الموضوع: تجربتي بتغيير ماء الرديتر وماحصل لي مع عبدالله هاشم

بسم الله الرحمن الرحيم
السلام عليكم اخواني في المنتدى
اولاً أأسف على عدم مشاركتي الفعاله في المنتدى
ثانياً اطرح لكم تجربتي واحصل لي مع وكيل هوندا عبدالله هاشم


طريقة تغيير ماء الرديتر للاكورد 2008
بالبدايه نشتري عدد 2 جالون ماء رديتر احتياطاً لان ماء هوندا مايحتاج تخففه بماء
تكون السياره طافيه وتفك الصره السفليه بالرديتر وتنتظر ابو ربع ساعه طبعاً تضغط بيدك على الخرطوش حق الرديتر عشان يطلع باقي الماء وتسكر الصرة وتعبي الماء الجديد لحد مايفلل الرديتر طبعاً التعبئه تكون بطييئه لان اذا عبيت بسرعه يوهمك الرديتر انه فل وهو باقي تقريباً ياخذ جالون كامل اذا فلل الرديتر تسكر الغطاء وتعبي القربه لحد الخط العلوي وتشغل السياره بعد 10 دقايق تشيك على القربه لان الماء اللي ينقص من الرديتر ياخذه من القربه طبعاً تعبي النقص اللي بالقربه لحد الخط العلوي والسياره شغاله


انا تعجبني مقولة درهم وقاية خير من قناطر علاج

لتجربتي قصه وقصتي للاسف حصلت مع الوكاله عبدالله هاشم قطع الغيار فرع الخرج والرياض ...
بالبداية قررت اني اغير ماء الرديتر بحكم ان سيارتي مشت فوق 200الف وخدمتني الحمدلله فوق ال 5 سنوات وصبرت علي
رحت للوكاله اشتري من عندهم ماء رديتر وكذا قطعه بحكم ان القطع المتوفره اصليه ابو هاشم مابعده شي شريت جالون الماء بمبلغ 69 ريال رحت للبيت وبعد يومين قررت اغير ماء الرديتر


بعد ماعبيت الرديتر حاولت اقراء التعليمات المكتوبه خلف الجالون مافهمت عليها لغه تايلنديه مادري طاحت عيني على تاريخ الانتهاء وادقق الا والله التاريخ منتهي حق الماء عدت وركزت الا منتهي








واتصل على طول بقطع الغيار وكالة ابو هاشم فرع الخرج مايردون وادز لهم لقيتهم مسكرين واتصل على طول بفرع الخالديه رد علي سوداني وقلت له التاريخ منتهي حق ماء الرديتر قال لي يازول الماء ماله تاريخ انتهاء قلت له اذا ماله تاريخ انتهاء ليش مطبوع على الجالون





الزول عصب عشان اني انا ادرى وانت ماتفهم


حاولت افهمه بطريقه ثانيه مو راضي يفهم تهور وارسل لي صورة ماء الرديتر اللي عندهم


اكتشفت ان الوكيل ابو هاشم ملصق على التعليمات التايلنديه تعليمات باللغه العربيه ومو واضح عليها تاريخ الانتهاء واللي انا اخذته ماكان عليه لصق قلت حلو اكتشفت انه ملعوب علينا





خلال يومين ماحركت السياره ما ابيها تتضرر وابحث بالنت اكتشفت مصيبه ثانيه
الماء اللي يبعونه لنا ابو كلب اللي هو تايب 1




والاصلي مو متوفر ابداً


وانتظرت لحد مافتح فرع الخرج واروح لهم واكلمهم عن الموضوع قال لي هو انت اللي مقروشنا جانا خبرك قلت حلو عشان مايكثر الهرج هذا الجالون اللي اخذته من عندك وهذي الفاتورة وودني لمدير الفرع


قابلت المدير علمته السالفه قال امرني
بكل كبرياء // ابي فلوسي – وابي ماء رديتر اصلي غير هذا
ولعلمك ترا رفعت بلاغ لوزارة التجاره



قال لي اما الفلوس بتاخذها وماء الرديتر ماعندي الا اللي عطيتك والبلاغ للوزاره حقك
بصراحه صكيته بلايك


رجعت لمكتب القطع وصعدنا الموضوع عن طريق ايميل مرسل بالطالبه بالمبلغ بسبب انتهاء تاريخ الماء وانه مو الاصلي


وقابلت الفني شبير انا اشهد انه لحيتن غانمه


وقلت له ابي ماء رديتر اصلي قال لاتحاول ماعندنا لكن اللي افيدك به اعطيك رقم القطعه
اخذت الرقم واتصلت على وكيل هوندا بالبحرين والاستفسار قالوا موجوده قلت ابي الخضراء قال ماعندنا الا الازرق وهذا المعتمد من هوندا قلت ياحبيلكم





تم الشراء عن طريق وكيل هوندا في دولة البحرين الشقيقه
ماء رديتر ازرق تايب 2 بمبلغ 75 ريال
طقم فحمات امامي وخلفي ب 460 ريال تقريباً
اعجبني الرخص عندهم


اول ماوصلت القطع غيرت الماء اكتشفت ان الماء الازرق يوجد فيه نسبة زيت فرق عن الاخضر
بعد فتره اتصل علي شخص من وكالة ابو هاشم وقال انت رافع شكوى علينا قلت نعم قال انا اكتشفت للاسف ان كلامك صحيح وقريباً راح نبدل الماء ونستورد الاصلي وابي منك رقم الشاصي قلت ليش قال ابي اطلب لك ماء من دبي قلت له انا شريت من البحرين ابعطيك فاتورتي وعطني قيمتها قل ابشر تعال
طبعاً رحت وخلوني اوقع على اقرار اني استلمت المبلغ وما اطالب الشركة باي شي


وانتهت القصه



طبعاً بقى دور وزارة التجاره لحد الان ماندري وش يصير

فالمقصد من سالفتي المطوله
نحذر من الوكيل بالقطع الاستهلاكيه
وانا راح احط لكم رقم القطعه لماء الرديتر ورقم وكيل هوندا بالبحرين

رقم القطعه لماء الرديتر OL999-9011 Blue Type 2 Coolant
رقم وكيل هوندا بالبحرين 0097317457100


أن أصبت فمن الله وأن أخطأت فمن نفسي والشيطآن




والسلام عليكم