيارات الي جربتها سته سلندر من فئتها مكسيما 2006 (( ميتسوبيشي ماجنا 2004 فديت هالموتر عشره على عشره بدون منافسه ))

والحق ينقال ياشباب تقييمي للسياره كفخامه ورساوه ممتاز وروعه وكنت محتار بينها وبين السوناتا 2011 والحمدلله اني خذيت اكورد لان السوناتا مقارنه بسواقتها وركبتها مش ولابد ولكن لايتضمن هالكلام العيوب الي ذكرتها

لكن كتقييم بشكل عام وعلى ماكنت اسمع من مدح في سيارات الهوندا والاكورد خاصه للاسف ثم للاسف ثم للاسف مافيها غير شكل وفخامه ورساوه

لكن الباقي اعطيها نجمتين من خمسه يعني لاترفعو الاكورد للسما والله ماهي قد المدح مع اني ماخذ V6

في النهايه السياره يميزها رساوه وفخامه لااكثر مثل ماقلت وتستاهل نجمتين من خمسه والسبب عيوبها الكثيره من دركسون وتنسيم وعزل ارضي وعزل صوتي وغلااااااااااااااء قطعها بشكل فوق خيالي
واسف على الاطاله ودمتم سالمين

**THE SILVER ACCORD** · 21-05-2013, 04:03 AM

وعليكم السلام ورحمة الله وبركاته

الله يعطيك خيرها ويكفيك شرها

يا حبيبي أي سياره مستعمله طبيعي تحتاج صيانه بسيطه ناتجه عن سوء الإستخدام+ تصفيه ( فلتر هواء + فلتر بنزين + بواجي + تغيير زيت مكينه و سيفون + تغيير زيت القير مع الفلتر الخارجي ) لراحة البال وعشان تضمن أنك تحصل على أفضل عزم ونعومة ؛ صيانه وقائيه وعشان تعرف وش الأشياء اللي غيرتها واللي ما غيرتها

مع فحص ووزن ضغط هواء الكفرات على 30

كل السيارات و ليست فقط سيارات هوندا

ويا أخي من قالك أن سعر كراسي المكينه والقير بـ 5550 ريال !!!! مستحيل مستحيل مستحيل تكون بالسعر هذا وأتحداك إذا كانت بالسعر هذا !!! والمحل هذا ما عنده ما عند جدتي :d

خذها قاعده دائما رح للوكاله وأسأل عن الأسعار بعد الخصم ؛ ثم رح لمحلات قطع الغيار أو التشاليح .. لأن الوكاله تكون أرخص منهم في بعض الأحيان

كراسي مكينة الأكورد الأصليه الوكاله تقريبا بـ 1500 ريال وكراسي القير الأصليه رخيصه
وبعد كراسي مكينة الهوندا .. فيها ميزه مثل الهدروليك فيها زيت والخ... عشان تقلل الأهتزاز لأقصى حد ممكن

وأنصحك تروح لوكالة هوندا وتسألهم عن الأسعار تطلب منهم خصم 20%

نجي الحين للدركسون والدوده .. اذا أنت أو راعي سيارتك الأول ( يستخدم زيت أحمر حق القير الأوتوماتيك في الدركسون .. فالمشكله منكم وليست من دركسون الهوندا ) دركسون الهوندا له زيت خاص ولونه ذهبي وثقيل .. و يباع بالوكاله على شكل علب .. العلبه الواحده سعتها 1 لتر بـ 50 أو 45 ريال ( يجيبونه من خارج السعوديه وجودته ممتازه )

وأنا كنت أستخدم زيت أحمر حق القير الأوتوماتيك ( أبو 5 ريال أردى نوع ) في الدركسون ... وبالنهايه صار عندي تهريب و خربت الدوده والطرمبه

وغيرتها من التشليح ( دوده نظيفه + طرمبه نظيفه + شغل يد الورشه + عمولة اللي قعد يدور لي قطع بالتشاليح = كلها بـ 2500 ريال )
لأنها الدوده والطرمبه كانت غير قابله للتصليح بسبب إهمالي لها ( تهريب + زيت أبو 5 ريال أردى نوع )

المهم غيرت الطرمبه والدوده وعبيت زيت دركسون أصلي وكاله .. والحمد لله ما عندي مشاكل ( السالفه هذي قديمه قبل سنوات )

لكن مشكلة الناس :
1) يعبون زيت أحمر حق القير الأوتوماتيك في الدركسون ( غير مناسب للدركسون ) .
2) يزيدون الزيت فوق الحد المناسب .

