الموضوع: أنا والجنط التجاري وساعدوني ..

البرستيج
بما انك في الرياض اخوي وراى ماتدور بالتشاليح اصلي .
انا افضل السيارة لما تكون كاملة بالجنوط مو زي سيارات الايجار وهذا مجرد راى

أخوي أكورد الجنوب

أشكر لك ردك اول شيء

الاصلي ما تحصله .. واذا حصلته تحصله غالي لان حقين التشاليح يدري ان سعره بالوكاله الجنط الواحد بـ 1900 ريال

بس انت هل تعتقد ان في على السياره ضرر اذا مقاس الجنط والكفر كمقاس الوكاله؟؟

ما اعتقد ان قيه ضرر ميكانيكي على السياره

لكن الخوف انها تنكسر عليك لوجتها ضربه قوي ... عاد اذا انكسر
السياره احتمال كبير تنقلب

هذا غير ان السياره بتنعدم من تحت
و يمكن تطلع الايرباقات اذا انكسر احد الجنوط الاماميه

و الله يستر عليك

الفرق بين جنوط الوكاله و الزينه مو بسيط
السعر و الجوده و التحمل و الماده المستخدمه في الصناعه و مثل ماذكرة ممكن تتسبب جنوط الزينه بعمل رجه

إحتمال كسر جنط الزينه بسبب مطبه يعتمد على حجمه يعني 17 إنش إحتمال الكسر كبير وهكذا كلما إزداد الحجم

لاحظ حجم 16 قليل ينكسر وذلك لصغر حجمه وممكن يساعد على إمتصاص الصدمات بشكل افضل

في النهايه الجنوط تعطي السياره منظر اجمل ... و الأغلب يركب زينه

تاكد يمكن لوتغير الكفرات يتعدل الموضوع

اتركها للمختصين

هلابك اخوي

الجنوط والكفرات و و و و و مالها دخل ابداً

المهم

انت اليوم اطلع للغرابي وروح لمركز السليماني وقول له ابغا فلنجات جنوط تركب على الاكورد

رح خذها من عنده و اقرب بنشر بالغرابي يركبها لك وانت واقف

طبعاً

الفلنجات هذي قطعة حديد دائريه تتركب بين الهوب وبين الجنط وتسد الفراغ الموجود فيه وتمنع الرجه

وعلى فكره مع كل السيارات كذا حتى لو تركب جنط مقاس 10 او تركب مقاس 22 لازم ترج معاك

بس اذا ركبت الفلنجات تختفي الرجع

وسعرها اربع حبات بـ ميه ريال

اتمنى اكون افدتك واي سؤال انا تحت امرك

اخوك
عزوز ورشه

الله يعطيك العافيه جميعاً اخواني بصراحه ريحتوني

وانا ما يهمني الرجه .. الرجه خفييييفه مررره واحيان ما احس فيها

بس اللي يهمني يا خبراء هل على السياره ضرر مستقبلي ؟؟

ومثل منتم عارفين الجنوط التجاريه تجي نوعين نوع العرض حقه 7 والثاني 6.50

هل في فرق بينهم؟؟؟

والله يعطيكم ربي الف عافيه وبصراحه ريحتوني

والله نصيحتي شيلها احسلك انا انقلبت والسبه جنووط التجااري

وهذا رأيي مع التجربه

مع ارق تحيه

اخوي مجنون اكورد؟؟

مركب نفس جنوط الوكاله والا مركب زينه؟؟

وبصراحه واحد من اخوياي مركب زي اللي انا مركب وموتره 2004 مره ظف له رصيف ولا جاء الجنط شيء ولا انكسر بس انعفط عفطه خفيفه وراح وعدله بالصناعيه

اخوي انا راي انو الجنوط احسن للثبات "حسب ما سمعت "بس طبعا رح تفرق معك على سرعة السيارة يعني ما تشد السيارة زي اول

