قولولي ليـــــــه ؟؟
أرجوك إقرأ الموضوع مو خسران شي كلها دقايق
السلام عليكم يا شباب انشالله ان تكون اموركم كلها بخير
[color="red"]
الحمدلله والصلاة والسلام على نبينا محمد صلى الله عليه وسلم
أسأل الله أن يثيبنا وإياكم صالح الأعمال يمحوا سيئاتنا ويبدلها حسنات ....
عندي ملاحظات اراها واواجهها ايضاً بشكل يومي
وهي واضحة جداً للعيان ولكن كم تمنيت أن اسمع احداً يناقشها او ينتقدها او حتى يقوم بذكرها
في البداية اود ان اتحدث عن ظاهرة نواجهها كل يوم وفي كل لحظة
اثناء قيادتنا للسيارة
سواء كنت متجهاً لعملك او للسوق او اياً كانت وجهتك وهي
عدم التسامح وفتح المسارات لغيرك ليمر
يعني اذا كنت انت ماشي في اليمين وجيت تدخل للمسرب اللي عاليسار
وكنت مؤدب ومحترم وأعطيت غماز " اشاره ضوئية " تجد ان النتيجه عكسيه
وان اللي على يسارك وان كان امامه مسافه كافيه لك لتمر امامه شاحنه فهو يرمي قدمة
بقدر ما اعطاه الله من قوة على دواسة البنزين ويسررررررع
ويطلق العنان للمنبه "الزامور " البوري" طااااااااط
ويكبس العالي و و و ...... الخ
انتم تعرفون البقيه طبعاً هذا اذا ما طالتك مسبه او تفله منه
اذا كان صاحب جسم ذو عضلات وواثق انك لو تفكر تنزل تتهاوش معه بيفقع وجهك ...
وهذا يولد عندك رد فعل عكسي يخليك تبدأ تتصرف مثله مع غيرك من الناس
لكن هل فكرت ليه تسوي كذا ياخي وش وراك ليه مستعجل الدنا ما بتطير
اذا انت دخلت قدام احد او احد دخل قدامك
لا تظن انك بيل غيتس وان الملايين بتنقص مع الوقت او ان الشارع لك وحدك
وحتى عند المخارج والمداخل من خط الخدمه للخط السريع ...مثال.
تكون انت واقف بالدور بكل أدب وفي آمان الله و تنظر رحمة رب العالمين
انه يخلي هالعسكري المسكين اللي واقف بالحر قرفان يفك المدخل
ويمرر السيارات واول ما يجيك الدور تلاقي واحد من اقصى اليمين
معه جمس او غــــــيــــــــره طمر الرصيف
وعدا عن كل اللي واقفين بالصف الطوووووووووييييييييل
حق السيارات ونقز قدامك بدون احم او دستور واخذ دورك طيب
ليه كذا يا شباب مو الرسول صلى الله عليه وسلم
امرنا انه نعطي الطريق حقه
وليه نرمي المناديل او الورق بالخط السريع
ليه اذا القدامنا اذا ما وخر نلحم الصدام في الصدام " مو يمكن شايب او معه عائلة او أطفال في السيارة ؟؟ "
^^^^ طبعاً هذا بعد ما تكون حضرتك عميته بالزينون عالي واطي تكبيس طق طق طق طق
ليه ما نفتح خط لغيرنا في الطرق السريعة
ليه ما نمرر غيرنا قدامنا بتسامح
ليه اذا احد ناظر فيك تعطيه ذيك النظره وتقول بصوت تخين وش عندك تناظر " يعنني انت زكرت "
^^^^ ليه ما نتبسم بوجهه ونسلم عليه
ليه عند اشارة المرور ننقز من اقصى اليمين ونتعدى
امة لا اله الا الله ونيجي ونوقف قدامهم بعد الإشاره بالعرض بنص الشارع
او نوقف في المسرب الأيمن ونقفله ما نبي نروح يمين نبي نروح على طول
طيب وش ذنب اللي بيدخلوا يمين ينتظروا الإشارة معك
ليه اذا مرت اسعاف بالخط السريع وقت الزحمة تبي تلحم
في ام الإسعاف لانه بيفتحلك الخط طيب مو يمكن يوقف فجأة وتصقعه انت من ورا
ليه الشباب اللي مقضين وقتهم دوجان وفرفره بالموتر مستعجلين والمصيبه انهم مو رايحين مكان !!!!
