كرســـــــــــــ ... الاعتراف ...ــــــــــــــي

اقتباس:

---

المشاركة الأصلية كتبت بواسطة المـــــلكـ اكـــــورد

يالله وانا اقول مجوودي

وبسم الله نبدأ :d





اختبار اسئلة سابقة <<دكاترة الجامعة مهوب احسن مننا :)

---

س1-نبذه مختصرة عن ماجد القحطاني ؟؟:)

شخص رومنصي وهادئ يحب الفله واذا مافيه فله اقلبها فله خخخخ ..

س2- ناديك المفضل محليا .. وعالميا .. ولماذا اخترتهم من بين البقيه ..؟؟

الاتحاد .. برشلونة .. الاتحاد احبة من يوم كنت باول متوسط ..

برشلونة احبه عشان اللاعبين اللي فية ولعب نظيف وممتع

س3- أذكر نوع جوالك .. وليه فضلته على غيره ..؟؟

نوكيا E66 شكليته مرة سلسة ورسمي .. ولونه نفس لون سيارتي :d

س4- اللاب توب حقك من أي شركه .. وماهي اهم ميزه تبحث عنها عند شرائك للاب توب ..؟؟

نوعه اسوس .. وجاني هدية طبعا .. وماعمري شريت لاب توب .. وافكر اشتري ماك إبل .. يعجبني الشكل بغض النظر عن الموصافات ..

س5 - تحدث باختصار عن جهاز الألعاب المفضل لديك x box360 or ps3 .. ونوعيه الألعاب اللي تحبها ..؟؟
اذا لم تكن غاوي جيمز .. أذكر العاب تفضلها اخرى مثل البالوت الاونو الكيرم الشطرنج المونوبولي .. :o

احب اللعب بلياردو .. والتنس ..

س6- سياره تأسر قلبك .. تتمنى امتلاكها .. ترى انها تحقق رغباتك .. حدثنا عنها قليلا ..؟؟

السيارات كثيرة طبعا .. لكن كنت افضل سيارة انفنتي FX مرة رووعه رياضية وشبابية وتتقبل التعديلات .. بعدها افضل الاكورد ..
وكنت افكر اشتريها .. لكن ماكتبت لي والحمدالله ربي وفقني وشريت اللي افضلها بعد الانفنتي

:)

اقتباس:

---

المشاركة الأصلية كتبت بواسطة The Stig

^^^^

بدايه طيبه ياطويل العمر :cool:

نعم نعم :d

اول شي : شخصيه ماجد في المنتدى هل تختلف اختلاف كبير عن ماجد في الحقيقه ؟ علل مع ذكر الاسباب ؟ :d

يعني تختلف بنسبة 50%

السبب اشوف الاوضاع مناسبة لجوي او لا ..

ثاني شي : ماجد القحطاني عنده طلعات احيانا صعبه شوي ... يعني الفجر يروح ياخذ له لفتين في التحليه ... علل مع ذكر الاسباب بعد ههههه

بكون معك صريح ..

انا جو الفجرية احبه من بين الاوقات الثانية ..
ثالث شي باليل مااطلع نادرا ..
فمالي الا اصحى بدري منها اخذ دورتين ومنها اتنشط واصحصح

ثالث شي : متى عاده ينام مجووودي ؟

حاليا ولي فترههـ طويله شوي قرابه النص سنة ..

انام بعد العشاء ع طول ..

بتقولون دجاجه :d

بقول من اصحى الفجر عليها الين العشاء .. واكون مرهق جدا

رابع شي : وش اللي يميز سياره مجودي عن غيرها ؟ ووش عندك مشكله مع اللوحه الاماميه :d

والله شوف مافيه شي يميزها ..

انا بنظري اشوفها افضل سياررة ..

لان لمساتي عليها مو مبالغ فيها لدرجة البياخة ..

لمسات خفيفه جدا .. وتعطي منظر ولفت نظر ..

