الموضوع: شرح مفصل عن تركيب لمبات اللكزس على الاكورد+30صوره

بسم الله الرحمن الرحيم

كيفكم ياشباب
هدو اعصابكم شوي شوي

ياكثر الي استعجل وصدم وياكثر الي استعجل وغص مسكين >>يابو وين رايح..؟؟؟
لكم هالصور وهالشرح وان شاء الله ينال على استحسانكم
واي خدمه انا موجود بالرياض
اركبها لك ... ازبطها لك ... اعلمك الطريقه ع الهواء مباشره ^_^
ماعندي مشكله
طيب الان نبدا ...
تشتري القطعه من الوكاله بقيمة 174 ريال وبعد الخصم تحصلها بـ156 ريال
ممكن تنقص وممكن تزود وشريتها بتاريخ 24-4-1429هـ يوم الاربعاء بـ156 ريال
رقم القطعه..

شكل اللمبات وبالقاعده
تجي جاهزه ...

فيه قاعده لليمين وفيه لليسار
علشان الاسلاك توصل للفتحه الثانيه...
R=يمين (رايت)
L=يسار (ليفت)
(يمكن صح علي ويمكن غلط ترا انا ميح بالعنقريزي):o

هنا تحت بتشوف قاعدة الوكاله كلها كبس وتطلع معاك
ممكن ماحد يعرف ينزلها من مكانها >>عيال النيدو خخخخ

الحين ننزلها مع بعض
تضغطها وتدفها على برا..

طلعت بكل هدووووء وحنان >>حنان هاه ...انتبه لنفسك

بعدين تطلعها من برا وزي كذا ...

شفت شلون طلعت بكل بساطه وسهوله *_^

بعدين تفك اللمبات وهي سهله مايحتاج ولد النيدو
ويطلع سلك اللمبات والفيش كما هو مبن بالصوره
طبعا فيش الوكاله ماتقصه ولا تلمسه ولا تسوي له اي شي ولا تحارشه

وهذي العده المطلوبه
المشرط لقص السلك وقص اللزاق ابو وجهين فقط لا غير
والكامير كانون وهي خربانه ومخلص بطاريتها

وكذا تقص الجلده علشان يطلع السلك واضح فقط لا غير

زي كذا يطلع السلك وعلشان تقطع الفيش..

انقطع السلك>>لا ياشيخ..

شف المكان الفاضي الي عليه دائره هنا تحط اللزاق ابو وجهين اوكي

وبعدين تسوي زي كذا

وتركبها فقط للوزنيه لاحقين خير باقي شي بسيط فقط
1= الكتابه تكون فوق علشان تفرش الانوار على الارض
2= اكيد بيكون تحت >>وشوله حاط رقم 2 ^_^




ولعت اللمبات وشفت الوزنيه ..اوكيه

تم تصغير هذه الصورة. لمشاهدة الصورة بحجمها الكامل اضغط على هذا الشريط. الحجم الأصلي 856x642 والحجم 69KB.

طيب ارجع وطف اللمبات وبعدين تذكر انك راح تركب اللمبات وتشبك الاسلاك والنور مطفي
ولا تشغل ولا شي
علشان مايجي التماس وتاكل هوا
وتطقك ام الركب
الان ترجع القاعده وتحط دار مادار على القاعده (لزاق)
على الحافه علشان تمسك اكثر وبرضو صبر شوي
ليش,, <شوي واجاوبك
انا اقولك ليش ...لان المغاسل تشوف عندهم مسدس حق الماء ويرش على اللمبات وراح يدخل الماء وبع
ين توصل للاسلاك فـعلشان كذا قلت لك حطها على القاعده كلها فهمت يابو ^_^

وتفك اللزاااااااق
ويطلع وجهين
>>بتتصفق انت وشرحك

تركبها من الداخل
وتوزنها زي ماوزنتها بالاول فهمت شلون

1=اليمين لليمين
2= واليسار لليسار
لاتغلط وحط السلك من الداخل
يعني دخل القاعده لحد ماتوصل للمنطقة الثانيه اليمين بس تدخلها من داخل الشنطه

شف شلون ندخلها

فيش الوكاله
الاحمر والاسود
انتبه منهم

لازم تكون مطفي الانوار
وتركب الاسلاك الي باقاعده بفيش الاكورد
شوف اسلاك القاعده
اخضر واسود
الاخضر من الاحمر
والاسود مع الاسود>عاش يالخال خخخخ

1= فيش الوكاله
2= اسلاك القاعده ولازم تكون مدخلها مزبووووط
وبعدين حط شطرطون عليها علشان تمسك ولاتطيح وتقول احترق تلعب على نفسك

الان ركبناها كلها
وشوف كيف طالعه

وتشتغل معنا
وعلى فكره ترا ركبتها مره ثانيه
وركبت قاعده ثاني يعني سلك اللمبات يركب على فيش واحد من افياش الوكاله.. علشان ماتحترق وتميع (تموع)(تذوب) لان لمبات اللكزس (ليد) ومتقوى على 12 فولت حق السياره

شفت شلون طلعت

تم تصغير هذه الصورة. لمشاهدة الصورة بحجمها الكامل اضغط على هذا الشريط. الحجم الأصلي 856x642 والحجم 49KB.


