صدمة خفيفة من الأمام هوندا أكورد 2004

**نساي** · 27-11-2007, 02:27 PM

السلام عليكم ,, هلا بالزكررررررررررررت
اليوم الصبح وانا أمشي مخرج 14 كنت أمشي على المسار الأيمن وتوجهت للي في النص وعلطووول فررررررررمل كابريس صابونه قدامي

وخانتني الهوندا قمت وصدمته من ورى , نزلت وشفت موتر الرجال وماناظرت موتري لأني غلطان
,, الكابريس ما جاه شي ماشاءالله ,, اللهم البوية شوي انقشعت , والرجال الله يجزاه خير قال توكل على الله
المهم ركزو معي الحين
موتري انعفط كبوته شوي والشبك انكسر والصدام برضو تضرر وانشق والرفارف دخلت شوي واثرت شوي على فتحة الباب , يحك اذا جيت أفتح الباب و اللاب توب اللي حاطه ورا طاح في مكان الرجول ==> وش تبي انت هع هع
حمدلله صارت الصدمة فوق الصدام ,, والا لو كانت تحت كان وش بيفكنا من airbag
المهم بعد ما مشينا رحت علطول للصناعية مخرج 17 رحت عند ورشة الذيابي
قالي بتكلفك 1500 شغل يد وبيغير الصدام والشبك وبيسحب الرفارف وبيسمكر الكبوت

يعني أتوقع بتكلفني حدود 3200 ريال
وش رأيكم ؟ ووش نصايحكم ؟

الله يكفينا ويبعد عنا واياكم الحوادث ويكف عنا كل شر
,,, إن شاءالله أنه تكفير ذنوب ودفعة بلاء

الله لا يورينا مكروه

**كلاس وولد ناس** · 27-11-2007, 02:52 PM

سلامات ياخوي وماتشوف شر وإن شاء الله الشباب يفيدونك

**B Useful** · 27-11-2007, 02:54 PM

الصدام يتصلح بــ 50 ريال الى 70 ريال في محلات الفيبر جلاس .. اذا ما حبيت تغيرة ..
الكبوت و الرفارف دامها تتسمكر اوكية .... (( بكفيك على كل حال ))
الشبك مالك الا تغيرة ... تراة 3 قطع ... حق 2006 بــ 700 ريال من النعماني ..

والحمد لله ع السلامة اولاً واخيراً ..

**نساي** · 27-11-2007, 03:09 PM

مشكور أخوي كلاس وولد ناس .. الشر ما يجيك يا هاي كلاس

مشكور أخوي كوكو كورو
يتصلح الصدام ؟ .. طيب هل بيصير كانه جديد ومو باين كثير ؟
لأنه بيني وبينك الفرق مهوب شوي ( على كلامه الصدام 960)
وبالنسبة للكبوت ,, أهم شي ما يبان وقت البيع لأن بعض الشريطيه لو يشوف أي ميلان وإلا أي طقة في الكبوت بيطيح من سعر الموتر ( بيتوقع جايها صدمة قوية) ,,, وبالنسبة للرفارف تنسحب بس يعني مافيش مشاكل ( هقوتي )

تشكرات على ردك حبيب قلبي
والله ييسلمكم من كل شر أنتم ومن يعز عليكم

**كلاس وولد ناس** · 27-11-2007, 03:28 PM

كوكو كورد ما شاء الله عليك أول ما تسمع إنه واحد سوى حادث ألقاك أول واحد ترد بس انا سبقتك المرة ذي والأسعار موجودة عندك وبكل تغيراتها شكلك واحد خبرة بالشغلات ذي الله لايبلانا بها.

**B Useful** · 27-11-2007, 03:35 PM

كلاس وولد ناس ... خخخخخ

شيك على مواضيعي من ملفي الشخصي وتعرف السالفة ... من 4 شهور وسيارتي بالورشة

اخوي نساي ..

بالنسبة للصدام ... لو انة مشقوق .. او قطعة بحجم قبضة اليد مفقودة منة ... يتصلح بـــ 50 ريال ... انا مجرب مرتين .. ويرجع كنة وكالة لأنة فيبر جلاس ... يتشكل بالحرارة والنار ..... مثل الصلصال سو في ماتبي ..

