بالنسبه لموضوع البساسه ..... مره كان عندنا واحد ... و كان طافر من البيت من كثر ما نحبسه
اول ما نفتح الباب يطلع ركض على برا و يقعد عند باب البيت ...
مره نحش و صعد فوق سيارة الوالد .... و الوالد ركب السياره و دقها سلف و مشى ...
و البس للحين على سقف السياره ما نزل ... و الوالد راح و مشى
و هاذي اخر مره شفناه ....
اللحين حولناها على السمك و السلاحف المائيه و الدجاج و الحمام <<< غابة الامزون مو بيت هذا
تعرفون كل واحد بالبيت و اهتماماته .. الوالد : دجاج و حمام
اخواني الصغار : السمك و السلاحف المائيه
انا : السمك و الدجاج ..... بس اللي بالفريرز و ينتظر دوره على القدر :d
....................
و طبعا في قصه قصيره بالنسبه للبساسه اللي يرفعون الضغط للخط الاحمر عندك :
الله يسلمكم و يخليكم القصه تبدي هنا :
الوالد راح سوق الحمام ... و اشترى له حمام لاحم ( اللي حق اكل .... السمين ) و خلاهم بقفص بالحديقه قبال البيت ..... و طبعا نتيجتا لمرور الوقت و الحمام فاضي و ما ورا شي الا انه ياكل و يسمن .... لقينا ان عدد الحمام صار دبل العدد اللي شريناه ( اخص يالفحول )
و الدبل صار دبل
و طبعا الحمام من كثر ما حبنا و حبيناه ( و الله مصلحه متبادله ... هو ياكل من عندنا ببلاش و حنا ناكل من عندهم ببلاش ;) ) صرنا نفتح باب القفص و الحمام يطير طول اليوم و يرجع مع المغرب داخل القفص و بزياده حمامه و لا ثنتين عن اللي كانو موجودين الصبح ( صارو يجرون بعض للوكر .. اقصد القفص )
و طبعا مره وحده صرنا نشوف بسس جديده بالحاره ( الفريج ) عندنا .. صار في بس اسود تقول اسد صغير يتمخطر بالحاره .... بس مشكلته ان كان ضاربه الجوع .. و نحيف
و مع الايام نشوف الحمام ينقص .... و ندقق بزياده .... نشوف ريشهم على الشارع و بين الشجر و كل مكان
و يوم نراقب كم يوم بالتناوب بيني و بين الوالد ..... و نلاحظ ان البس ابن الكلب << شلون تجي هاذي
كل يوم ياكل له حمامه و لا ثنتين ..... و الله وكيلكم صار من كثر ما هو متين .. .. باليالله يمشي و صار حتى ما عنده رقبه من المتن
و نحط له حطه انا و الوالد .... بالاول سألنا شيخ عن ذبح القطو ...... قال حرام ... قال صيده و ارميه بعيد عن حارتكم اذا مضطر
طبعا هذا الكلام ما دخل مخ الوالد و هو ناوي نيه قشره على العتوي ( ما يطلق على القط الاسود اللي تجاوز وزنه الطن و اصبح يرعب قطط و كلاب الحاره و صار يمشي كأنه ملك بالليل )
و نطلع له ام صجمه ( ما اعرف شنو تسمونها .. بس بالعربي البندقيه تعمل على الهواء و احيانا بالزنبرك )
و نحط له حطه و صرنا نسند الام صجمه ورا باب الديوانيه ( المطله على الحديقه ) و كل ما نشوف العتوي هات يا طق فيه
و ابن اللذين كل ما نطقه كل ما ياكل حمام اكثر
و صار ينوع ... يوم ياكل حمام من عندنا و يوم ياكل من حمام الجيران ... و الجيران حاطين الحمام لجدهم الشايب اللي كل يوم يقابل الحمام من الفجر لين المغرب
و في احد ايام الصيف البارده ( اي هين ) و في العصر و كلن ( تعلمتها من من التحليه:d ) مستلقي على جانب من الغرفه بعد اكل كبسة دجاج محترمه .... و اثناء القيلوله التي تسبق الجاي ( الشاهي ) ... ما نسمع الا طاااااااااااااااااااااااااااااااااااخ
و مره ثانيه
طاااااااااااااااااااااااااااااااااااااااخ
و يوم نفز و حنا مرعوبين ... و خصوصا الصوت كان قريب جدا
و نطلع الا شايب بيت الجيران ماسك شوزن و معاه السايق الهندي حقه ....... و رامين العتوي و ماسحينه عن بكرة ابيه
و طبعا عذر الشايب :
لقيته قاعد ياكل وحده من الحمام ورا النخله اللي بالزاويه ....
طبعا السايق الهندي اكلها انه ماسك كيس يجمع ما تبقى من اشلاء العتوي ..... و خصوصا ان كرش العتوي كان منتشر على الشارع و الحديقه ....
و الشايب عطانا ظهره و راح وهو يكلم نفسه و يقول : ( و انا اقول ليش كل يوم ينقصون الحمام !! )
و طبعا ما بقى بزر بالحاره ما طلع يشوف ..... و الفريج صرنا نشوف فيه كل ثلاث سواق هنود متجمعين بزاويه يسولفون و يناظرون اشلاء العتوي و بقاياه ( طبعا الهنود العصر ما تشوفهم الا بوزره و فانيله علاق )
الله يرحمه الشايب توفى من سنتين:( .... و الله انه كان مفرح الحاره بتصرفاته
----------------------------
هذه القصه برعاية موضوع ( اطول اسم بالعالم ) للعضو ( بيم ) او بالكويتي ( بايب ):d
رد مع اقتباس
مواقع النشر (المفضلة)