انا اقولك قصتي مع اللوحه الامامية .. انا افكها عشان لوحتي مو ملكية .. وطالع شكلها جدا غبي :d

خامسا : وش يسوي مجودي في حياته العلميه ... يدرس يشتغل ووين وكيف ولعل <

حاليا اطبق بعد الدراسة

سادسا : هل يفكر مجودي بالزواج حاليا او مستقبلا وكيف ولعل ولماذا ؟

لا ماافكر بالزواج البتا البتا :d

السبب ابي استمتع بحياتي قبل ارتبط ..

والاهم الين اكون نفسي واكون قادر على تحمل المسؤلية .. ساعاتها افكر اتزوج

لي رجعه طبعا :d

---

حياك

اقتباس:

---

المشاركة الأصلية كتبت بواسطة ثــلــج مــشــوي

بما انك سميي راح ادلعك :d

تسلم :o

وبما اننا انحشرنا هنا اول لازم نحشرك :d

الدينا كذا يوم لك ويوم عليك

شلونك ؟ ان شاء الله طيب

الحمدالله اللهم لك الحمد

وزنك ؟

52

طولك ؟

169

في اي حي بالرياض ؟ وهل انت مرتاح فيه ؟

ساكن بالدخل .. لا ماني مرتاح جدا ..

لكن فكرة الانتقال الى حيا اخرى موجودهـ

وش رايك في ظاهره الكدش ول انت معهم ولا ضدهم ؟ اذا كنت ضدهم هل تؤيد منعهم ؟

انا معهم وانا مو ضد احد .. بالعكس لهم الحرية وكل شخص قناعات ولازم نحترمها

بس بحدود

مو لدرجة التشوية بالشكل

بكذا يصير ماصخ


عندك بلاك بيري ؟ ووش رايك فيه وطيحه الشباب والبنات فيه

لا ..

من حق الشباب يشوفون وش وضعه الجهاز :d

بعدها تلاحظ كل من شراهـ طفش منه .. وينتقدهـ بالسلبية

وهل يستاهل ولا كلام فاضي ؟

مااقدر احكم الين اجرب

ترتيبك في اسرتك ..؟

الـ6

عمرك ..؟

22

وش رايك بالرياض ..؟ هل هي ديره مؤله للسكن او فقط مدينه اعمال ..؟>>حاقد على زحمتها

الرياض حلوة ومافيها شك ..

بس مثل ماقلت انت .. مشكلتها الزحمة ..

هذي اسئلتي كنت ابجيب كل الاسئله حقت الصفحات الي راحت

بس بما انك سميي ومعك نفس موديل سيارتي مشيت امورك :p

ماشاءالله يخلق من الشبة 40 :d

>>السؤال الي مايجوز لك خله

---

حياك اخوي

بسم الله الرحمن الرحيم
أولاً أحييك على هذا النشاط، "بورك لأمتي في بكورها"، وأنا أتمنى لو استطعت أن أفعل مثلك :)

أما عن الأسئلة، فاعذروني إن لم أقرأ كل ماكتب قبلي (فإن تكرر سؤال يكفيني أن تكتب تحته مكرر):
- ماهي أهدافك في هذه الحياة؟
- هل تعد نفسك من النوع العصبي أم الحالم، هل تغضب وتنفعل فوراً أم تأخذ الأمور بإسترخاء كبير؟
- كأنني لمحت خاتماً (دبلة) في يدك اليسرى، فهل أنت متزوج؟
- أي البلاد أحب إليك (سواء من التي شاهدتا أو سمعت عنها)؟
- هل أنت راض عن شباب هذه الأيام، بشكل عام ألا ترى أن الشباب في السابق كانوا أفضل، وأن الفراغ يزداد جيلاً بعد جيل (بشكل عام وليس الشباب فقط)؟
- ماهي هواياتك؟
- ماهي طريقتك في تقدير الناس، بمعنى آخر عندما ترى شخص عدة مرات مالذي يجعلك تقدره وتحترمه؟
- كيف تكون صداقاتك، وهل أنت من الشخصيات التي تسعى الناس لمصادقتها بالغالب، وأنت تختار فقط؟
- ماذا يشكل الإنترنت من حياتك، نادي محبي هوندا تحديداً؟
- هل فكرت يوماً بعمل موقع، أو هل تطمح لإدارة منشأتك الخاصة في المستقبل؟

