اقتباس المشاركة الأصلية كتبت بواسطة AL5FY مشاهدة المشاركة
هلا بولد كليتنا :d



الحال من بعضه يمكن انا حالتي اصعب حبتين


تخيل بيتنا في مخرج 9 ويوميا امشور للكلية مع ذا الزحمه عاد كبري الخليج مايحتاج انوااااع القلق


المشكله عندي كم يوم بالاسبوع بريك 3 ساعات يعني ارجع للبيت واريح بعدين اروح للجامعه


اقسم بالله اني كاره الرياض بسبت زحمتها اللي ماتنطاق

واشوفك زعلان على سواقة بعض البشريه اذا كان يخشون خشات بايخه


اذا تبي الصدق والله اني عاذرهم

تخيل انا محاضراتي يوميا تبدأ الساعه 8 الصبح اطلع من البيت 6:15 واذا مشيت نظامي آصل متأخر 10 دقايق تقريبا يلعن ام الغبنه


اضطريت اني اخش خشات بايخ على قولتك حركات مبزرة :d خصوصا الحركه اللي عند الاشارة هذي لابد منها :d


ما أقول الا الله يعين على هالزحمه انا اول ما أخلص دراسه على طووووول ابروح اقدم في الشرقيه لا أبو الرياض لا أبو اللي جاب ام جدت ابوها


على العموم يعطيك العافية على الموضوع حسيت اني طلعت اللي بقلبي شوي




تشكرات ياولد كليتنا :d

هلا والله بالخفي !

والله وانا اخوك اذا صارت الدنيا زحمة والعالم نفوسها مقفلة تعذرهم !

لكن اعاني لاصار الوضع طبيعي والاشارة مابه الا صف صفين .. همن يجيك الثور معرّض الموتر

هذا بالله وش تزين معه .. تلفعه ؟

ولا اللي العن منه ويسكر السيد الايمن والاشاره فاضية ..


طيب لاتروح بعيد .. تعال لم كليتنا .. بالله وش رايك بحالة المواقف اللي بحوش الغنم ؟

عادي تنمخش سيارك لو لبقت من داخل وعادي يجونك جحلط من المستجدين يسكرون البوابة


مثل مرتن اول مابدى هالترم .. واحد مسكر الباب على خلق الله بوسط المواقف ساعتين تخيل !

ويوم جا والعالم تحتري .. قال وبكل سخافة والله معليش ياشباب .. شف سعه الوجه بس :d