اخوي vtec

اشكر لك ردك

بصراحه ما يهم تشد ما تشد لاني ما ني راعي سرعه ومستحيل اسرع

بس اللي يهمني ان السياره ماعليها ضرر يعني اخاف بعد شهرين الا القير خربان والسبه الجنوط .. مثلاً

او حاجه زي كذا

على العموم انا قبل امس طلعت الغرابي وفكيت الجنوط اللي انا مركبها وركبت ثانيه نفس كل شيء بس الاختلاف ان اللي ركبتها ياباني وعرض الجنط 6.50 واللي كنت مركبها اول صيني وعرض الجنط 7

وطلع شكل الموتر زي الوكاله بالضبط

انا اقول لك فكها ورجعها طيس وريح بالك لان إذا خليتها راح تتظرر العكوس والمقصات والفحمات وراح تضرب سعر قوي اقوى من الجنوط اللي شريتها فحرم رجعها وكالة مدامك في اول الأمر وبعها ولو بخسارة بسيطة ماتضر المهم السيارة جديدة حرام تعفسها ولا كان ركبتها وكالة افضل لك اواقل شيء استشرتهم قبل التركيب بصراحة غلطت اكبر غلطة وناس كثيرين يركبون جنوط ويعودون يتحسفون مجرد نزعة حماسية فقط مثل اللي سويت وهذا رايي الشخصي .

اخوي دحوم

أكيد راح تتضرر العكوس والمقصات ؟؟

100% راح تتضرر الجنوط من يوم قلت لي فيها رجه من ركبتها خلاص الموضوع منتهي انا صار معي نفس اللي صار معك بس ليس في الاكورد في سيارتي السابقة ركبت لها جنوط مقاس 17 انش اول ماركتبها ما اقدر اتعدى 80 من الرجه اللي صارت في السيارة ومثلك رحت للعضيب عشان يسوي لي الوزنية نجح الموضوع بعد فتره اسمع صوت الفحمات على كيف كيف مع الهوب هلاوالله لكن سيارتي قديمة مااهتميت فيها ولأني مخطط على الاكورد من اول لكن سيارتك جديدة حرام تلعب فيها كذا ولا يهمك كلام الناس , لان الناس مايدرون وش الاضرار اللي راح تسببها شيء يعطي للسيارة منظر من الخارج ومن الداخل انواع الاصوات والهزهزة .

أشكر لك تواصل اخوي دحوم

انا ما ركبت جنوط 17 زي ما انت مركب

انا مركب زي جنوط الوكاله ونفس مقاس جنوط الوكاله والكفر بعد نفس مقاس الوكاله

وابغى الاخوان الفنيين يشاركوونا بآرائهم

ياخبراء القسم هذا ..

الى الان ما سمعت ردكم ؟؟

هل السياره عليها ضرر ميكانيكي مستقبلي ؟؟

مع العلم ان الجنوط نفس مقاس الوكاله بالضبط والكفرات كذلك ..