وسلامتك (مبدئياً سأكتفي)

اقتباس:

---

المشاركة الأصلية كتبت بواسطة أبان الطباع

بسم الله الرحمن الرحيم

أولاً أحييك على هذا النشاط، "بورك لأمتي في بكورها"، وأنا أتمنى لو استطعت أن أفعل مثلك :)

الله يخليك تسلم

أما عن الأسئلة، فاعذروني إن لم أقرأ كل ماكتب قبلي (فإن تكرر سؤال يكفيني أن تكتب تحته مكرر):

مكرر << :d

- ماهي أهدافك في هذه الحياة؟

اكون صريح معك ..

ماعندي اهداف معينة ..

لكن اسوي اللي علي والباقي ع الله ..

- هل تعد نفسك من النوع العصبي أم الحالم، هل تغضب وتنفعل فوراً أم تأخذ الأمور بإسترخاء كبير؟

انا افقد اعصابي في حاله وحدهـ اذا مااعجبني الوضع اللي قدامي او اذا منعته عن الشي يستمر .. بكذا اتنرفز بسرعه ..

لكن الحمدالله اغلب اوقاتي ماخذ الدنيا بسعه صدر :)

- كأنني لمحت خاتماً (دبلة) في يدك اليسرى، فهل أنت متزوج؟

لا ماتزوجت

ولا خطبت ..

لكن الوضع جاهز باشارة مني على طول وانا معها :d

- أي البلاد أحب إليك (سواء من التي شاهدتا أو سمعت عنها)؟

احب فرنسا والهند

والدول كثيرة بس حبيت اختصرها

- هل أنت راض عن شباب هذه الأيام، بشكل عام ألا ترى أن الشباب في السابق كانوا أفضل، وأن الفراغ يزداد جيلاً بعد جيل (بشكل عام وليس الشباب فقط)؟

والله مو راضي

والفراغ بكل مكان وباي وقت

- ماهي هواياتك؟

بلياردو _ وانترنت

- ماهي طريقتك في تقدير الناس، بمعنى آخر عندما ترى شخص عدة مرات مالذي يجعلك تقدره وتحترمه؟

اسلوبه وطريقة تعامله مع الغير .. والاهم انه مايزعل بسرعه .. ومايكون رسمي بكل الاوقات

- كيف تكون صداقاتك، وهل أنت من الشخصيات التي تسعى الناس لمصادقتها بالغالب، وأنت تختار فقط؟

بني وبينك وبكل صراحة انا من النوع الخجول ..
بمعنى احيان استحي ادخل مع الناس بسبب الخجل

- ماذا يشكل الإنترنت من حياتك، نادي محبي هوندا تحديداً؟

جزء مهم بحياتي :)
ونادي محبي هوندا مستحيل يمر يوم ماادخله

- هل فكرت يوماً بعمل موقع، أو هل تطمح لإدارة منشأتك الخاصة في المستقبل؟

بصراحة لا :)

بس اذا اشراف ممكن << يلمح :d

وسلامتك (مبدئياً سأكتفي)

الله يسلمك

---

حياك

هع هع ., مجووودي ع الكرسي .,!! :A6rb.Com_94:

بسم الله نبدااء <<< أول مره يسأل ورااح أحااول اصير ملقوووف .,

واذا فيه سؤال ماتبي تجاوبه برااحتك .,!!

1- وشو تخصصك .,! وفي اي جامعه أو كليه .,!
2-كيف كان وضعك في ثالث ثانوي ., هل كنت داافور ., .! وكم مره (فقعت ) من المدرسه .,!
3-ليش شريت اكورد .,!!
4- قد حبيت ولالا .,! واذا ايه هل فكرت تتزوحها .,!
5-وشسمه., لو خيرك مدير المنتدي ., أنك تمسك أشرااف ؛<< وأن شاء الله مايصير ذا اليوم ., هع المهم ., اي قسم تختار !!
6-لو دقت عليك بنت ., (ذات الصوت المبحوح) وقالت ., ألووو ., أخبارك .,
انت وش راح تسوي .,!!
7- قد مسكتك الهيئه .,!وليــش ؟؟
8-قد مره أنحجزت ولالا!! وليش.,!
9-متي أخر مره وااحد فقع وجهك .,!! هع وليش .,!!

