الموضوع: ويش هي الاشياء اللي لازم تتاكد منها قبل استلام السيارة من هشومي؟

البودي ثم البودي ثم البودي وتكون مغسلة قبل تشيكك عليها (حتى السقف شيك عليه) ولاتنسى عده السلامة معه
ومبروك مقدماً

مشكور أخوي عبدالمجيد والله يبارك في عمرك ..لكن محتار بين الاربعة والستة سليندر؟
شوف انا استخدامي عادي يعني ماني راعي خطوط ولا راعي مقاومات لكن العزم والزينون والكاميرا الجانبية والصيانة المجانية في الستة (الملكي) يلعب دور ..ويش رايكم؟
الان واصل سعر الفل 4 115300 مع الخصومات والعروض شاملة اللوحات ..لكن رحت معارض الفلاح وقالي مسؤول المعرض الفل 4 113.000 ريال ؟؟؟ يعني هشومي ولا الفلاح؟
أرجو التفاعل والرد على استفساراتي لان الوقت ضيق جدا..ولكم الشكر والعرفان مقدما

تفرق بين الاربعة والسته .. طبعا خذ السته وانت مغمض ، الي محاكيك اخذ 4 ولو رجع لي الزمن اخذت 6 واتوقع فل الاربعة مافيها زنون ولا كاميرا جانبية للمرايه ولاصيانه مجانية الا اذا فيه عرض (الي عندي فل مخمل)
اذا هشوم عنده عرض صيانه مجانا كامل مده الضمان خذ منه لانه يكلفك الصيانه لين يتنهي الضمان تقريبا فوق 5 الالف
واذا انت في الرياض ، رح لوكيل العمودي ع الدائري بين مخرج 12 و 11 (قبل مخرج 11 ع اليمين تحت الكبري الجديد -الليد الازرق)واتوقع يفرق السعرعندهم (وابعد عن اللون الاسود )
وموفق ان شاءالله

تسلملي يا غالي وتسلم ردودك..على طاري الصيانة المجانية زي ما تعرف على الستة فقط (الملكي والسبورت)..واعجبك رحت عند هشومي وسحبت جدول الصيانة اللي عندهم وحسبتها لين ينتهي الضمان طلع حول 10.000 ريال هذا اذا لين 100.000 كيلو واذا لين 80.000 كيلو بتطلع عليك حول 8000 ريال وكسور طبعا في حال خذيت ال4 فل اما اذا خذيت الستة فالموضوع منتهي بخصوص الصيانة..لكن سؤالي لك ومعليش طولت عليك..ليه اذا رجع فيك الزمن تاخذ ال6؟ عطني اسباب فنية او ميكانيكية او سعرها السوقي وقت البيع مثلا؟ وليه اسعار الفلاح ارخص من عبدالله هاشم ويش السبب؟ وبيني وبينك انا ودي في الزينون والكاميرا الجانبية للمرايه؟ فا عندي حلين يا اني اروح واخلص لل4 فل جلد 115300 ومن غير صيانة مجانية او 6 بي 130.000 يمكن يخصومون لي 3000 ريال وتطلع لي بي 126.000 مع الصيانة المجانية؟ لك الشكر الجزيل اخوي عبدالمجيد واسف على الفلم والسيناريو اللي كتبته

السلام عليكم جميعاً، شباب نبي الردود الزينة على موضوعي الاخير ..اللي اعرفه ان هذا المنتدى بطل من ناحية القائمين عليه ومن ناحية الاعضاء والمشاركين بس الظاهر الصيف لعب فيكم من بدري هههههههه

لا عادي وانا اخوك . خاصه وانت دافع مبلغ وقدره ، السته السلندر تفرق صوت المكينه الي عندي تسمع صوتها مع انها توها مامشت الا 20 الف وع كلام كثيرين من الاربعة سلندر . وغير كذا فرق الدعسة ، مو شرط تكون راعي مقاومات او غيرها ، خاصه اذا ركبو معك 4 تحس انها ثقيله ، وزي ماقلتلك دامك قادر على سعر 6 سلندر اشتر وانت مغمض

تحياتي

اذا ميزانيتك تسمح ..

خذ 6 بدون نقاش ولا تجلس تسال وش الفرق . لانه واضح وضوح الشمس

يكفيك صوت المكينه والثبات والاكيد شكلها

شكرا اخوي never look back واخوي عبدالمجيد على ردودكم الطيبة ..طيب تنصحوني من معارض الفلاح بما انهم ارخص ولا من الوكالة مع العلم عليها ضمان الوكالة كانك مطلعها من عبدالله هاشم ؟ وبعدين دقو علي امس (عبدالله هاشم) وقالوا لي ان الدفعة الجديدة وصلت (4 فل جلد) طبعاً جيت سألتهم عن الستة ملكي قالوا لي جت كمية قليلة وكلها لونها ابيض ومباعة دقيت على الوكيل في الشرقية قالوا لي في وحده 6 ملكي لونها عودي (التايجر) ويش رايكم؟
اسف اشغلتكم شوي ..الدعوى فيها دراهم اكثر من 100.000 :(

مالك الا الصبر ، وخذها من وكاله عبدالله هاشم مع كوبون الفحص المجانية زي ماقلت

أنا أخذت الفل 4 سلندر من الفلاح قبل شهر بـ111 شامل,,
طبعاً بدون شك الـ6 أفضل لكنك بتدفع فرق يوصل ل13 ألف
لأن المعارض ماتجيب الستة!
صحيح العزم ما يجمل وصوت المحرك الستة أهدا لكن 13
ألف!! مستحييييل.

