اقتباس المشاركة الأصلية كتبت بواسطة sesydos مشاهدة المشاركة
من موقع حراج دوت كوم....


إنا لله وإنا إليه راجعون .. والحمد لله على قضاء الله وقدره




توفي أمس الأثنين الموافق 5 / 4 / 1433هـ العضو ( شاشه كرولا ) صاحب الأفالون 2009 وهو من المنطقة الشرقية من الأحساء ( رحمه الله ) .. إثر حادث بسيارته وهو في طريقه للرياض .. جاي علشان يبيع سيارته


القصة .. بداية أنا حقيقة لا أعرف الرجال وكنت من ضمن اللي يتناقشون معه علشان السيارة .. وقبل أمس اتصلت فيه عن طريق ( الواتس اب ) قلت السيارة موجوده قال نعم .. وقال ترا راح اجي الرياض بكرا اللي هو ( الأثنين .. يوم أمس ) ودي أبيع السيارة في الرياض في النسيم قلت تمام خلاص اخلي واحد من الشباب يقابلك .. متى راح تكون في الرياض .. قال تقريباً مع العصر ..


قلت خلاص وعدنا بكرا .. وفعلا لما صار من بكرا ( اللي هو الأثنين ) واتفقت مع خويي انه يتصل فيه ويقابله .. كلمته قلت له مشيت قال لا والله .. ابمشي بعد شوي وكان هالكلام الظهر الساعة 12:38


المهم .. قلت له .. خلاص خويي بانتظارك اول ما توصل عطني خبر واتفقنا الموعد بعد العصر ..


اتصل فيه خويي تقريبا مع العصر قال باقي لي ساعتين لأني تأخرت ما مشيت ..


وبعد كذا .. اتصلت فيه انا .. وما يرد .. اتصلت ما يرد .. قلت يمكن واقف يصلي والا حاجة ..


اتصلت فيه بعد نصف ساعة .. برضو جواله يرن بس ما يرد


عصبت صراحة .. فكرته طنشنا .. ( الله يرحمه ) ..


قلت الغايب عذره معه ..


بعدين اتصل بي خويي قالي وين خويك تأخر علي .. واتصلت فيه كم مرة مايرد


انا صراحة .. قلقت عليه والله .. وبديت أدعي ان الله يسلمه .. وبكيف السيارة




وبعد المغرب .. اتصل صار جواله مغلق .. مغلق .. علاطول




قلت ما فيه إلا ارجع لبرنامج الوتس اب .. واشوف اخر مرة دخل فيها ..


وشفت أخر دخول له .. الظهر .. ( بعد كذا تأكدت الرجال صار له شي ) .. وتضايقت صراحة


وصارت الساعة 11 بالليل وانا اتصل وجواله مغلق


حتى والله عيالي ( المدام ) .. قلقت معي عليه .. لأن عندها خبر بالموضوع


المهم .. رجعت البيت الساعة 12 بالليل تقريبا .. وبسرعة رحت فتحت النت .. لعلي أحصل شي عنه


وفعلا .. حصلت رد الأخ العضو ( t0t1 ) على إعلان المرحوم .. يقول انه انتقل إلى رحمة الله وهو طالع من الاحساء للرياض ..




أنا انفجعت صراحة .. وانصدمت .. وشهقت وانا في الغرفة .. وكان عندي ( زوجتي ) .. قالت وش فيك ؟


وأعطيها الآيباد تقرأ رد الأخ
الله يرحمك ويغفر لك يايوسف