<< هع أسئله ملخبطه ., ., :aa_confused:
واذا بوه اسئله ., زيااده , رااح ارجــــــع

اهلا وسهلا بمجودي

صباح الخير

عندي كم سؤال ومابي اطول عليك

ماهي اهم طموحات ماجد
( غير الوظيفه والزوجه والعائله )

في طموح خاص بماجد ,, وظيفه معينه شغله حاطها في بالك بتسويها بالمستقبل ؟

وش اكثر شي يعجبك بنادي محبي هوندا ؟

وشي ايجابيات وسلبيات المنتدى ..؟

كم مره تغسل سيارتك بالشهر؟

تكلم شوي عن مرحلة طفولتك ,, هل كنت مدلع ولا ملعون جدفك :d

وش احسن فلم كرتون كنت تتابعه يوم كنت صغير ؟

وسلآمتك ,,:)

اقتباس:

---

المشاركة الأصلية كتبت بواسطة AHN

هع هع ., مجووودي ع الكرسي .,!! :A6rb.Com_94:

تشوف :d

بسم الله نبدااء <<< أول مره يسأل ورااح أحااول اصير ملقوووف .,

الله يستر :p

واذا فيه سؤال ماتبي تجاوبه برااحتك .,!!

ماابي اجاوب :p

1- وشو تخصصك .,! وفي اي جامعه أو كليه .,!

ادارة مكتبية

بالكلية التقنية بالرياض

2-كيف كان وضعك في ثالث ثانوي ., هل كنت داافور ., .! وكم مره (فقعت ) من المدرسه .,!

كان وضعي لا بأس بة الحمدالله ..

يعني مو مرة

بالنسبة بالثانوية نادرا ماافقع :d<< عجبتني الكلمة

يعني تعد بالاصابع ولا تذكر

بس اللي احس اني مجرم فقعات << :d بالمتوسطة كانت احلى ايام


3-ليش شريت اكورد .,!!

كنت خاق معها بعد االانفنتي ..

وكل مااشوفها بشارع تمشي تكون عيني عليها الين تختفي عن الانظار

4- قد حبيت ولالا .,! واذا ايه هل فكرت تتزوحها .,!

لا ابدا :d

اغلبها انحب مو احب :d

5-وشسمه., لو خيرك مدير المنتدي ., أنك تمسك أشرااف ؛<< وأن شاء الله مايصير ذا اليوم ., هع المهم ., اي قسم تختار !!

قسم استراحة الاعضاء :o


6-لو دقت عليك بنت ., (ذات الصوت المبحوح) وقالت ., ألووو ., أخبارك .,
انت وش راح تسوي .,!!

ابد كالعادة اخذ منها المفيد واشوف وش عندها بالاخير اول من يسكر بوجه الثاني طبعا انا :d

7- قد مسكتك الهيئه .,!وليــش ؟؟

مسكتني الهيئة مرة ..
كنت باحد الاسواق ..
وكنت لابس تكميلة ..( سبورت )
وشعري طوويل

ودوبي نازل من السيارة عشان محل جوالات ابي امرهـ
شوي الا الهيئة معي .. قال وين .. قلت ابد بروح لمحل جوالات وطالع بعد شوي ..
قال ديور واطلع .. قلت ليش سلامات .. قال بس شكلك كذا ملفت للانظار ..
يعني رح الحين ..
ماحبيت اكثر كلام ويطير شعري ..قلت ابشر ..

شوي وامشي يوم شفتهم راحو دخلت مع المسار الثاني .. اثاريهم يراقبوني .. دخلت محل الجوالات وطلعت ..

ورحت للسيارة .. قبل مااركب .. قال وش قلت لك .. قلت مراقبني صح .. قال ايه وليش ماطلعت ..

قلت اجل مالك اي حجة دامك شفتني بعينك وين رحت ..

قال تدري وش نفسي فيه .. قلت وش ..

