المشكله يا اخي سيارتك جديده 2009 لسه جديده .. ما أتوقع أن فيه خراب قوي .. يمكن تحتاج تغسل الراديتر وتغير ماء الراديتر ( اذا كنت ما تستخدم ماء راديتر أصلي + ماء مقطر )
الأكورد حسب تجاربي معها ما ترتفع حرارتها إلا اذا نقص ماء الراديتر
ما عمرها أرتفعت حرارة سيارتي أو سيارة أخوي
إلا مرة سيارتي ارتفعت حرارتها H لأني غيرت ماء الراديتر ولا عبيته زين ما كنت اعرف انه لازم اشغل السياره وازودها كل ما نقص .. وبعد ما ارتفعت الحراره فتحت غطاء الراديتر ولا لقيت ماء
والحمد لله انها ما خبطت المكينه بسبب الحراره العاليه جدا جدا ( على الأخير H )
لكن تعلمت درس أني أعبي الراديتر زين والقربه إلى MAX
وأهم شيء اضغط الليات الكبيره حقت الراديتر أكثر من مره عشان يطلع الهواء من الراديتر واشغل السياره لين توصل حرارتها الطبيعيه عشان يفتح بلف الحراره وكل ما نقص ازيده .. الين يمتلي الراديتر
وش الماء اللي تستخدمه في الراديتر والقربه ؟
- ماء راديتر أصلي + ماء مقطر = يحافظ على الراديتر وطرمبة الماء ومجاري الماء بالمكينه و كل شيء ... من الصدأ والتآكل والخ...
أو
- ماء عادي من البزبوز أو الحنفيه أو ماء صحه = يسبب صدأ وتآكل
# حتى الماء المقطر لحاله ما يكفي .. لازم يكون معه ماء راديتر أصلي
شف تأكد أن الأشياء هذي غير مسدوده :
* الخرطوش \ الهوز \ اللّي .. رقم 4 و رقم 3
* مكان تركيب الخراطيش رقم 3 و 4
* الكوع رقم 5
* الخرطوش \ الهوز \ اللّي .. رقم 3 اذا كان طايح في القربه يصير الراديتر ما يقدر يسحب ماء من القربه
وفك غطاء الراديتر والسياره بارده .. وشيّك على غطاء الراديتر والماء اذا كان ناقص زده
وشيّك على القربه وعبّها ألين الوسط بين الـ MAX والـ LOW .. لأن الماء يتمدد مع الحراره
لو تلاحظ بعد ما تروح لكم مشوار طويل .. تلقى الماء وصل الـ MAX تقريباً
وشيّك على الراديتر :
من الداخل = اذا فيه أوساخ أو صدأ .. من خلال النظر من فتحة غطاء الراديتر واستخدم كشّاف قوي ( ضوايه )
ومن الخارج = تأكد أن زعانف الراديتر سليمه ولاهي مطعوجه أو مايله لليمين أو اليسار... اذا هي تعيق مرور الهواء تقدر تعدلها برفق شديد وشوي شوي
وإذا فيه أوساخ أو أشجار أو طين ناشب بالراديتر .. تقدر تنظفه بفرشاه أسنان ناعمه من الأعلى إلى الأسفل و برفق شديد و شوي شوي .. عشان ما تميل زعانف الراديتر
وشيّك على دينمو المروحه وريش المروحه وعلى أفياش المروحه ( لكن أنتبه لا تعكس الأسلاك .. لأن اذا عكستها تصير السياره تسحب حرارة المكينه وتدفعها باتجاه الراديتر = ترتفع الحراره )
لأن معنا أكوردت قديمه ولا عمرنا اشتكينا من الحراره أو الراديتر او المراوح
جرّب تغير غطاء الراديتر وماء الراديتر .. و نظّف داخل الكبوت من الغبار بالهواء المضغوط عند البنشر
وأرفق على القير الأوتوماتيك ولا تشد عليه بقوه بإستمرار خله يعشق ويريح
وأتوقع مبرد زيت القير داخل الراديتر
أتمنى أني أفدتك ولا تحرمني من دعائك في شهر رمضان المبارك
رد مع اقتباس
المشاركة الأصلية كتبت بواسطة ا ه ه 2142 Accord
مواقع النشر (المفضلة)