ظهور ريحة في الهوبات الأمامية للكورد 2008

**خالد العاشي** · 09-04-2008, 06:10 PM

حبايبي السلام عليكم

بصراحه انا توي شاري الكورد 2008 فل اسبيشل ماكملت معي اسبوعين
ومن ثلاث أيام ظهرت لي ريحة الهوبات الأمامية وقلت ممكن تكون ريحه عاديه وأمس واليوم زادت الريحة وحرااااااااااااااااااارة الهوب مولعه ما اقدر حتى اقرب يدي من الهوب ولا الكليبر

والريحه هذي تطلع في اقرب مشوار يعني مو اني ماسك خط او مسرع .

بصراحه انا محتااااااااااااااااااار

تكفون ياشباب اللي له خلفيه في هالموضوع يرد في اقرب وقت والله اني مأجل سفري عشان هالموضوع وهل الوكاله ممكن تستقبل سيارتي عشان هذا الموضوع لو اروح لهم بكره الصباح علما بأني الاسبوع الماضي يوم الخميس كنت عندهم صيانه 1000 كم .

تحياتي للجميع ....

**gogo** · 09-04-2008, 06:38 PM

بسمه تعالى :

السيارة تحت الضمان و يمكنك إرجاعها لقسم الصيانة مرة أخرى لفحص الهوبات و قماش الفرامل و اللذي يبدوا بأنهما لم يتم وزنهما بالشكل المطلوب مما سبب لمزيد من الإحتكاك و فعل تلك الرائحة و هذ المشكل صادفت أحد ملاك أكورد سبيشل بالمنطقة الأمامية للفرامل و تكفلت الشركة بإصلاحها و يتطلب جلب السيارة مبكرآ صباحآ لإستلامها عصرآ حسب كمية السيارات الموجودة بمركز الصيانة ...و حظآ موفقآ .

**B Useful** · 09-04-2008, 06:43 PM

احتمال يكون فية شي ناشب حول الفحمات .. ويسبب هالريحة والاحتكاك ( مدري .. مافية صوت بعد ؟ ) ..

فية شغلة ثانية .. بس ماني عارف كيف اشرحها لك .. لكنها صارت لي وكانت تسبب بحرارة رهيبة للهوب .. والفرامل تخلص بسرعة ...
اللي هي ...
ان الفحمات خير شر في اي وقت .. تكون لازقة في الهوب .. كيف ؟؟؟
لا تسألني لانها صارت لي بعد حادث .. والحل .. لما غيرت الفحمات ... جت معهم قطعة وظيفتهم تبعد الفحمات عن الهوب .. وبعدة كل شي تمام ...

اعتقد من التحليل العادي ... ان فية شي ناشب عندك يسبب هالحرارة والريحة ..
اذا منت صابر لين الوكالة ...
اقرب صناعية ... فك الكفر ... قلة يشيك ع الفحمات ..

امل اني افدتك ..

**خالد العاشي** · 09-04-2008, 07:15 PM

الأخ / gogo
مشكور الف شكر على الإفادة والله يعطيك العافيه .

**خالد العاشي** · 09-04-2008, 07:25 PM

الأخ / كوكو كورد

احتمال يكون فية شي ناشب حول الفحمات .. ويسبب هالريحة والاحتكاك ( مدري .. مافية صوت بعد ؟ ) ..

ما أتوقع ان فيه شيء ناشب وبالنسبة للصوت مافي صوت يطلع .

فية شغلة ثانية .. بس ماني عارف كيف اشرحها لك .. لكنها صارت لي وكانت تسبب بحرارة رهيبة للهوب .. والفرامل تخلص بسرعة ...
اللي هي ...
ان الفحمات خير شر في اي وقت .. تكون لازقة في الهوب .. كيف ؟؟؟

هذي الشغله اللي تقول عليها هي ان الكليبر اللي يركب فيه الفحمات يكون ماااااااسك على الهوب وبهذا يسبب هذي الحركه

وانا شاك في هالشي بس قلت مستحيل السياره ماشاء الله جديده ماكملت اسبوعين

ومشكور ياخوي على اهتمامك بالرد وشاكر لتواصلك معي

**هنادي 8** · 09-04-2008, 07:38 PM

السلام عليكم صارت معي اول ماشريت السياره ووديتها للوكاله وصلحوها لي وقال لي لاتمسك فرامل بقوة لانه يخربها يعني بالعربي من استعمالك..................

تحياتي لك

**B Useful** · 09-04-2008, 07:39 PM

فاهم سالفة الكليفر ..