قال احلق شعرك .. بس المره هذي سماح .. قلت مشكور .. وامشي


8-قد مره أنحجزت ولالا!! وليش.,!

ولا مرة الحمدالله ..

9-متي أخر مره وااحد فقع وجهك .,!! هع وليش .,!!

امممم بثاني ثانوي

<< هع أسئله ملخبطه ., ., :aa_confused:
واذا بوه اسئله ., زيااده , رااح ارجــــــع

حياك يعطيك العافية

---

حياااك

اللي بعدووووو :d

اقتباس:

---

المشاركة الأصلية كتبت بواسطة فقير الحظ

اهلا وسهلا بمجودي


اهنن اهنن

صباح الخير

صباح النور << باقي دقيقه وتجي مساء :d

عندي كم سؤال ومابي اطول عليك

تفضل

ماهي اهم طموحات ماجد
( غير الوظيفه والزوجه والعائله )

في طموح خاص بماجد ,, وظيفه معينه شغله حاطها في بالك بتسويها بالمستقبل ؟

الصراحة ودي افتح لي محل عطورات او محل نظارات

وش اكثر شي يعجبك بنادي محبي هوندا ؟

يعجبني كل شي من اعضاء ومن اقسام ..

ولا اخفيك اني استفدت الشي الكثير ..

وشي ايجابيات وسلبيات المنتدى ..؟

سؤال شوي صعب :d

هو طبعا واكيد فيه .. بس مااقدر اجاوب شوي صعب علي

كم مره تغسل سيارتك بالشهر؟

مرتين بالقوة 3

تكلم شوي عن مرحلة طفولتك ,, هل كنت مدلع ولا ملعون جدفك :d

والله تقدر تقول مدلع طبعا اكثر شي من الوالدة الله يخليها لي



وش احسن فلم كرتون كنت تتابعه يوم كنت صغير ؟

كابتن ماجد وماوكلي

وسلآمتك ,,:)

الله يسلمك

---

حياااك ..

اللي بعدوووو

مسلخير :d


مجووودي شلوونكـ ,,


وش الدول الي سافرت لها ,,

ماهي المدن الي زرتها فالمملكه


وش افضل المدن الي زرتها بالسعوديه ..؟


طيب لو قالولك واللهي يا مجودي مافي سكن بالرياض يالله شوفلك ديره ثانيه وين تختار اي مدينه :shocking: ,,



تشجع اي نادي

محلياً .. اسيوياً .. عالمياً


شخص ودك تصير مثله


من هو قدوتك بالحياة >> بعد الرسول (ص) وابوك وجدك وجماعتك
يعني شخصيه كذا معجب فيها


لو حصلت لك وظيفه بشركات الجبيل تشتغل فيها ؟


لي رجعه وان شاء الله اسئلتي خفيفه عليك >> اي هين :d

اقتباس:

---

المشاركة الأصلية كتبت بواسطة فقير الحظ

مسلخير :d

مساء النور

مجووودي شلوونكـ ,,

تمام ياغالي ..

وش الدول الي سافرت لها ,,

ماسافرت خارج المملكة

ماهي المدن الي زرتها فالمملكه

مكة
أبها
جدة
الشرقية ومشتقاتها
القصيم
الخرج << :d

وش افضل المدن الي زرتها بالسعوديه ..؟

اللي ذكرتها فوق وزرتها ..

طيب لو قالولك واللهي يا مجودي مافي سكن بالرياض يالله شوفلك ديره ثانيه وين تختار اي مدينه :shocking: ,,

تخيلاتك ياعزيزي :d
الشرقية
او
القصيم

تشجع اي نادي

محلياً .. اسيوياً .. عالمياً

مكرر سؤالك .. لكن بجاوب

الاتحاد
عالميا برشا
والبرازيل

شخص ودك تصير مثله

الدكتور ميسرهـ

من هو قدوتك بالحياة >> بعد الرسول (ص) وابوك وجدك وجماعتك
يعني شخصيه كذا معجب فيها

اول شي مايجوز تقول (ص)
هذا اللي سمعته ..
كملها الى صلى الله علية وسلم

مافيه احد ببالي حاليا

لو حصلت لك وظيفه بشركات الجبيل تشتغل فيها ؟

بكل تأكيد نعم اذا مغرية ..