اشكرك كل من وقف معي وساعدني
اخوي ACCORD i-VTEC وكوكو كورد

يمنع نقل الموضوع الا باستأذان من صاحب الموضوع
هذا اجتهاد شخصي وصاحب الموضوع تعب واجتهد
حقوق العمل لـ محمد بن عبدالعزيز
منتديات نادي محبي هوندا

... فكـــيييييت ازمه يااااااااا كويس للاعضاء ...

وأحلى صوره صوره سيارتي

تسلم يمناك لا عدمناك <<< اقول لايكثر

كفوووو والله على الشرح

بس فيه نقطه ما فهمته ....

وش نقص أسلاك القاعدة ولا أسلاك الوكالة وطريقة التوصيل شلووون ؟؟

^^^^^^^^^^^^^^^^^
اكيد جربوها على 2008


يعطيك الف عافيه ابو حميد على الشرح

الاخ يفكر انه يركبها بس ......... <<انت عارف ذا اليومين :d

مشكور ويعطك ألف عافية لاكن عندي بعض الأسئلة الي هي أنا عندي لمبات اللكزس من مبطي الي من اول ماشرتها وانا متحمس لتركيبها وبعد ما مريت محل وقالي توليف قل الحماس ونسيت المبات لاكن بعد ماشفت الموضوع رجع الحماس وانامن الناس الي يحب يشتغل في الموتر على رواقه فرحت وطلعت المبات علشان اعرف الطريقة وطلع فيه كذا اختلاف الي هو أسلاك لمبات اللكزس الي عندي الفيش الأبيض طلع يختلف فيه سلك لونه أخضر والثاني أبيض و بعدين لمبات اللكزس طالعه على خط واحد يعني سلك المبة الي يمين وسلك المبةالي يسار طالعه في سلك واحد سؤالي هل نفصلهن عن بعض او بالسلك الي مشتبكات فيه وهل يعني انه يكون فيه سلك من اسلك الوحة فاضي مايشبك فيه شي واي من اسلك الوحة نشبك فيه الي يمين ولا الي يسار وشكرا............. واسف على الاطالة وللمعلومية سيارتي 2004 .

لا تطولها وهي قصيره ونا خوك
الدعوه مايبيلها توليف ولا شي بس مجرد انك تمسك السلك الي يجمع بين القاعدتين وتشبكه في فيش واحد من اللمبات وبعدين دق تحيه للمبات
الفيش الثاني فاضي مايحتاج شي انت شوف هالصوره وش مسوي فيها


شبكت المبات كلها بفيشين فقط
يعني لو تفصل الطقم الاول خلاص الطقم الثاني يبقى شغال معاك

واسلاك اللمبات اللكزس ماتفصلها ولا تلمسها

ترا الدعوه بسيييييييييييييييييطه فقط فقط فقط

باختصار
فيش لمبات اللكزس تشبكها في احد الافياش الي طالعه لك

وبعدين مب شرط يكون السلك اخضر واحمر واسود

طف نور السياره كلها وبعدين شبكها وشغل النور
واذا اشتغلت زين على زين

واذا ماشتغلت بدل الاسلاك فقط بس لازم تطفي النوم وبعدين تشغل النور لما تشبك الاسلاك

انتبه لما تشبك الاسلاك والنور يشتغل ترا تحرق الفيوز عليك

وبعدين تطقك ام الركب وتاكل هوا
انتبه شغلت الكهرب يبيلها رواقه واي غلطه محسوبه عليك

حسيت اني طولت عليك

بس تحملني وانا ابطلع يمكن احد يسأل ويشوف ردي ويقتبس الاجابه

>>متعوب عليها يقتبس هههههه

سلام

يعطييك الف عافيه ..
بس عندي تعليق صغير على الصور ... !!
اللوحااات نفسها على ال2002 وعلى ال2007 تبغا تجنني
وشغله ثاانيه دبت سياارتك يبغاالها صبغ :p
تحياااتي

^^^ يا ابن الحلال لا تدقق .. ^^^


على فكرة شباب .. افضل نوع لزاق وجهين هو (3m ) ... واللي ما يعرفة يحاول يتعرف علية ..

اللي عندة جناح الوكالة يعرفة .. يجي لازق على الاطراف بالاضافة الي المسامير ..
اللي شرا قطع النيكل لشبك 2008 مني او من B Unique يشوف ويعرف كيف قوتة ..