مساء الخير اخي اكوردا، الله يباركلك فيها ويعطيك خيرها ويكفيك شرها انشاءالله ..والله انا قالولي ب 113،000 الفل 4 سليندر جلد لكن ما فاي عندهم ستوك (ما عندهم سيارات) عند الفلاح طبعاً. لكن الحمدالله خذيتها من هشومي لكن حصل معي كالاتي:
اول شي جاني اتصال منهم يوم الاربعاء الماضي (اسبوع من تاريخ كتابة هذا الرد) وقالو لي عندك 4 ايام من تاريخ هذه المكالمة ولا ترى بنبيع السيارة لواحد ثاني!! انا اشوف واعتقد اسلوب غبي كانه اسلوب تهديد ولا جالس تشحتهم!! المهم جيتهم قبل رابع يوم ومعي الشيك بس قبل لا اسلمهم قلتلهم وين السيارة ابي اشوفها..قالولي والله ما بعد وصلت باقي في العزيزية تتجهز!! تخيلوا لها اكثر من 5 ايام تتجهز!! قلت طيب ..جيتهم اليوم اللي بعده قلتلهم وين السيارة قالو وصلت بس البطاقة الجمركية ما بعد ارسلوها لنا من جده !! وفي الاخير قالو لي اذا عليك مخالفات سددها قلت طيب سدتها ..المهم الدعوة كانت مماطلة في مماطلة .. قالو لي روح امن على سيارتك ورحت امنت (طبعا هالكلام كله عشان يضيعون وقتي وانسى بالتاخير الحاصل منهم) المهم جيت بشيك على السيارة ومالقيت شنطة الاسعافات الاولية ولا لقيت طفاية حريق !!!! هنا كانت الطامة الكبرى..قلتلهم ماراح اوقع على التسليم لين تجيبون لي كاملة مكملة ..قالو لي: خذها وبعد شهر تقريبا بندق عليك وبنعطيك اثنين لو بغيت (طبعا اسلوب تسليك) انا قلتلهم بعطيكم فرصة لين بكرة اذا مافي تطور في الموضوع بكنسل الشراء من عندكم. هذا اللي صار معي الا اليوم وانشاءالله بعلمكم بالجديد اذا صار شي..انتبهوا يا اخوان اي سلعة تشتريها وبالذات اذا كانت سيارة لان بصراحة هناك جهل مننا احنا كعملاء و نصب واستغفال من التجار والوكلاء.

^ ^
بالنسبة لعدة السلامة ما بعد جابوها ولا راح تلاقيها عندهم في هذاالوقت,
اطلب منهم ورقة تثبت انك ما استلمت العدة واحتفظ بها الين يجيبوها,
أنا أخذت خطاب من معرض الفلاح يفيد بأني ما أستلمت عدة السلامة
وأنتظر يجيبونها.

يكفيك لا معاك اكورد 6 سليندر تتقارن مع الافلون والجنسيس والعلوم ذي

ابشطح شوياات واعتبر كلامي مجرد اضافه

تدري ياعزيزي ب130الف تجيب لك تاهو اصفاار او جيب جكس مايقل عن موديل 2010نضيف طبعا ،،،السياره الصغيره حالها حال اي سياره افالون كامري كابرس المرتبه الخلفيه يالله يالله تشيل 3 الى 4 تاكل مطب تحك والحفر والمطبات تثر عليها بشكل كبير ومع الوقت تبداء اصوات الديكور ومن هالكلام،،راح اكلمك عن نفسي بعض الاحيان اطلع مع اخوياي للبر الي يحصل اوقف ع جمب ودق ع واحد يمرني عشان ندخل ،،بتقول ليه لن لو تدخل ضرب صدامها بالارض وبتحك والاكورد ثقييله وتنشب،،،والشيء الثاني ضعف بدي السياره مره في خط فرعي مشيت مانتبهت للي جايني المهم حكني راعي يوكن المهم صدام سيارتي تفكك والكبوت جته عفطه على الطرف ومخش في الحمايه الانوار واضطريت اشيل الحمايه حقت الانوار بسبب المخش وقطع بالصدام وانكسار مساكات الشبك ،،،والله الي حصل لليوكن مجرد انه قشع بويتي الي جت على صدام سيارته ومشى..المهم الفلوس فلوسك وحطها بالي يعجبك وزي ماقلت لك انا عانيت من هالشي وحبيت انقل لك .. واعتبر كلامي اضافه وبتوفيق

شكرا على مرورك اخ Mo9ode

كيف الحال اخوي اكوردا، عندي موضوع مهم جدا واللي هو بخصوص البنزين ..بصراحة لقيت في المنتدى كلام واجد اللي يقول 91 واللي يقول 95!! انا عن نفسي قريت الكتيب حق الوكالة ومكتوب يفضل 91 فما فوق!! السؤال هنا: ويش الافضل بالنسبة للعزم وبالنسبة للتانكي وبالنسبة لعمر السيارة؟ ارجو الافادة مع العلم اني اول ما طلعتها عبيت 91 وانا متردد و مع انه المندوب قالي 91 حسب كلام الشركة الأم !! امشي على كلام الوكالة والكتيب ولا أمشي على خاطر العزم ونظافة التانكي وعمر السيارة (95)؟ وايش الافضل من ناحية النظافة وخلوها من الرصاص ولا كله واحد حسب نوع السيارة وحسب كم سلندر؟ اسف على الاطالة