اقتباس المشاركة الأصلية كتبت بواسطة كوكو كورد مشاهدة المشاركة
ذكرياتي مع العيد قبل 10 الى 15 سنة ..!

* يوم كنا نسافر مع ابوي وكان الخط 13 ساعة !! مدري هو مايسرع ولا الطفولة وقتها غير ..!
* يوم كنا نشتري كل شي جديد ، اجل تقول لي شاري شماغ جديد ؟؟
* يوم نصلي العيد في مسجد بعيد في مكة وجدي الاول كان يسوق سيارتة والمسجد عندة ملاهي ويقولون اذا عقلتوا نوديكم الملاهي وبعد الصلاة يقولون مافية ملاهي ..
* العيد في الليل نروح جدة كالعادة عزيمة جدي الثاني والعشا رز سليق والملاعق بلاستيك ونبدا حفلة الترجيم مع عيال خالي ترجيم رز !! وزرف الببسي الصغير والنحشة بعد الاكل مباشرة عشان مانشيل شي من الاكل !! ثم طراطيع ونعلب طش وموية وثلج حتى الثمالة ... الحوش ذيك الايام كان كبير وفية مخابي كثيرة .. الحين اسأل نفسي وين راح الحوش ؟ مع انة نفسة ماتغير فية شي !
* العيديات مستمرة من زمن الطفولة ،، واحلى شي فيها كل ما تكبر كل ما تزيد عيديتك <<< كل ما تكبر دراسياً طبعاً .


العيد الحين ومن قبل 5 سنوات بدأت سماجتة ..

* صرنا حنا اللي نسوق طول الخط مع الاهل وخلال 6 ساعات وانت فية مكة ..
* ماودك تقوم تصلي العيد ..!
* وين اقرب مسجد <<< رايح مشي للمسجد اللي جنبهم ..! وقعدت برا المسجد يقال لي اغير جو وطلع الجو كل مالة يحتر ..!
* وين يوم كنا نجتمع في سيارتين او ثلاث .. سيارة للمبزرة وسيارة للرجال وسيارة مظللة
* عمي نايم في البيت لي 7 سنوات اذكرة ما صلى العيد ..!
* الجو بايخ .. ماودك تسلم على احد وعيال عمي المبزرة جايين يسلمون علي ..وش يحسون فية <<<< مدري يوم كنا صغار ونسلم على الكبار كانو يقولون نفس الشي ؟؟؟
* عيال خالي اللي كنت العب معهم طش وموية وثلج كل واحد شرا سيارة طبعاً .. صرنا حتى بالقوة نجتمع جنب بعض .. !! ما بيننا شي .. بس المشواير اللي تطلع في اوقات بايخة ..
* العيديات ... ابحسبها لكم الرد القادم .. بس انها كثيييييرة
* بدال ما كنا نتجمع في بيت جدي .. صرنا نستاجر استراحة او استراحتين او نروح استراحة خالي اذا جمعتنا خفيفة ... مدري .. هو بيت جدي صغر ؟ ولا ايام الطفولة كل شي كان كبير ؟
* طبعاً الثوب جديد .. الشماغ من سنتين ما غيرتة كنة جديد اللهم غسيل وكوي انت اشتر اصلي ويعيش معك البسام مايفيير <<< هو نفسة حق B Unique يوم بالغلط بدل اشمغتنا عند المغسلة وسافر كمل طريقة وكتشف الغلطة يوم وصل !!


الزبدة والمختصر المفيد .. اني كنت كاتب بشكل افضل من النقاط لكن محمد بن عبد العزيز ارسل لي الرابط ع المسن والمتصفح الغبي فتحة مرة ثانية على نفس الرابط الاول وراح اللي كتبتة ..
المختصر المفيد .. عيدك مع جماعتك واقاربك ولا احلى حتى عمر معين ... والعيد صراحة اشوفة في جمعة الليل اطلق من جمعة النهار ..

* بديت اكتب الرد يوم الموضوع توة نازل ، وراح الرد ورجعت اكتب .. ثم فطرت والحين جاي اكمل وابشركم عمي اللي ينوم عن العيد من 7 سنوات قام افطر معانا ..

باقي شي مهم ماراح مع كل الاعياد ،، شي باقي ،، شي اصيل ..

مع كل عيد في مكة فية حلاوة اسمها ( بيض الكوكو ) ما اشوفها الا كل عيد بس ..!

هذي صورتها والثانية بالمرفقات :



اذكر كان لونها ابيض بس .. الحين فية وردي ..! يجي ..

الذكريات كثيرة ،،، لو اكتبها اباخذ كل الموضوع .. لكني بكتها قريب في مدونتي www.mosab.me

وفي النهاية .. كل واحد يصحى من نومة وهو يختار .. اذا كانة يبي يومة فلة ،، راح يعيش الفلة لو كل شي كئيب ..
ولو كان يبي يومة كآبة وام العبيد في راسة .. بيصير اسوأ يوم في حياتة حتى لو انة عيد ..

استمعوا بعيدكم ،، وخلوة يوم التواصل مع اصدقائم القدامى واقاربكم واللي بينكم حزازيات ، هذا يوم الفرحة ويوم التواصل والتصالح ،، اذا ما تصالحتوا اليوم .. بكرة بتبكي عند قبرة وتقول ليتة سامحتة وسامحني..


كل عام وانتم بخير وتقبل الله منا ومنكم صالح الاعمال واعادة علينا وعليكم وانتم بأفضل حال ...
والله رد مسكت
يالبى قلبكـ يامصعب ;)
على فكرهـ احشني يا زيبينا :d