ما راح انساك

[م م و السعوديه 5 5 7]

في اصعب يوم مر علي بحياتي
وصلتني رساله من جوال الغالي
افتح الرساله ...اقرأها..ارجع اقفلها
مرة مرتين ثلاث مرات ومرات
اقول لا لا يمكن فيه شيء خطأ
يمكن مو جوال صلاح
اتأكد من الرقم اقول اكيد اللي مات موصلاح
يمكن واحد ثاني يمكن مقلب!!
قفلت الرساله بعدها بلحظات كتبت موضوع في المنتدى
ابي اي احد يجي يكذبني !
لقيت موضوع مثبت لأخوي مصعب(صلاح الى رحمة الله)
اتأكد من الموضوع والله نفس نص الرساله اللي وصلتني
ارجع واكذب نفسي واقول اكيد انا احلم بعد شوي بقعد واشوف كل هذا ما صار
يمر اليوم الاول
عايش حياتي بس مصدوم اكل اشرب اسولف اطلع مع اخوياي
يكلمني مصعب يعزيني وانا للحين مو مصدق
يكلمني اخوي يقول هذا صاحبكم اللي توفى صح؟!!
ليش ما كلمتنا نروح نصلي عليه ونقوم بالواجب وانا للحين مو مصدق
وصلتني نفس الرساله الاولى من جوال صلاح مرة ثانيه
يعني الموضوع حقيقه مو حلم!
صرت ادخل المنتدى كل ساعتين واشوف الموضوع بس ما اصدق
يمر اليوم الثاني
نفس الشيء
واليوم الثالث نفس الشيء
اقسم بالله العظيم مرت هالثلاث الايام وانا باقي انتظر متى
اقعد من النوم واشوف كل هذا حلم وينتهي كل شيء
ثلاث ايام ماني مستوعب وش اللي يصير حولي
كل شيء كان بالحركة البطيئة هدوووء
اسمع اصوات اللي حولي خافته
كاني مثل الصنم بدون احساس
رجعت ادخل المنتدى على موضوع مصعب ابي اتأكد
وكالعاده ما اصدق
انتبهت لموضوع ثاني(آخر ماكتب صلاح...)
قريت الموضوع صراحة كلام يقطع القلب
كنت اقرا وابكي أقرأ وابكي
على هالحال فوق الاربع ساعات
عرفت ان اللي يصير حقيقه مو حلم
حسيت بضيقه مايعلم فيها الا الله
انغبنت ضاقت بي الدنيا
من هول الصدمة والموقف
ما ادري وش اسوي
من غير شعوري
شالتني رجولي لحضن أمي
أبكي كأني طفل صغير
الغاليه اول مرة تشوفني بهالحاله
وش فيك ياولد
اذكر الله
بسم الله عليك
تكلم وش بلاك
بسم الله عليك تكرر
مدري كيف طلعت من لساني
كررتها مرتين وقلبي يحترق
صاحبي مااات..صاحبي مااات
....

رحمة الله عليك ياصلاح
شخص عرفته عن طريق هالمنتدى من خمس او ست سنين تقريبا
ثلاث سنوات منها عشناها مع بعض مثل الاخوان لا والله أكثر بعد
عايشين مع بعض..نسكن مع بعض..ناكل من صحن واحد
نلبس مع بعض.. نسافر مع بعض..نطلع كل يوم..
ماكنا نفترق ابد..يعرف عني كل شيء..واعرف عنه كل شيء
كل صغيره وكبيره حتى حياته الخاصه ..
وش اكل ..وش شرب.. متى نام ..متى قعد..وش سوا هاليوم
وش يحب وش يكره.حتى لو كان مو حولي مسافر مثلا..كان يعلمني بكل هالاشياء
ومتواصل معي تخيلوا أكثر من 11 ألف رساله في جوالي كلها من صلاح بس
أصلا الجوال نفسه هديه من صلاح
خاتمي..الساعه..العطر..التعليقه اللي في سيارتي..الجاكيت اللي يدفيني في البرد...
كل شيء في حياتي كان صلاح
بس الحين خلااااااااص راح صلاح
تركني بلحالي
تركني جسد من غير روح..ميت بين احياء يرزقون
آآآآآآآه وش بيعوضني عنك ياصلاح..تفداك الدنيا باللي فيها
وش اللي بيجبر بخاطري ..والله فقدتك يالغلا
عيني ماراح تشوفك بالدنيا ثاني
انا لله وانا اليه راجعوون
الله يرحمك ياصلاح
الله يرحمك يالغالي
الله يرحمك يا اغلى من الغالين
ياب اجمعني به في جناتك كما جمعتنا في الدنيا على حبك وطاعتك
كان دايم يقول انا مسكين
بس محد يدري ليش الا انا
دايم كان يسألني وش تتمنى ياعزوز
اقوله يومي قبل يومك
يتضايق ويزعل ويقول ان شاء الله العكس
آخر فتره ماصار يزعل صار يقول آمين
أسأله ليش ياصلاح تبي الفكه مني
يقول لا
عشان اطلع من الدنيا وانا مطمن عليك.
بس الله ما اراد ياصلاح.
أطيب انسان قابلته في حياتي
مايحب يشوف احد محتاج
يحب الناس يحب الخير
يزور مريض ويسال عن غايب
كل اللي يجلس معه يرتاح له
هوايته رسم البسمه على وجوه الناس
مايحب يشوف احد زعلان لدرجة انه كان يقول
ابي اللي بيننا ياعزوز محد يدري فيه من العيال
عشان محد يزعل عليك ويحسون اني اخذتك منهم
كنت افهمه بدون ما يتكلم
اقرأ الكلام اللي بعيونه
اعرف اذا متضايق والا مستانس
الله يرحمك ياصلاح
يقولي انت الوحيد اللي يفهمني
يقولي انا وانت واحد
اشياء كثير في بالي ومواقف وقصص ودي اقولها لكم
لكن خلااااص وش الفايده
راااح صلاح .. راااح صلاح

