وش الحل برايكم يااصحاب الاكورد

**دحوم** · 12-08-2006, 04:24 PM

السلام عليكم شباب كيف حالكم بصراحة عندي مشكلة وهي انا امس صكيت الطبلون وانا جاي من الديرة لكن بالعذاب جت 210كم عندي بعض الأسلئة ممكن تعطوني حل لها :

س1/ كيف اقدر اصك الطبلون كله وهل مع كثرة صك الطبلون اقدر اجيب بالضبط 240 ؟

س2/ هل تتوقعون ان الضغط على دواسة البنزين وتوصيل الضغط إلى 4 يفيدني في ان السيارة يزيد عزمها وبالراحة تجيب 240كاملة ؟

س3/ بصراحة ارتفع ضغطي وانا في الطريق لومينا موديل 2002 LTZ شكله صاك الطبلون كله ماقدرت اجيبه وانقهرت اكثر لما عجزت انزل من تحت 210؟

س4/ ياشباب فيه واحد قام يتكلم على هوندا اكورد ويقول انها ماهي حقت خط وشرايكم فيه طبعا هذا قريب لي ناقل هذا الكلام عن طريق احد اصدقائه ؟

طبعا ياشباب بالنسبة للسؤال الأخير احس ان نفس اللي يتكلم مسكين مايقدر يمتلك السيارة عشان كذا حط فيها انها ماتصلح لخطوط يعني بلاه وش اللي يصلح حق خطوط يعني الواحد يفكر شوي الأكورد (هدوء + ثبات +نظام VSC+بودي قوي مقارنة بالسيارات الأخرى مثل الكامري والمكسيما +قوة محرك + الأمان (وسائد الهواءوالمرآة الأمامية اللي تعكس الاضواء الخليفة ) بصراحة يوم رديت على قريبي هذا بهذا الكلام سكت وقال غير السالفة انا مالي شغل هذا كلام زميلي في المدرسة علما بان زميله يحب الكامري وماهو قادر عليها قلت له وصله كلامي وقله لاتحط عذاريب في السيارة لكن نصيحة في الأخير مد رجليك على قد لحفاك واللي يناظر فوق تنكسر رقبته . (لاحظوا خلا كل السيارات وقام يتكلم على الاكورد) هذا دليل على ولعه بها وعدم مقدرته على امتلاكها .

تحياتي دحوم ,,,,

**Accord 4 EvEr** · 12-08-2006, 05:24 PM

دحووووم ...

انا مدري عن الفل الكامل ..

بس اللي عندي اقل من الفل .. (سياحي)

بعد ماسويت صيانة الـ 1000 مشيتها 225 بعدها يفصل ,,,

بعدين ماشاءالله تبارك الله يعني وصلت 200 بالراااااحه بس الـ 25 اخذت راحتها فيها ...

فوتكووو بعافيه

**النيف** · 13-08-2006, 01:42 AM

الله يستر سيارتي ما شافت ال 100 ك م :d

دحوم بلاش من السرعه فالسرعه قاتله

وتبي الحق انا كان عندي كامري 2003 4 سلندر وصل معي 240 ;)

لان اذكر (سمعت) واحد يقول اطلق بالسياره من بعد الالف كيلو متر التمرين اساس تجيب طبلونها ومن ذي الخرابيط وانا مصدق وموقع وياه

بس ما كانت تجيب وبعدين مع السرعه والخطوط جابت ال 240

وذا الكلام عن تجربه

بس داينميكيا وميكانيكيا

مدري ليش .. اتوقع المكينه تتعود على الخطوط والسرعات العاليه مع الفتره

نسيت اقول الهوا له دور في تقليل سرعة السياره خاصة اذا وصلت حد عزمها

**BLK** · 13-08-2006, 02:31 AM

اترك عنك السرعة يا دحوم :d

و الشباب كفوا و وفوا ...