الحد المناسب يكون بين الـ LOW والـ MAX .. يعني بالوسط والسياره بارده وعلى أرض مستويه
لأنها اذا كانت حاره وبعد كم مشوار الزيت يتمدد شوي ويزيد شوي
وإذا كانت على أرض مايله .. الزيت راح يكون مائل بعلبة زيت الدركسون ( ما يعطيك قراءه صحيحه .. يعني مع جهه يعطيك انه ناقص .. والجهه الثانيه بالنص أو فل )

وبالنسبه للتنديه اذا ما عندك تهريب لا تشيل هم أبد لكن شيك على الزيت كل فتره وفتره لا ينقص ؛ أخوي معه لاندكروزر وفيه تنديه زيت دركسون ولا عنده مشاكل .. أهم شيء شيك على الزيت كل فتره وفتره

أما بالنسبه للعزل .. معليش أسمحلي الأكورد أفضل من الأكسنت و الإلنترا وطقتها .. يمكن سيارتك فيها مشكله ( شيّك على ربلات القزاز والبيبان والخ... )
وترى كفرات الأكورد اللي تجي من المصنع قاسيه و صوتها مزعج لكنها تتحمل الكرف

أما بالنسبه للمطبات .. شيك على هواء كفراتك وخلها على 30 أو 28
واذا جيت تغير الكفرات ؛ ركب هانكوك كوري لأنها لينه ومريحه وخل ضغط هواء الكفرات على 30 أو 28 .. مع ترصيص لاصق

فيه كفرات صامته من شركة بريجستون ؛ لكن مشكلتها غاليه شوي .. وبعض الناس يقولون قاسيه

أنت ظلمت الأكورد
رساوه إبداع وفخامه و صبوره وتتحمل الكرف + مواصفات السلامه والأمان فيها ممتازه

وبالنسبة للعزم والقوة :

1) غير زيت المكينه وعب زيت بترومين أو موتوركرافت 10W30 وغيّر الزيت كل 5 آلاف كيلو + سيفون " فلتر زيت " أصلي من الوكاله بعد الخصم بـ 19.20 ريال
2) عب بنزين 95
3) حاول تمسك بها خط عشان تنظفها من الكربون ؛ ومرّن سيارتك

معقوله موديل 2008 وماشيه بس 73 ألف كيلو والسياره لها 5 سنوات !
الله يستر لا يكون ملعوب بعدادها من الشريطيه والنصابين حسبي الله عليهم

مكينة الأكورد السته سلندر V6 من 2008 وفوق .. تغيرت مكينتها وصارت بسعة 3.5 وصار فيها تقنية هوندا VCM و غيرو البواجي من البواجي العاديه والرخيصه اللي تتغير كل 40 ألف تقريبا إلى البواجي الغاليه الأريديوم واللي تدوم لمده أطول 80 أو 100 ألف كيلو تقريبا

الهدف الوحيد من تقنية VCM .. تقليل إستهلاك البنزين لأقصى حد ممكن

السلندرات تشتغل كلها عند :
1) بداية التشغيل
2) عند الحاجه لعزم وقوه إضافيه
3) التسارع و المقاومات

3 سلندرات تشتغل :
1) اذا كان الحمل على المحرك قليل ومنخفض .. يعني مثلا تتمشى بسرعه منخفضه أو متوسطه

4 سلندرات تشتغل :
1) اذا احتجت تزيد سرعتك شوي وأنت تتمشى
2) اذا كنت تتمشى بسرعه عاليه

فيديوهات للتوضيح
أضغط هنا

**dentist m** · 21-05-2013, 10:46 AM

صباحك ورد اخوي
يعطيك العافيه عالرد السريع للموضوع وتفصيلك الاكثر من رائع

لكن انا الحين اعتبر مالك للاكورد والمفروض اني مااعيب فيها بس كل الي ذكرته عن تجربه شخصيه ومقارنه بتجربه بعد يعني صدقني ماظلمت احد

وبالنسبه للي قلته كله انا سويته غيرت الزيوت المكينه والقير اما الفلتر الخارجي رحت للوكاله وسألتهم على فلتر القير الخارجي قالو مافي خارجي مانغيره وهذا كلام الوكاااااااااااله وبالنسبه لسعر الكراسي هذا كلام محل النعماني وقال لي انا ماعندي بس بسحبها لك من الوكاله على الكراسي طبعا وعطاني التسعيره وقال روح الوكاله وانا برسل لك واحد يروح معك ويسحبها لك قدامك بخصم 25%

والسعر كان 5550 وشييكت على اسعارها في النت من مواقع WWW.1HONDAPARTS.COM وطلعت ب 3000 تقريبا
والموقع الثاني www.hondapartscheap.com وطلعت ب 2900 وكسور
الاسعار بدون شحن فقط تكلفة القطع فقط