والله الموفق ,,

المشاركة الأصلية كتبت بواسطة !Green

مشكور اخوي وماقصرت
وانا رحت الوكاله قلتله عندك انوار لكزس Gs تبع اللوحه قالي سعرها 266ريال

>>العفو وناخوك
هي وصلت لـ240 ريال وبعد الخصم صارت بـ174 ريال
وبعدين صارت بـ174 ريال وبعد الخصم بـ156 ريال
انت كلمه وقوله بعد الخصم وروح لفرع ثاني ممكن يفرق>>ترا بعضهم على كيفه اذا بغا يخصم والا لا
واذا قالك وش تبي فيها بتركبها على اي سياره (يعني معروف لمبات اللكزس ماتخرب) قوله صدمني واحد على سيارتي اللكزس جس اس وانكسرة القاعده >>مخرج مخرج ^_^ وانت صرفها بطريقتك هع هع لانها قد صارت لي واذا قلت له اكورد والا كامري ممكن يتفلسف عليك ومايخصم وعلى حسب الشخص

اله يكفينا شر الحوادث

المشاركة الأصلية كتبت بواسطة ن ع ر السعودية 0005

مشكور اخوي أكورد 2002 وإنشاء الله راح اركبها بعد التجمع لان وراي فحص وتجديد الأستمارة :(وتسلم على الرد السريع .......................

>>العفو ركبها على راحتك وحتى انا ابروح افحص هاليومين واذا فضيت دزيت لهم والا ابخليها بعد التجمع تيك يور تايم

المشاركة الأصلية كتبت بواسطة ACCORD i-VTEC

على طاري الفحص وتجديد الاستماره
اخونا 606 مركب اللمبات ولا قالوله ولا شي .. لان بعض الاخوان يخاف يركبها ويسقطونه الفحص
فللمعلوميه ان الفحص الدوري ما يقول شي عليها
والسلام خير الختام

>>تراني ماعرفك .. يسقطون انت الي تتحمل مايسقطون ابجيب لك بيبسي الشرقيه ^_^
زي ماقال لكم العضو 606 فحص ومشى بس لما تركبها حاول انك تخليها مخفيه يعني تدخل الاسلاك وتشرطنها وتمشي امورك ^_*
بس تراني ماعرفك ..

المشاركة الأصلية كتبت بواسطة like.no.other

يعطييك الف عافيه ..
بس عندي تعليق صغير على الصور ... !!
اللوحااات نفسها على ال2002 وعلى ال2007 تبغا تجنني
وشغله ثاانيه دبت سياارتك يبغاالها صبغ :p
تحياااتي

>>الدبه يبيلها صبغ؟؟؟؟لايكون مصنفره بعد المطر(للمعولميه مصورها في وقت مطر بالعماريه >>رايق)
واذا تبي تنجن انت تعال سوالف لاتحط كل تعليقك على نقطه وتسحب على الباقي >>والله تتعب ^_^

المشاركة الأصلية كتبت بواسطة كوكو كورد

^^^ يا ابن الحلال لا تدقق .. ^^^
على فكرة شباب .. افضل نوع لزاق وجهين هو (3m ) ... واللي ما يعرفة يحاول يتعرف علية ..
اللي عندة جناح الوكالة يعرفة .. يجي لازق على الاطراف بالاضافة الي المسامير ..
اللي شرا قطع النيكل لشبك 2008 مني او من B Unique يشوف ويعرف كيف قوتة ..
والله الموفق ,,

ياخي للحين ادور هاللزاق ولو تحصله صدقني طيرااااااااااااان ابروح اشتري >>وابركب حركات ثانيه جاري التفكير حول الفكره (سري للغايه^_^)
وزي ماقال لكم مصعب الي مايعرفه يحاول يتعرف عليه تراه ولد حموله ...
اي خدمه اخرى ... واذا ماعرفت تسويها او خايف تعال للتجمع وانا ازبطها لك بدون مقابل>ينعن ام الخدمات
ولا تروح لبنقالي يسويها ويعدم لك ام الكهرب
والا يمني يقول لازم توليف واصلا ماتركب ومادري ايش
واذا انت مره مره مقتنع في البنقالي ...عطني نص الي بتعطيه واسنعها لك >>ناشب من جد خخخخخخ

المشاركة الأصلية كتبت بواسطة CiviC VIP

قاموس المدح والإطراء لايكفيك يا باش مهندس accord2002

المشاركة الأصلية كتبت بواسطة CiviC VIP

لم تكن في طريقة التركيب أي تعقيد فالشرح مسترسل ولم يكن فيه ثغرات

( الصور زادت المشاركه جمالاً وغدت بلآغاً عن الكلام )

فائق الإحترام والتقدير لكل من شارك في هذا العمل المميز

ابدعت بما سطرت اناملك بعباراتك الرائعه

...

اشكرك على نثر الرد الجميل بين يدي ولك جزيل الشكر على مرورك للموضوع
وترك بصمه فيه اعتز فيها ...

تحياتي..