بالنسبة للرساوة يكفيك ان التعليق قاسي .... و هي أرسى من الكامري أكيد و مثل ما قلت ... مد رجلك على قد لحافك :d

**اكورد 2006** · 13-08-2006, 06:59 AM

والله غريبه انا الاكورد عندي تجيب طبلونها بالراحه وتقعد تفصل على 220 وترجع تدعس وتطبق طبلونها بسرعه اتوقع لو انها ما تفصل كان جابت 240 وجربت عليها اكثر من مره نفس الشي تجيب الطبلون

بس ياخوي دحوم شكلك انت من النوع اللي منت راعي سرعه وجيت فجأه دعست لسياره والسياره ماتعودت يعني البلوف ماتوسعت والبساتم ما تمرنت على الدعس والقير برضو ماتعود المفروض انك تمرنها على 140 وبعدين 160 وشوي شوي لين ما تجيب طبلونها مهو مره وحده هذا اكبر غلط

**اكورد الجنوب** · 13-08-2006, 08:18 AM

دحوم
هذي سهلة مرة بس تعتمد على تمرين السيارة من الاساس

**دحوم** · 13-08-2006, 03:57 PM

يعطيكم العافية ياشباب على الردود وانا بصراحة اقولكم الصدق هذي ثالث مرة اصك الطبلون من يوم شريتها من اكثر من 6شهور وشرايكم في المحافظة لكن بصراحة الطريق يحمس فقررت اسوي كذا ولكن الحمد لله على كل حال 210 اوكي يجي من الهوندا اكورد وإن شاء الله اتوقع مع التمرين تجيب الطبلون وزيادة عزمها ماشاء الله .

**ميدو مشاكل** · 13-08-2006, 07:00 PM

انا اكوردتي قير عادي وصلت امها لـ 225 وفصلت

حاولت كم مرة ومافي امل

وسالت كم واحد قال ردد ياليل مااطولك

**الاخطبوط** · 13-08-2006, 10:06 PM

اكوردتي 96 توصل 220 بالراحه >>>> سابقا خخخخخ >>> بس لازالت توصل 220 بس يبيلها شوي

2006 وصلت 190 بالراحه بعد ولسه تحس باقي دعسه يعني لو ادعس بعد اتوقع تجيب طبلونها ايزي ياعزيزي

**دحوم** · 14-08-2006, 01:24 AM

Thnks For All Boys

**الرويال** · 19-08-2006, 11:03 PM

الله يهديكم بس وشوله السرعه ولو على سبيل التجربه

ترى العين تعشق ان شافت شي لو بالتجربه والرجل تتعود يوم عن يوم

خلك على سرعة حلوه وحاول انك ماتتعداها ولو تعديتها راح تحس برهبه وارجع نزلها

ولا ودي اقول ان الحادث لاقدر الله يجي بثواني وحتى لو الطريق فاضي ممكن يكون خلل فني في السياره

الله يهدينا غصب عنا ونلتزم بالقيادة الصحيحة لعكس صورة مشرفه عن شباب السعودية وضرب اروع الامثال امام من يتهمنا يومياً بالطيش وعدم المبلاة

كلمة احببت اضافتها لعلي احظى بدعوة منكم لا دعا علي وفقنا لكل خير

**دحوم** · 20-08-2006, 08:39 AM

مشكور يا رويال

**black.H.V6** · 20-08-2006, 09:03 AM

دحوم أنا أكوردي سته سلندر موديل 2004 تجيب 220 بالراحه وبعدها تفصل. وصراحة أنا بالقومه قمة على مكسيما 99 ولومينا 2005 سته سلندر وجيب رانجلر 2006 و أوبل..قل ماشاء الله

.. عارف إنك قلتها بس أمزح.

**دحوم** · 20-08-2006, 12:56 PM

black v6 ماشاء الله ماتوقعت ان الاكورد v6 بهذي القوة الله يعطيك من خيرها ويكفيك شرها .

**أكورداوي** · 20-08-2006, 05:28 PM

أقول دحوم ... شفيك خربت .. ؟؟:d

وين المحافظه وين الأهتمام وين قوة الأحلام ..:d

على العموم لوتناقز .. الأكورد ماتتعدى ال 225 لأنها تفصل ... وممكن الوكاله يفكون هالنظام ما أدري ...؟

لكن قل لخويك راعي الكامري .. اذا في راسك خرمة كامري روح لأقرب ليموزين ....:p

**Accord 4 EvEr** · 20-08-2006, 09:19 PM

^
^
^

الا على طاري الكوامري ...