اللي ما عرفت اشرحة ... في حديدتين صغار ..تنحط بشكل علامة ( اكس ) بين الفحمتين ... وظيفتها توخر الفحمات عن الهوب .. ونظراً لانهم صغار .. لما تضغط فرامل ولا كانهم موجودة .. .الفرامل تؤدي عملها ... بعد ما ترفع رجلك .. يجي دور هالحديدتين .. انها توخر الفحمات عن بعض ...

**خالد العاشي** · 09-04-2008, 09:18 PM

مشكورين اخواني وانا باروح بكره الوكاله وأوافيكم بالخبر من هناك انشاء الله

**accord 06** · 10-04-2008, 12:38 AM

ما اتوقع ان الريحه من الهوبات .. بعدين حرارة الهوبات شي طبيعي

من احتكاك الفحمات فيها

شيك على السياره من تحت يمكن فيه كيس بلاستيك ماسك بالشكمان

و مع كل مشاور تطلع الريحه من الكيس بسبب حرارة الشكمان

<< صارت لي اكثر من مره

**Unlimit** · 10-04-2008, 08:28 AM

فك الكفر ويبان كل شي عند البنشري اما هنا ماراح تستفيد شي وراح توسوس

**migo** · 10-04-2008, 08:59 AM

انا تطلع ريحه بعد بس اتوقع شي عادي توني بس ماشي عليها 200 كيلوا.... الريحه اتوقع تروح بعدين

**خالد العاشي** · 10-04-2008, 11:39 AM

هااااااااااااااااااااااااااااااااااااااااام

اليوم رحت لوكاله من الصباح وأنا مسنتر عند الباب ، المشكله اني جايهم بحماس وفي راسي هواااااااااااااااش

أول ماخشيت للموظف في الصيانه قلت له انا عندي ريحه من الهوبات والظاهر ان الكليبر ماسك !!! ضحك المهندس الهندي

وانا انفجرت ولعت من جد

يعني احر ماعندي ابرد ماعنده .

قال ابو هنود مافي مسكه صديق

تعل خلي شم ريحه

المهم يوم طلعنا عند السياره وباقي ماشم الريحه قال سيارتك مافيها شيء روح للرافعه وشوف ايش فيها من تحت

المهم انا باقي اعصابي متوتره رحت للرافعه اول مارفع السياره واحد سعودي قال لا تخاف الحين اوريك المشكله اللي عندك

يوم ناظرت الا وهو يأشر لي على كيس عالق بالشكمان من قدام ومع حرارة السيارة يطلع ريحه

المهم حاول بالمفك اللي معه يحك الكنداسه والماصوره ونظفها وقال امش خط طويل وانشاء الله تذوب وتروح الريحه .

والحين السيارة تماااااااااااااام وانا :d هههههههههههههه .

**خالد العاشي** · 10-04-2008, 11:42 AM

accord 06

ليتك جيت من امس والله اني ماتهنيت حتى النوم

ههههههههههههههههه

مشكور على مرورك
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــ

Unlimit شاكر لك المتابعه والاهتمام .

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــ

migo مشكور اخوي والف مبروك على لموتر الجديد ولا تخاف واذا تبي تتأكد اقرب بنشري مر عليه وانزل تحت السياره وتابع المواصير حقت الشكمان بتلاقي كيس متحضن جزء من الماصوره

تحياتي

**Accord Black 08** · 10-04-2008, 09:07 PM

انا عندي زيسياتك بس ماعندي الريحه الي تقولها يمكن يتهيالك

**B Useful** · 10-04-2008, 09:29 PM

المشاركة الأصلية كتبت بواسطة Accord Black 08

انا عندي زيسياتك بس ماعندي الريحه الي تقولها يمكن يتهيالك

يتهيأ لي انك ما قريت الرد رقم 12

**gogo** · 10-04-2008, 09:56 PM

بسمه تعالى :

جميع الإحتمالات واردة ^_^ و الحمد لله تعالى أن المشكلة بسيطة و حلها سهل و أفضل شيء هو ذهابك لمركز صيانة هوندا للتأكد من المشكلة و الوقوف على الحقائق بشكل أكثر وضوحآ و أريحية .. مبارك عليك حل المشكلة و توضيح ماهيتها للإستفادة و الإفادة من وجود الحل و التحليل الوارد لحل المشكلة ^_^.. و هنيئآ لك اللورد الياباني ^__^ وشكرآ.

THE LORD OF THE ROAD