الكبوت اذا تبي تغير تجاري بيكلف حدود 250 ... لكن ما انصح ... الوزنية مش مضبوطة .. بس يصلحها السمكري المحترف .. كبوت جديد من الوكالة 1070 ريال تقريبا ..

رفارف تجارية ما انصح ابد ..

الشريطية ... اذا ماكشفوا السمكرة او اي ميلا او فتحات غير متناسقة او اي شي اخر ... بيكشفون البوية .. بأسهل الطرق ..

وفية اجهزة حديثة ورخيصة تكشف السمكرة بسهولة ...

حادث وصار .. وكل شي مقدر مكتوب ..

**just 4 u** · 27-11-2007, 04:19 PM

الحمد لله على السلامة .. يا نساي

والصدمة بسيطة إن شاء الله لا تشيل هم إذا انت تثق في الورشة اللي سعرت عندها ماشي
وإذا أنت تـبحث عن الجودة ماهي مشكلة .. عموماً أنت تقدر تقلل من تكلفة الإصلاح
وفيه ورش ما تكلفلك نصف هالقيمة .. بالنسبة للقطع أنصحك تسمكر الكبوت ولا تشتري
تجاري لأنه ماهو مضبوط لا وزنية ولا قياس وخفيف ويبين فيه الإستخدام والتشليح كله اللي فيه مسمكر
و ممكن تأخذ من التشليح شبك إذا حبيت ..

**نساي** · 27-11-2007, 04:43 PM

والله بالنسبة للصدام ,, كلامك اقنعني بمرهم وبشوف

وبالنسبة للسمكرة يقول بيضربها بويه عقب

**و د ا السعوديـة 1 5 5** · 27-11-2007, 05:20 PM

الحمدالله على سلامتك اخوي ونشاء الله يفيدونك الاخوان

**$$الدولار$$** · 27-11-2007, 07:31 PM

الحمد لله على السلامه اخوي

اخوي كوكو قال المختصر المفيد ولا عاد تدور كلام عقب كلام كوكو ..... ابد
والله يكون في عونك...

**نساي** · 27-11-2007, 11:57 PM

الله يسلمك من كل شر أخوي just 4 u
والله اليوم وأنا واقف عند المهندس , صادفت أن يكون على بعد روشتين مني واحد معه أكورد 2006 ونفسسس الصدمة بالظبط اللهم الشمعة مسكورة عنده بس هذا الفرق و عطاه شغل اليد 3500 !! ,, أنا من أول تكاثرت ال 1500 بس عقب الرجال قلت لا أجل زين بس اهم شي يظبط الشغله , يعني أخاف ورش ابو نص القيمة تكون ما فيها كوالتي
الصدام سمكرة وتخب , وبالنسبة للتشليح بصراحة ما عندي وقت والا مهب شينة الفكرة

---
مشكور أخوي والله يسلمك من كل شر ودا السعودية 551 ,,, عاد مدري وش بتصير لوحتك بعد التغيير هع
والله يرزقك هالموتر اللي في توقيعك

---

الله يسلمك يا رب $الدولار$ => مدري متى بنفتك من الارتباط بك هع هع
ماقصروا الشباب ابشرك

وبشوف الموتر بعد ما يخلص وبحكم عليه وبعطيكم خبر هل شغله زين والا بربسه

سلملم

**B Useful** · 28-11-2007, 12:09 AM

ياصديقي العزيز ..

تبي شي بسيط من خبرتي ؟؟؟

بالاكورد حقتي 2006 فل 4 سلندر لون ابيض ... سويت 3 حوادث ...

تبي اقولك شي ... ؟؟؟ ولا لا ؟؟؟

**نساي** · 28-11-2007, 12:38 AM

الله يعظم أجرك ويخلف عليك
أهم شي سلامتك وبس
وبيض الله وجهك يوم تبيض وجوه

**الـمـسـافـر** · 28-11-2007, 01:40 AM

الحمد لله على سلامتك

**B Useful** · 28-11-2007, 01:45 AM

طيب بقول لك وش صاير لي ..