وهذا ان دل على شيء فا راح يكون ان الاسعار الي لقيتها صحيحه الي هي 5550

وبالنسبه للكفرات راكبه عليها كفرات تويو يابانيه والي اعرفه عن تويو انها كفرات ناعمه ان ماكانت غلطان

زيت قير زيت مكينه فلتر هواء ضغط كفرات موية رديتر زيت دركسون كل هذا سويته بس عشان اكون صريح معك انا مادري وش الزيت الي كان يعبيه هو بس كل فتره وفتره اشييك ولله الحمد مافي نقص لكن عشان اتأكد اكثر بروح اشتري الزيت الي قلت عليه وانقص من العلبه وازيد بالزيت الجديد

لكن عشان نكون صريحين الاغلب يشتكي من الدركسون في الهوندا حتى اصحاب الورش نفسهم يعترفون بهالشي في الاكورد

والعزل الارضي هذا معروف في الاكورد انه مش ولابد لاني قريت كثير ولقيت ناس تشتكي من نفس هالمشكله وبدليل ان البعض لقو حلول منها عزل من شركه ماافتكر وش اسمها تقريبا جوشيلد او شي زي كذا

وجزاك الله خير ووفقك بأذن الله وانا راح اكمل صيانه بأذن الله لحد مااشوف فرق واضح او الله لايقولها ببيع السياره

اللهم اني وكلتك امري فكن لي خير وكيل ودبر لي امري فإني لااحسن التدبير

**ABODYYIC** · 21-05-2013, 11:57 AM

السلام عليكم جميعا,,,,,,

انا سيارتي اكورد 2008 سته سلندر مخمل مشتريها وكاله وانا الوحيد الي اسوقها وسواقتي هاديه جدا وحريص جدا في كل شي ومع هذا كله يعني حرص ووجع راس علية الدركسون بدات عند تقريبا 70 الف فيها ثقل لما اجي اوقف يعني الف يمين للاخر ثم يسار تقول دركسيون تريله بدون هيدرولك بس تمام انها ماتهرب وزيتها مستواه ميه ميه هذي اول مشكله

غيرت جوزات مقصات امامي يمين ويسار كلفتني في الوكاله 1600 قطع وشغل يد طبعا غاليه جدا جدا اجل لو مو محافظ على السياره وش بيصير فيها.

التكييف مرات ومرات في خط يفقد برودته ولازم اعلي اعلى درجه عشان يبرد مرات مو دايم

نجي للعزل بصراحه مافي عزل لا ارضي والا ابواب والا اي شي والله حرام سياره فعلا بس شكل والي يقول سيراتي فيها مشكله او يقول روح شيك والا اي كلام ثاني ترا اسمحلي هيا السياره كذا العزل فيها صفر على الشمال بالنسبه لسياره قيمتها فوق 100 الف .

بس ما ادري ليه احبها بسبب شكلها رسمي وذوق وتحس ليها هيبه في الشارع واقفه او ماشيه طبعا رساوتها خياليه بس لو كان خلوها انعم شوي مع المطبات

المهم انا عن نفسي احب الاكورد بالذات 2008 سته سلندر ولون سيارتي فيراني

واخيرا بعت سيارتي من تقريبا شهرين بسبب ظروف بس لازلت احبها وندمت حبتين على البيعه بس الله يبارك لصاحبها وايضا جابت لي سعر طيب وكمان قلت افتك من وكيلها وخدمته السيئه وغلاء قطع غيارها.

وسلامتكم,,,,,,,,,,,,,,,,,,,,,,,,,

**THE SILVER ACCORD** · 21-05-2013, 02:29 PM

صباح النور

الله يعافيك

اسف ومعليش على أسلوبي في ردي السابق ؛ بصراحه ما توقعت سعرها غالي بهالشكل ( لأني خبرتي بالأربعه سلندر ومتعود على كراسي الأربعه سلندر )
لكن أقسم بالله نصدمت بعد ما دخلت مواقع قطع غيار هوندا الإنجليزيه
أعوذ بالله وش هالغلاء !