[اتحادي]

رحمة الله عليه

و هذه الحياة مافي احد دايم فيها

الدوام لله سبحانه و تعالى

ما لك اخوي الا انك تتصدق على روحه و الدعاء له بالرحمه

الله يرحمك يا صلاح مع اني والله ما اعرفه بس لما قريت موضوعه اثر فيا

و قلت هالانسان فعلا كان طيب و خلوق و يحب الخير للغير

و صدقني انا كنت مثلك في وفاة اخي قبل 5 سنوات

والله اني لما اتصدق على روحه انه احلم فيه انه مبسوط

عليك بالصدقه اخوي

[memories]

عظم الله أجرك في صاحبك وأخوك وحبيبك

والله ما اعرفه ولا اتذكر شي عن مداخلاته ومواضيعه

حاولت ابحث بس مالقيت شي بإسمه

الله يغفر له ويرحمه ويتجاوز عن سيئاته

والله قطعت قلبي من البكى

الله يجمعنا واياكم في جنات النعيم

اللهم اختم بالصالحات اعمالنا وتجاوز عن سيئاتنا

اللهم ردنا اليك ردا جميلا

الله لاتقبضنا اليك الا وانت راضٍ عنا يا أرحم الراحمين

آمين آمين آمين

[فقير الحظ]

لاحول ولا قوة الا بالله

عظم الله اجرك

هذا الدرب كلنا ماشينه

ان شاء الله اخر الاحزان

الله يجمعكم في جنات النعيم

[أكورداوي]

الله يرحمه ويغفر له ويسكنه فسيح جناته واحزن الله عزاك في صلاح واحسن الله عزا الجميع ,,

صلاح كان محبوب من الكل وما انسى الطلعات الي طلعناها سوا .. خصوصا طلعة البر قبل سنتين ونص او 3 ويوم يروح يجيب لنا العشاء .. ونتعشى ونلعب سوني بالخيمه وووو الخ ..

الله يرحمه رحمة واسعه ويجعل الفردوس مثواه ويرحمنا اذا صرنا الى ماصار اليه

:(

[open window]

الله يصبرك وانا اخوك ادع له بالرحمة وتصدق عنه وخلك واصل مع اهله هذا اقل شي تقدمه لصديقك وانت بعد الله يعينك ونعم الصديق له وافي لصديقك الله يوفقك ويخفف عنك ويعينك

[كوارداوي]

الحزن دوله
لا يعيش فيها سوى الدموع
اللهم جازي صلاح بالحسنات إحسانا و من السيئات عفوآ و غفرانا
الموت أخذ صفوة الخلق و حبيبهم محمد صلى الله عليه و سلم
اللهم أجمعنا مع أخينا صلاح و جميع أعضاء منتدانا و جميع المسلمين على حوض نبيك

[فتى زهران]

الله يجبر مصابك اخوي

ويجمعنا ويجمعكم في مستقر رحمته

[الوهم الاخير]

حتى النك نيم تبعك مشابه لحقه

الله يرحمه ويسكنه فسيح جناته ويصبر اهله وبالذات امه

[V I P 9 1 1]

الله يجبر مصابك اخوي

ويجمعنا ويجمعكم في مستقر رحمته

[أكـورد 2009]

اللهم جازي صلاح بالحسنات إحسانا و من السيئات عفوآ و غفرانا
الموت أخذ صفوة الخلق و حبيبهم محمد صلى الله عليه و سلم
اللهم أجمعنا مع أخينا صلاح و جميع أعضاء منتدانا و جميع المسلمين على حوض نبيك