الحادث الاول (( كنت ماشي 10 او 15 )) جوة حارة ,..., واثنين مسوين زحمة في الشارع واقفين يسولفون ... وفية فراغ بين اخر سيارة وبرميل زبالة* كبير اللي لازم تجي سيارة البلدية الكبيرة عشان تشيلة ...

المهم سويت نفسي حريف ... ومشيت من عندة وانتهت للمراية زين لا تحك في برميل الزبالة* ... وما انتبهت ليد الزبالة* ... فحكت لي قزاز الباب الخلفي وضربت في الرفرف الخلفي من فوق ضربة خفيفية جداً في حجم (( الريال الحديد .. الهلل )) ,,,,,

طبعً فشخرة والسيارة جديدة .... صلحتها في الوكالة بــ 1200 ريال وبوية جديدة للرفرف ..

الشغل 100% ... لكن السعر خارج الوكالة 200 ريال وشغل 100 % ... المشكلة في الفشخرة الزايدة ...

الحادث الثاني ... نفس حادثك واحد ضغط start اليييم في وجهي (( جمس .. سواق )) انعفط الكبوت وانشق الصدام وانكسرت شمعة من الداخل ..

كل شي تصليح .. ماغيرت شي ..

ورشة وفاء في الصناعية القديمة خلف الصافي دانون ..

2400 ريال وشغل 80% ويكلف في غيرها حدود 800 ريال كحد اقصى ... لكن مرض الفشخرة اللي كان فيني ..

الحادث الثالث البشع اللي الله نجاني منة .. (( امل انك تخش على ملفي الشخصي وتشوف صور السيارة اللي كل من شافها قال ما تتصلح ... ))

المهم اني في اللمسات الاخيرة .. باقي شي بسيط وتطلع السيارة ... صلحتها ..

شغل اليد مع السمكرة والبوية والميكانيكا والكهرب 6000 ريال ... والورشة اول مرة اجربها .. ولاهي معروفة ... لكني اعرف صاحبها واعرف واحد من اخوياي يصلح دايم عندهم .. شغلهم في السمكرة اعطيهم 97%

زبدة الكلااااااااااااااااااااااام كلة ...

مدري وش اقووول ..

لكن المختصر المفيد ... (( فية ورش خفية صغيرة ... شغلهم ارجل من الوكالة وارخص بكثير من الوكالة )) ..

لا تغرك الاسماء ... (( وكالة - وفا ... )) الشغل كلة قريب من بعض .. والفرق في الاسعار ..

يعني انا اول دفعت 2400 على صدام وكبوت بس ..
والحين 6000 على صدام وكبوت ورفرف وبابين وسمكة وتغيير قطع ميكانيكا واجد وبوية جديدة ...

معليش ... الساعة 2 الا ربع .. انا نفسي ماني عارف وش قاعد اكتب ... وبكرة عندي دوام بدري ... اذا ما فهمت شي ... لا تدقق

----------------
* الله يكرمكم .

**نساي** · 28-11-2007, 06:59 AM

يا شيييييين اللي يشتري الشارع ويقعد يسولف مع خويه ,,, بعض الناس ما يستحي ولا يحترم الناس اللي يمرون عنده ودك تجلده

,,,,
إذا كان الموتر جديد ودك تصلحه في مكان مضمون والحين على كلامك في ورش تصلح شغل مضمون وبسعر رخيص ,, الحمدلله

ماقصرت أخوي كوكو وهذا آخر الشر إنشاءالله

---

الله يسلمك من كل مكروه اخوي المسافر

**اكورد الرياض** · 28-11-2007, 01:00 PM

اول شي الحمدالله على السلامه انا صارلي نفس حادثك لكن الحمدالله الانوار والرفارف مجاها شي بس الصدام انشق والكبوت انعفط صلحتها 2400 ريال عند الوكاله لكن الشغل ميه ميه طبعا الصدام غيرته جديد والكبوت سمكرته بس والله ب2400 ريال