والله لو هي مرصعه بالألماس

رقم 6 كرسي مكينه سعره قبل الخصم $415.49 وبعد الخصم $299.15
رقم 8 كرسي مكينه جانبي سعره قبل الخصم $106.48 وبعد الخصم $76.67
رقم 9 كرسي مكينه سعره قبل الخصم $373.01 وبعد الخصم $268.57

رقم 11 كرسي قير سعره قبل الخصم $34.22 وبعد الخصم $24.64
رقم 12 كرسي قير سعره قبل الخصم $179.89 وبعد الخصم $129.52

http://www.hondapartsnow.com/Page_Pr...=true#partlist

مجموع سعر كراسي المكينه غير شامل تكلفة الشحن
قبل الخصم 894.98$ يعني 3356.5125 ريال
وبعد الخصم 644.39$ يعني 2416.4625 ريال

مجموع سعر كراسي القير غير شامل تكلفة الشحن
قبل الخصم 214.11$ يعني 802.9125 ريال
بعد الخصم 154.16$ يعني 578.1 ريال

مجموع سعر ( كراسي المكينه + كراسي القير ) غير شامل تكلفة الشحن

قبل الخصم 1109.09$ يعني 4159.0875 ريال
بعد الخصم 798.55$ يعني 2994.5625 ريال

سعر كراسي الـ V6 من موديل 2008 وفوق .. أعوذ بالله نااااااار
لكن كراسي مكينة الأربعه سلندر أرخص بكثييير وحتى قطع الغيار ارخص من الـ V6

اللي سيارته V6 موديل 2008 وفوق < الله يعينهم ؛ ويبي يغير الكراسي :

عنده ثلاث حلول :

1) تشليح
2) كراسي يابانيه أو تجاريه .. من محلات قطع غيار هوندا
3) طلبيه من الخارج

**أكــــــــــورد11** · 21-05-2013, 03:17 PM

وعليكم السلام ورحمة الله وبركاته:
اكورد 6سلندر تختلف عن محرك 4سلندر ببعض القطع:
1-المساعدات
2-كراسي القير والماكينه
3- تصميم المحرك والقير
بالنسبه للعزل انا لاحظت الابواب عندي معزوله وموديل سيارتي 2011
ممكن المشاكل من بدايه ظهور موديل 2008 وتلافوا المشكله فيما بعد فانصحكم تفحصوا الابواب لان اذكر احد الاعضاء ركب عازل للابواب وموديل سيارته 2008 وغير موجود العازل من الاساس

صوره محرك اكورد 4سلندر

القطعه رقم5و6و7 كراسي الماكينه مجموع السعر بدون شحن 751ريال بدون شحن
القطعه رقم 9و10 كراسي القير مجموع سعرهم 507ريال
المجموع 1258ريال بدون شحن
1272ريال مع الشحن
صوره باب الاكورد2011

**dentist m** · 21-05-2013, 03:21 PM

وعليكم السلام اخوي ABODYYIC

الله يرزقك اخوي بموتر احسن منه ويسعدك يارب نورت الموضوع يالغلى وشاكر لك تفاعلك
وعلى قولتك والله رغم كل هالمشاكل بس السياره لها هيبه خاصه بوقفتها او وهي ماشيه وتحس انك تسوق شي فخم
بس الشكوى لله مشاكلها واجد يعني بالعربي السياره مو على المدح الي نسمعه عنها

اخوي

THE SILVER ACCORD يسعد مساك

ولاتسويلي رسميات وتعتذر ومدري وش ترا عادي الموضوع والنقاش حبي وانا اخوك وانت ماغلطت ولا قلت شي غلط :d

بس الكراسي سعرها خيالي مثل ماقلت لك
وانا توني الحين جاي من ورشة الجنوب شريت زيت دركسون اصلي حق هوندا ب 40 ريال وخليتهم يفكون العلبه وينفخ اللي بالهوا عشان يطلع الزيت القديم كله وعبالي الزيت الجديد

لون الزيت الي طلع بني ماادري هل هو طبيعي ولا المستخدم الاول كان يعبي الزيت الاحمر الي قلت عليه انت

ماجربت الدركسون واجد ماغير كم لفه يمين وكم لفه يسار ومشوار الرجعه للبيت والنتيجه انه الدركسون مثل ماهو من ناحية الثقل بس قبل مااغير الزيت كانت احياااااااانا احيانا وانا واقف ولفيت يمين او يسار للاخير في اخر ربع لفه يصير الدركسون ثقيل كانه دركسون ددسن 82 واول ما ارفع رجلي وانت بكرامه من على الفرامل يفك الثقل ويرجع طبيعي اما الحين الحمدلله مافي الثقل هذا اختفى الى الان

اخوي

THE SILVER ACCORD مازلت مصمم العزل في الاكورد يتقارن بالاكسنت

:d:p

**سياسي** · 21-05-2013, 05:27 PM

الافضل تبيعها لان 5000 ريال على كراسي هذي كارثة وهي تعتبر من القطع الاستهلاكية

وبدال ما تدفع 5000 في تصليح اعتبرها قيمة الخسارة الي بتخسرها في البيعة

واذا تبي بدل راس براس مع اكسنت او النترا موجود الي بياخذها وبعيوبها ;)

**dentist m** · 22-05-2013, 12:48 AM

اخوي سياسي من ناحية البدل هذا موتري ابيعه احرقه ابادله بسيكل مو شغلك ;)

**S3ood5688** · 22-05-2013, 07:19 AM

سياسي وش تحس بووه
وش يبدل راس براس مع اكسنت .......،
شكلك ماتعرف شي عن الاكورد
كذا من راسك........

