أهلين بالشباب ...
بصراحة ودي أعلق على بعض النقاط في الموضوع .

بصراحة الشكل الجديد مجرم و جبار و الناس أذواق و أنا عجبتني السيارة بقوة , و من ناحية المكينة فمعروفة نيسان , يعني لا تعليق مكاين جبارة و المكينة الجديدة امتداد لسلسة محركات الـ vq الحائزة على جوائز من أحسن محركات العالم لأكثر من 14 سنة . يعني بتشتري سيارة و تنسى مكينتها .

زي ما قال اسماعيل مكينة 3.5 و طبعا v6 يطلع منها حدود الـ 290 حصان ترى شي قوي و لا يستهان فيه ابدا , إذا الألتيما زي إللي معاي 257 حصان و قوية , الماكسيما كيف !

و طبعا أكيد و الكل فيكم عارف إن الماكسيما طراز أعلى و أفخم من الألتيما , و لا تقارن بالأكورد أو حتى الأوريون , معليش الأوريون ما فيها إلا مكينة , الباقي كله كامري ترقيع و بس . أما الأكورد معليش يعني مستحيل أدفع 115.000 ريال في سيارة " فاضية " ما فيها أي مواصفات . و لو تقارنوا بنفسكم و بدون تحيز الأكورد بالماكسيما , أغلبكم راح يبيع سياراتهم و يشترون المكسيما .

بعدين ابغاكم يوم تروحون تشوفون المكسيما على الطبيعة في الصالة , روحو شوفو بعدها الإنفينتي الـ fx الجديد . نفس السيارة من الداخل , يعني إنت معاك سيارة قمة في الفخامة في فئتها .
أنا صاحبي معاه g35 موديل 2008 أنصدم لما شاف الماكسيما ! فيها أشياء ماهي موجودة عنده مثل نظام تبريد و تدفئة المقاعد و الـ cvt و الجنط الرائع مقاس 19 إنش غير مقعد السائق تقدر تتحكم في الجزء الأمامي منه .

إللي يقول على السعر , ترى جدا حلو تبدأ من 99.000 ريال و الفل منها 126.000 ريال و البانوراما بينزل السنة الجاية بـ 135.000 ريال . و الله سيارة جبارة و مواصفاتها مرة حلوة .

و لا تجي تقول أودي , خلي ضمانها يخلص و شوف كيف إذا ما بكيت جنبها , بتتلسع قطع غيار إلين تقول آمين ... تقولي لكزس ! قارن بين الـ es و الماكسيما الجديدة .... ما أعتقد بتلاقي فروق كبيرة بينهم . حتى الـ is أصلا سيارة ما أتقبلتها , ليش أدفع في كورولا 160.000 ريال !
و نيسان منزلة الماكسيما كمنافس للأفالون , و هنا بأقول للأفالون أستريحي بقوة .... جا من يكسر راسك و يسحبك من السوق صح .

يا شباب حاولو تحطوا في بالكم إن كل الشركات بتحاول تتطور في سياراتها للأفضل و أهم ما عندها رضى العميل و راحته بتوفير سيارة فيها مواصفات تريح الواحد , مو مثل هوندا .... يالله نفس السيارة اللهم بس يغيرون الشكل و بس . قارن بين أكورد 2003 - 2007 و الأكورد 2008 - 2009 الستاندرد ..... إيش يميزهم عن بعض غير إن الجديدة فيها mp3 و مثبت سرعة و تحكم بالصوت .... طيب ما جبتو شي جديد . و تعال شوف شكل القير حق الأكورد الجديدة , بالله هذا منظر قير ؟ راكب غلط بالقوة . و ربي إن قير الكامري أحلى .
شوف التطور إللي صار في الماكسيما و قارن بينها و بين الموديل القديم , راح تلاقي تطور و فروقات كثيرة جدا .

أنا ما أكره الأكورد رغم إنها كرهتني عيشتي و ندمت إني أشتريتها , بالعكس إلين اليوم و بكرة أنا أعشقها , لكن لازم أعترف إنها فشلت أمام الماكسيما الجديدة في كل شي ما عدا الشكل الخارجي لأن مسألته ذوق .

و هنا راح نشوف كيف راح تمشي مبيعات الأكورد .
كم سعر الفل 4 سلندر الأكورد ؟ أعتقد بين الـ 95.000 و 99.000 ريال . طيب الماكسيما ستاندرد مواصفات أحلى من الأكورد و بنفس السعر , الفرق بس في الجلد و الكشافات . و الباقي كله لصالح المكسيما .

الشي الوحيد إللي ما عجبني في المكسيما و بصراحة هو أبدا ما هو عيب لكن أنا يهمني .
السيارة ما زالت دفع أمامي , لو إنها دفع خلفي بتكون أحلى شي راح تسويه نيسان .
في النهاية أنا عارف إني راح أواجه انتقاد قوي من كثير من أعضاء المنتدى بسبب كلامي لكن أنا مستعد , هذي وجهة نظري و ما ألزم أحد فيها .....
محجوب ترى في الستاندر الأسيات للسائق و الراكب كهرباء بالكامل مع ذاكرة بوضعيتين لمقعد السائق .