شباب وينكم؟؟

إذا غيرت مقاس الجنط أعتقد يكون في ضرر .. وأول فرق راح تحس فيه ثقل في الدريكسيون .. وزيادة صرفية البنزين .. غير الأضرار على المقصات والأذرعة .. وأهم شيء ( حسب كلام كتيب السيارة ) نظام الـ Abs راح يتأثر إذا تغير مقاس الكفر أو الجنط ..
عن نفسي ..
أنا أخذت أكورد سياحي موديل 2005 وكنت راغب في الفل الكامل بس سعره يقص الظهر .. هونت عن الفل الكامل بعد نصيحة موظف المبيعات .. قالي رح خذلك جنوط يابانية من عند محلات الزينة ..
أخذت جنوط مقاس 15 حتى لا يختلف علي مقاس الكفر وأطيح في قضية الفرامل تتأثر وصرفية البنزين تزيد والسيارة تثقل ..
للمعلومية الجنوط نفس شكل الأصلية بس مقاسها 15 .. وهي يابانية حسب ما هو مكتوب عليها .. ومن شركة تويوتا نفسها تستعمل جنوطها كإكسسوار إضافي خاصة للكامري .. والسعر اللي لقيته 1100 ريال .. وتراه نفس سعر طقم جنوط الكامري الإكسسوار الموجود عند عبداللطيف جميل واللي يعطون عليه ضمان ..
الآن الجنوط لها عندي سنة ونصف تقريبا .. والحمد لله ما أشكي منها بأي شيء .. رغم إني كثير السفريات وبسرعات تزيد عن الـ 160 كم .. وفي عز الظهر .. وآخذ المطبات بسرعة واحد عنده ونيت مو أكورد هههههههه .. وللمعلومية رغم غسيلها يوميا .. ما شاء الله بريق الكروم مثل ما هو .. بس عندي الآن بدأت تظهر رجه خفيفة جداً عند الـ 120 كم .. وأعتقد سببها الكفرات لأنها حقت الوكالة .. يعني كثر خيرها عمرت فوق الـ 60 ألف كم ..
أتمنى إني أفدتك أخوي من واقع تجربة لا خبرة

أخوي انسان الله يعطيك العافيه ..

يعني رأيك أفك اللي انا مركب واركب مقاس 15 ؟؟

انت عارف ان الفل 4 سلندر مقاسها 16 ؟؟


على العموم استفدت من كلامك والله يعطيك العافيه

هلابك اخوي البرستيج

واسف على عدم الرد بخصوص الضرر الميكانيكي

انا الحين الى فهمته من كلامك ان الرجه راحت

طيب

خلاص الرجه راحت مافيه اي مشكله ابداً ابداً

وحتى في فترة الرجه اول ماتضررت السياره

لان القطع الداخليه مثل العكوس عواميد توازن مساعدات يايات اذرعه مصنوعه من حديد صلب قوي ولاهي بلاستيك او سفنج

علشان تتضرر بفتره شهر او سبوعين

لكن لو للسياره سنه او اكثر وهي على هذي الحاله صحيح اقولك بيطلع عندك فراغات بدودة الدركسون من قوة الرجه وجلب المقصات تتعب وكراسي المساعدات برضو بتتعب

لكن في فتره قصيره ماعليها ضرر ابداً

وبالنسبه لتركيب جنوط اكبر من حجم الوكاله ضرره شبه معدوم وممكن اقولك بنسبة 5%

لكن اذا كانت سيارتك مقاس جنطها الاصلي 14 وركبت 18 او 19 فراح اقولك نسبة الضرر فوق 50% وخصوصاً مع تهبيط السياره راح تزيد النسبه

لكن فرق انش ماعليها مشكله

هذا وصلى الله على نبينا محمد

وسامحني على التقصير والاطاله

تقبل تحياتي وفائق احترامي

اخوك
عزوز ورشه

باتريوت هوندا .. (( عزوز ورشه ))

هذا ما كنت واثق منه انك تبي تريحني وتبي تريح كثير يسألون زيي ..

اكرر لك شكري وامتناني على ردك لاستفساري

وعلى قولتهم الحين احط ببطني بطيخ صيفي ..

محد رد على السؤال اللي يقول فيه وش الفرق بين6.5 و 7 ؟؟

على العلم انا مركب 7 و حجم 16

هلا وغلا ...


ااانا مركب جنط 17 مو 16 وكانت عندي نفس مشكلتك ..


شفت العضيب واليرموك ونجد .... الخ ...


هذولي اكبر نصااابين لايهمونك هم وجهازهم هالارضي ..


فيه محل اعرفه عنده جهاز قيمته ب 120.000 ريال رصصت عنده ..


الحمدلله لارجة ولايحززنوون ..


المحل اسمه بريجستوون ع طريق خريص بعد وكالة نيسان وهوندا سيده لين يجيك ع اليمين ..

.

أبو عابد الله يعطيك العافيه ..