لي رجعه وان شاء الله اسئلتي خفيفه عليك >> اي هين :d

حياك بأي وقت

---

منور ياباشا ..

اللي بعدووووووو

هع هع .,
كــنــتـــيــوأااأاأأاأأ

1- وقت فرااغك وش تسوي ., !
2-اشوفك تااكي بالمنتدي 24 سااعه ., مااعندك شغله ,! هع
3-كم وااحد عندك بالمسن .,!!
4-أقرب شخص لك في حيااتك منهو .,!!
5-وشو الشئ الي تخااف منه .,!!
6-ذكرت قبل ., اذا شوتووك من الرياض ., وقلت بتسكن بالشرقيه والقصيم ., ولـــيش .,!!
7-متي أخر مره صحت ( بكيت) وليش .,!
8- موقف حزين لك .,! و موقف مضحك ., وموقف محرج .,!أذكر كلوااحد بأختصار .,؟! هع
9-لو جااتك قناة (MBC) وقاالو يا مجوودي نبيك ., تصير مقدم في MBC3 وتتصير موذيع مع البنت ضيك :o ., بتواافق ولالا .,
10-كلمة شكر ., ودك تقدمها لآحد ., ليش ومنهو .,!

اقتباس:

---

المشاركة الأصلية كتبت بواسطة AHN

هع هع .,

كــنــتـــيــوأااأاأأاأأ

:eek:

1- وقت فرااغك وش تسوي ., !

ياأنام او ادخل الانترنت ..

2-اشوفك تااكي بالمنتدي 24 سااعه ., مااعندك شغله ,! هع

فراغ << :d

3-كم وااحد عندك بالمسن .,!!

5 اميلات ..بعد الحسابات التقريبية ..
1/ فيه فوق ال50 ..
2/ تقريبا بحدود ال40
3/ 20 بالتمام ..
4/ 18 بالتمام ..
5/ فيه 6 ..

4-أقرب شخص لك في حيااتك منهو .,!!

الوالدة ..

برى العائلة مافيه احد

5-وشو الشئ الي تخااف منه .,!!

من كل شي

6-ذكرت قبل ., اذا شوتووك من الرياض ., وقلت بتسكن بالشرقيه والقصيم ., ولـــيش .,!!

عاجبيني

7-متي أخر مره صحت ( بكيت) وليش .,!

باول ثانوي شوتني اخوي الين ماصحت ..

السبب طلعت من البيت ورجعت متأخر :d

8- موقف حزين لك .,! و موقف مضحك ., وموقف محرج .,!أذكر كلوااحد بأختصار .,؟! هع

الحزين / اعز اصدقائي توفى قبل فترهـ ( الله يرحمة )
مضحك ومحرج / مرة كنت بالسوق مع الوالدهـ شوي بالمحل مشت الوالدهـ جنب وحدهـ بتروح للقسم الثاني انا ماانتبهت جيت للحرمة الثاني وقلت هاهـ خلصتي؟ ماشفت رد ! اللتفتت علي الوالدة وقعدت تضحك ..
انا انحرجت من الموقف شوي يوم رحت للوالدهـ قعد اضحك

9-لو جااتك قناة (MBC) وقاالو يا مجوودي نبيك ., تصير مقدم في MBC3 وتتصير موذيع مع البنت ضيك :o ., بتواافق ولالا .,

امممم بشرط راتب مغري
والمذيعة يفصلونها ويجبون وحدهـ ثانيه

<< طرار ويتشرط :d

10-كلمة شكر ., ودك تقدمها لآحد ., ليش ومنهو .,!

اقدم شكري لكل اعضاء المنتدى
وبالاخص اللي امون عليهم وقريبين مني ..

ليش / وش دخلك :p

---

حياااااااااكـ

اطــــــــــــــــــآلب باستجواب العضو محال عزووز والله لاطلع حرتي فييك



بلززززز وجهوا له الدعوة عل الخااص والله لاسلخك سلللخ