ليه ما نراعي القوانين في السرعة اذا مافي رقيب اليس الله يرانا
ليه طول ما احنا سايقيين معصبين ونسب ونشتم ونحد هذا ونؤذي هذاك
ليه نفرد عضلاتنا على أصحاب الليموزينات ترا السواقين هذولي بشر زينا وماجو هنا الا يترزقون الله
ليه نروح الأسواق يوم الأربعاء والخميس ونرفع صوت المسجل عند البوابات ياخي ترضاها لأهلك
ليه تزعج السيكيوروتي حق السوق تبي تدخل غصب وانت عارف انه اليومين هذولي عوائل اربعاء وخميس
-------------------------------
يعني عشان الناس تهابك لازم
تكون صاحب مرايه مايله وماشي على لمبات السكن " الطقه الأولى " والكرسي منسدح ووجهك مو باين نصه من الشباك اللي بجنبك و تنتقل من المسار إلى آخر وبدون اعطاء اي اشاره او تنبيه وجيت وحديت اللي بجبك وضايقته ودخلت قدامه غصب ومن دون ما تناظر لا بمرايه ولا بغيره انت كذا ما انت قاعد تفرض احترامك بالعكس انت قاعد تخلي الناس تحتقرك وتقول عنك انسان متخلف وجاهل ورجعي ..
-------------------------------
اما الموضوع الثاني يا شباب وهو الأسوأ
أكيد في كثير مننا يا شباب يعرف موقع اليوتيوب youtube
وهو موقع مليء بالمقاطع المتنوعة وبكل ما يخطر على بالك
ولكن من منكم وهو يشاهد المقاطع نزل لتحت شوي وبدأ يقرأ التعليقات
صدقاً شيء مخزي
سب وشتم وقذف محصنات واعتداء على الدين وسب للذات الإلهية وعنصريه وقبليه وطائفية
ليـــــــــــــــــــــه ؟!!!!!! قبل ما احد يجي يرد على احد يفكر شوي
ان في يهود واسرائليين كمان يقرأون اللغة العربية وبطلاقه بيشوفوا هالبلاوي وبينبسطوا انه الأمه العربية متفرقة
وهم بيرتاحون وبتطمنون انهم ما بيحاربونا لاننا قاعدين نحارب بعض ومتفرقين
وأسوأ ما قرأت من يتهكمون على فلسطين
ويقولون يا فليسطـ .. ي << حذفت للرقابة
ولكن قائلها هل يعلم بنه يسب ارض شريفه
بها اول قبلة صلى لها الناس القدس الشريف ومسجد قبة الصخرة
حيث من هناك عرج بنبينا محمد صلى الله عليه وسلم فهل يرضى هذا المسلم ان تسب مكة امامه ؟؟
ولزيادة معلوماتكم ان اسرئيل ارسلت الآف الطلاب لبعض الدول العربيه لدراسة دينها وتعلم لغتها وعاداتها
لذا تجنبوا سبهم فهم سيردون عليلكم بتعريض الله والنبي صلى الله عليه وسلم بكلام لا يقبله قلب ولا روح مسلمة طاهرة
ولا ننسى أن السب والعنف اللفظي من علامات ضعف محتوى القول والفكر الذي يحمله.
-------------------------------
الموضوع الثالث والأخير
هو مجرد طلب ادعولي يا شباب بالتوفيق والهداية والرزق أسأل الله لي ولكم الهداية والعافية والرزق الحلال وأعتذر على الإطاله ولكن اردت ان اخرج المكنون بصدري
رد مع اقتباس
مواقع النشر (المفضلة)