**..bison..** · 22-05-2013, 04:05 PM

الله يعطيك خيرها ويكفيك شرهاا ياعزيزي خلاص مدام اشتريتها توكل ع الله ولاتدقق كثيرر
انا مثلك بعت كامري كانت ع يدي وكاله واشتريت الاكورد عشان الكامري كان قير عايدي
شف اخذتهااا قبل ثلاث شهور موديل 2010 وكان الممشى 60 بس طلع نصاب الله لايوفقه العداد ملعوب فيه يعني ممكن عداد سيارتك متغير ولا شي
بس بيني وبيينك الشهاده لله مع انها مكروفه بس والله سياااره اول ما اشتريتها تندمت وقمت اوسوس وادقق بعيوب السياره بس بعدين فحصتها بالوكاله عشان ارتاح وغيرت لها قطع استهلاكيه
والحين ماشيه معي زي الحلاوه ماشاء الله

**م ج رد حلم** · 22-05-2013, 05:21 PM

مع احترامي الشديد لك رايح تسأل عن اشياء ماخربت وجاي تقول ليه وليه

اناا بايع الاكورد من 3 شهور السيارة جلست معي 4 سنوات ونص ومشيت عليها 150 الف ماعمرها طبت ورشة ولعلمك علبة الدركسون بدات بالتندية من 100 الف وسحبت عليها وبعتها بحالتها ومافيها اي مشكلة

وبعدين اي سيارة فيها عيوبب خصوصا هالفئة والاكورد عزلها الارضي دمااار وقاسية شويتين بس الحق يقال مميزاتها تغطي على عيوبها

وعيوبها تعتبر قليلة مقارنة بالمنافسين

وصدقني لو فكرت اطلع سيارة من هالفئة راح تكون الاكورد اول خياراتي لانها تستااااهل

**مـــيـــدو** · 23-05-2013, 11:59 AM

السلام عليكم و رحمة الله و بركاته

كثرت مشاكل الأكورد في الآونة الأخيرة

انا مخطط على أكورد 2013 سبورت

ان شاء الله يعدلوا العيوب اللي في الموديلات السابقة

او انتظر 2014 ولا اشوف الأفالون

**FiReFiGhTeR** · 24-05-2013, 03:32 PM

عليكم ورحمة الله وبركاته

اخوي صاحب الموضوع ..

انا اتفق معك في الاتي..
1- التهريب من طرمبة الدركسون بدا من ال100 الف والتهريب قليل جدا جدا .
2- العزل انا اتفق معك جمله وتفصيلا و لكن ليست سيئه لدرجة ان تقارن بالاكسنت او الالنترا ( ربما هناك مشكله من المستخدم الاول)
عن نفسي سيارتي 2010 v6 ماشيه الحين 152 الف تقريبا للامانه ما حطيت فيها اي قطعه الا القطع الاستهلاكيه فقط لا غير بالرغم ان استخدامي لها جاف نوعا ما ..

وللامانه ما ندمت اني في يوم من الايام شريت سياره مثل هوندا..

امان - رساوه - جودة

والله يبارك لك في سيارتك يا رب ...

**dentist m** · 27-05-2013, 04:16 PM

يعطيكم العافيه جميعا على التفاعل مع الموضوع
اخوي fire
اناقارنتها بسيارتي الاولى النترا 2011 من ناحية العزل والله ثموالله ان الالنترا. افضل من الاكور في العزل
عموما شكله العداد ملعوب فيه على قولة اخونا bison بس مااقول غير حسبي الله ونعم الوكيل
الي قاهرني اني مدخلها الوكاله لان في صوت يطلع عندي على60 وعلى 80 اول مايشتغل نظام توفير الوقود واكون داعس دعسه خفييييفه يطلع صوت مزعج ولا عرفو من ايش ماغير دفعت 3000 تغيير سيور عالفاضي
والمكيف فيه صوت وقالو طبيعي
فما ادري هل الصوت الي يطلع على 60 موجود عندك اخوي fire?