اليوم وانا راجع من الرياض الساعه عشر الصباح بعد ماتعديت الرياض بميه وخمسين كيلو ,,,

جوني اثنين كوامري (كدادين) مشطفين وانا ماشي 160

حققققدت من جد طفيت المكيف وشديت للموتر ...

وماهي الا ثواني وهم جالسين يقرون الكتابه اللي كاتبها انا على الزجاج الخلفي ,,

فددددددددددديت الاكورد .

فوتكوو بعافيه

**دحوم** · 21-08-2006, 12:53 AM

حتى انا ياشباب على طريق الديرة وانا راجع اشوف كامري 2006 صاك الطبلون كله تعداني وانا امشي 150 وماهي إلا ثواني واجيبه واناظر مع المراية ماشاء على الأكورد الرجال اختفى ليس له وجود إلا نوره العالي هههههههههههههههههههههههههههه .

**مجنون اكورد** · 21-08-2006, 01:57 AM

والله التمرين عاامل اسااسي .....عشاان تجييب الطبلوون انا موتري الساابق بعد التمرين يجيب ال220 وبعدين يفصل اما محبوبتي الجديده موديلها 2002 او ما شريتها مستعمل طبعا ما تجيب ال160 ومع التمرين القااسي جبت 235 .....وما تفصل ....

واقوولك اترك عنك السرعه ترى الهوندا بعد 160ما يمديك تثبتها الا اذا تعلمت عليها انا صارلي الحادث كنت ماشي 200 وما قدرت اثبت المووتر يووم زحف واتقلبت بس لو لا الله ثم انظمة السلامه اللي في الاكوورد (2004حقتي اللي صارلي فيها الحادث) كاان انا في خبر كاانه ...

ارجوا اني افدتك ...

مع ارق تحيه

**دحوم** · 21-08-2006, 09:45 AM

يعطيك العافية يامجنون اكورد اكيد افدتني لكن الواحد منا يجيه مسات يعني مثل تكسر خشوم الكامري وغيرها .

مثل مانت خابر .

**ميدو مشاكل** · 21-08-2006, 11:08 AM

بانت فضايح المسرعين

**دحوم** · 21-08-2006, 02:11 PM

وش دعوة ميدو مشاكل يعني الواحد لازم على طول نظامي إذا جاك الشيطان تنسى النظام وتنسى كل شيء .

**سيارة** · 22-08-2006, 04:28 AM

هلا دحووووووم أخبارك

بالنسبة لسيارتي مرة كنت راجع من جدة و أول يوم من رمضان الي راح , كنت مواعد شباب من الرياض عشان نفطر بنصف المسافة الي بينا ألخ الخ ...

المهم كنت داعس على السيارة وآخر شئ جبتة 210 فقط لاغير لكن قبل سنتين خليت الاكورد على طريق الخرج تفصل على الـ 220 .

وشكرا

**accord-se** · 22-08-2006, 10:22 AM

الهوندا معروفه تجيب طبلونها إلا شوي وكذلك المكيف إذا كان شغال يفرق معاك بهذي السالفه

احد اصحابي عنده اكورد 2002 ويذكر لي انه جاب السرعه القصوى 220 وهي طبلونها 240 والضغط على 5 ونص

ما اعتقد ان المسئله مهمه فحتى اللومينا ss ماتجيب طبلونها وذلك لعدة اسباب

عزم السياره
القير
إنسيابية السياره
الجناح
مقاومة الهواء للمركبه

وانا من النوع الي مايحبذ الوصول بأقصى سرعه للسياره لأنه يشكل ضرر علي صحة المحرك وخطوره على السائق

لذلك يادحوم ماعليك من مجانين السرعه وخليك ريلاكس والأكورد حق خطوط الطيران .... اقصد الخطوط السريعه