أ ب د دخل الوكاله اليوم الساعه 11

[prince of meast]

السلام عليكم جميعاً

تحية طيبة هذي ثاني مشاركة لي

الموضوع ببساطة شريت هوندا 2002 أكورد صدفة قبل اسبوع كنت أنظر للهوندا نظرة دونية قبل ومدمن شي اسمه الماني لكن القدر والنصيب أخذت الموتر وفحصته وكل شي طلع فيه بعض الشغلات قالوا كراسي مكينة وليات فرامل ولي دركسون ويبي له صوفة تعشيق كلام اكيد قالوا اكيد تكلفته يالربع قالوا لي تصليح شغل يد 2000 والقطع عليك تمام كاسرنا الرجال وقدر الوضع خصم من قيمته وتوكلنا على الله وشرينا طلعت الموتر من المعرض العصر ومشيت عليه العشا للشرقية عاداتي لما اشتري اي سيارة ادز بها خط طويل المهم عند محطة ساسكو اعبي بنزين الا ويطلع دخان من الكبوت وقفت على الحفرة عند البنشر طلع زيت القير يهرب على الشكمان مع الدزة وينتشر تحت ويسبب دخان لما توقف عاد تأكدت ان الموتر بيمشيني للشرقية بإذن الله زودت الزيت ومشيت والحمدلله وصلنا رحنا للدمام لواحد من الشباب قال بوديك القطيف تكفى لا ما عاد نبي نصلح قال على مسؤليتي دخلنا للقطيف كلهم زحمة واللي يقول غسل بستم ورد لي العصر المهم فيه ورشه كأنها بقاله قال لي خويي لا أسمع لكم صوت كأنكم طرمان أنا اللي بتكلم

هلا أبو حسين رد أهلين تعرفون اللهجة قال خوينا فيه تهريب بزيت القير ممكن تشيك لنا قال اطلع على الرافعه رفعنا الموتر قال الموتر يبي له سلك قير من عصا التعشيق حتى الدفرنس وغيره صوفة تعشيق قال لا يبه طيب كراسي المكينة قال سليمة طيب هوزات الفرامل قال سليمة من جدك انت قال نعم قال جيب القطعه ورح لورشة كذا (.....) ليش وانت ما تعرف تركبها قال أنا تخصصي كبس هوزات(كبس ليات) وهذي خدمة لكم ونبي عليها قولة رحم الله والديك قلنا ماشي شكراً دورنا قطعتنا وما حصلناها زودت زيت القير ورجعت للرياض و اليوم طقيتها أحلى غسيل بستم و دخلت الموتر للوكالة فحص كامل ب 300 ريال قالوا لو تبي فحص قير ب 150 ريال ولو تبي تفك القير توضيب ب 1800 شغل يد قلت لا افحص لي بس.



الموهم طولتها وهي قصيرة رايكم بعد ما يشيكون عليه أصلح عندهم والا لا واذا لا اقترحوا علي ورشه أوكيه ومجربة والله لا يحرمكم الجنة والمعذرة على الاطالة زودتها وهي قصيرة .




بس بصراحة الأكورد عالم ثاني

[ملك مملكة جدة]

لا حول ولا قوة الا بالله

و الله انت بالك طوووويل لو انا منك كان رميت السيارة تحت البيت و سحبت عليها شفاط مو طبيعي ؟!

شوف يا طيب ... ربنا ما شفناه لكن عرفناه بالعقل

1800 ريال شغل يد ؟! ليش شركة bmw و حنا ما ندري ؟!

صدقني الوكالة كلام فاضي .. روح لاي محل برا و راح ياخذ منك شغل يد 500 او اقل

لو انت من جدة كان رسلتك لورشة انا اتعامل معاها و مجربها على سيارتي الثانية و ما شاء الله الورشة 10\10

honda boy : كان يقول لي انه كان عند ابوه اوديسي .. خرب عليه الياي الامامي راح ابوه و غيره في الوكالة .. بعد ما طلع السيارة من الوكالة جاته سفرة و خلى السيارة في مواقف المطار .. لما جاء الرجال من السفر لقى انه الكفر الي غير له الياي معوج لداخل السيارة ( من الاسفل ) << يعني كانها فارشة بس بالعكس


بس خلاصة القول .. لا تصلح في الوكالة .. نفس الي راح يصير في الوكالة راح يصير في اي ورشة برا وين الفرق

[aziz93]

اخوي اذا كنت بترجع للقطيف روح الورش في منطقة اسمها " تركية "
عندهم ورش جيدة

[المـــــلكـ اكـــــورد]

فيه ورشه اسمها الجنوب في الصناعيه القديمه بالرياض مختصيين هوندا يصلحون لك السيارة وشغلهم احسن من الوكاله كل السيارات اللي عندهم هوندا من 80 الى 2007
وشغل تمام وارخص بمليون مره من الوكاله
اسم معلمهم جعفر

[momo]

رح لورشه الجنوب خااااصه بهوندا

لها فرعيم واحد عند جامعه الملك سعود على طريق تركي الاول

والثانيه بالصناعيه القديمه مخرج 18يمين وادخل جوا تحصلها ماعرف وصفها بالظبط

[prince of meast]

أخوي ملك مملكة جدة اشكرك على الرد والتفاعل والله أنا بالي طويل ياخوي عجاز درجه أولى المشكلة هي اني بالرياض وأخاف اوديه ورشه يلعبون في حسبته ويتعلمون عليه لكن ودي اشوف التشيك أب حقهم وش تطلع سالفته ويوم السبت لناظره قريب.

أخوي عزيز 93 أشكرك على تفاعلك وردك الرائع لما رحت للقطيف رحت لتركيا وفيه ورشه اسمها فايز شغلهم أوكيه بس المشكلة القطعه ما لقيتها حتى بوكالتهم اللي بالخبر والمشكلة زحمة سيارات بالورشه وقال مالك الا بعد يومين وصراحه عرفت ان الورش القطيف أطلق من ورش المملكة بدون مجاملة لكن الوقت ما ساعد من جد.


أخوي الملكة اكورد أشكرك على تفاعلك وبصراحة مالي الا الورش بس كيف يا هل ترى وش علم الورشه اللي ذكرتها هل هي اوكيك واسعارهم كيف والمهم بصراحه شغلهم الموتر بينمحط من قلب بعد 10 ايام عندي اجازه يحبها قلبك بدز للغربية والشمالية والغربية بصراحة ربنا على قولة المصريين بيحصل له شغل خطوط مو بصاحي التفاصيل الله لا يهينك انت والشباب الطيبين .


ودمتم ودامت مواتركم سالمه انشاء الله

[prince of meast]

أخوي مومو الشباب أغلبهم يمدح ورشة الجنوب وشكلي بتوكل على الله واروح لمهم لا كن مدري كيف خلنا نشوف الشباب وش رايهم ولا هنتوا جميعاً وما قصرتوا وبيض الله وجيهكم على التفاعل


تقبلوني

[aziz93]

زين ما رحت للفايز شغله نظيف مرة
وخاصة لاصحاب الفورد

[prince of meast]

والله يا عزيز 93 أخوك داج ترا من قلب وبصراحه اليوم الورش صار أغلبها مثل بعض ماعاد درينا من الصاحي ومن المجنون بها الورش لكن صبرا جميل وبالله المستعان.



شاكر لك ياقلبي