:: مكان التجمع للإنطلاق إلى جدة ريس واي ::

**ACCORD 764** · 17-08-2008, 03:11 PM

بسم الله الرحمن الرحيم

السلام عليكم و رحمة الله و بركاته , و بعد ....

أخواني و بمشيئة الله بقي يومان فقط على التجمع الكبير للهوندا في نادي جدة للسباق JRW و ذلك تحت اسم قروب هوندا . شارك العديد من الشباب و وعدنا آخرون بالحضور يعني بإذن الله راح يكون التجمع على قد التعب ;) .

نزلت هذا الموضوع كتنبيه نهائي للحضور و لشرح مكان التجمع الأولي و الذي سننطلق منه إلى جدة ريس واي .

الرجاء الحضور من الجميع لمكان التجمع الأولي حتى نحضَركم من هناك مرة و عند مدخل الحلبة مرة ثانية و الأسباب تنظيمة لا أكثر ;) .

سأكون متواجدا هناك ( عند آيه مول ) في تمام الساعة 4.30 عصرا ( بعد صلاة العصر ) و يمكن قبلها و راح أنتظر الأعضاء و المشاركين حتى الساعة 5 عصرا و بعدها بنتحرك كلنا كمجموعة واحدة و بمسيرة سيارات واحدة مع بعضنا .

مكان التجمع الأولي :

بـآية مول في نهاية شارع الأمير سلطان بجدة ( باتجاه الشمال ) , مواقف متاجر وطنى الكبرى ( المواقف السفلية ) أو المواقف المظللة و سأكون متواجداً هناك .

الوصف :

1- إذا جيت من طريق المدينة أطلع كوبري الصالة و أنزل لليسار , راح يقابلك تقاطع و طبعا فيه إشارات . خذ يسار من الإشارة و أدخل على الخدمات و منها خذ يمين مع اللفة إللي عند آية مول و بعدها يقابلك تقاطع خذ منه يسار و بعدين راح تلاقي على اليسار لوحة مكتوب عليها المواقف المظللة , أدخل و راح تلاقيني هناك .

2- إذا جيت من طريق الملك , لف من دوار الكرة الأرضية يمين و من الإشارة إللي قدامك يمين و أدخل الخدمات و طبق نفس الكلام المظلل بالأزرق في رقم 1 .

أعتقد إن الرسم التوضيحي معروف و واضح و مافيه غموض أو أي شي , يعني إنشالله محد بيضيع .

الرجاء من الجميع الحضور .

و هذا مخطط توضيحي بواسطة برنامج Google Earth لمكان آية مول و منطقة التجمع الأوّلـــي ...

إللي ماراح يقدر يلحقنا على آية مول يجي على الحلبة على طول و هذا أيضا مستخرج من Google Earth لمكان جدة ريس واي ...

الوصف :

إذا وصلت لكوبري أبحر وقف تحته على اليمين , راح تلاقي بعده على طول نزلة , أنزل منها راح يكون الشارع شوي مكسّر و طوّل و خذ أول لفة يسار . يقابلك مدخل الحلبة و اسأل الشباب عند البوابة هناك عن مكان قروب الهوندا و راح يدلّوك .
أو تجينا بدري على آية مول و منها نطلع للحلبة مع بعض لأن النزلة حقت الحلبة الصراحة تضيع :( , فيفضل إنك تكون متواجد في آيه مول بالكثير على الساعة 5 العصر .

أي واحد لو ضاع أو صار عليه شي لا قدر الله يتصل عليّا حتى إللي وده يعتذر يتصل .
الاسم : خالد
رقم الجوال : 0555671379

الليلة سنجتمع نحن المنظمين و نقوم بوضع اللمسات النهائية على طريقة عرض السيارت و الترتيب المتبع و تحضير المشاركين في القروب و التصوير . و منها الاتصال عليكم و تذكيركم بموعد التجمع .

سيستمر تسجيل الأسماء حتى يوم التجمع ( الأربعاء ) و حتى الساعة 3.30 ظهراً , و هي آخر دخلة للمنتدى قبل التجمع لأنه بعدها بأضرب مشوار من مكة لجدة و حتكون آخر نسخة بأطبعها لأسماء المشاركين .

كونوا على الوعد .
يومي الأربعاء و الخميس القادمين بإذن الله
الموافق 19 و 20 من شهر شعبان الجاري .

لا تتأخروا ...... بانتظاركم ;) .

تحياتي لكم أخواني .

**kakashi-san** · 17-08-2008, 03:19 PM

وعليكم السلام ورحمةُ الله وبركآتة

يعطيك العافية يا خالدْ ،

لو انها يوم الأربعاء كان جيت انا وربعي من الشرقيةْ ،

لأنه واحد من ربعي وده يجيْ ،

لكن بإذن الله راح اتناقش معاه من جديدْ ونشوف كان قدرنا نجي ، راح نجي بإذن اللهْ ، ( :

ما عليك قصور واللهْ ..

لا هِنت عسىْ ، ~

**&فارس&** · 17-08-2008, 05:14 PM

يعطيك العافية أخوي على التنظيم والله يقويك وبالتوفيق لنادي هوندا..

**ن ع ر السعودية 0005** · 18-08-2008, 01:02 PM

المشكلة أنه عندي أختبار يوم السبت:(وكان بودي الحضور معكم ولا أنا راح أجي جدة بعد ما أخلص من الأختبار لكن نقول خيرها بغيرها ...

**black sherry** · 19-08-2008, 04:46 AM

يا الله انت جاي من مكه الله يعينك
اذا تبغى اي شي في جده كلمني انا جاهز وبيتي قريب من ايه مول

0553352263
هيثم

وشكرا على الموضوع والله شكلك تعبان عليه

يارب يكون التجمع زي ما نتوقع والقال انو حيجي وما جا ولا اعتذر راح نطردو من المنتدى :d

**ACCORD 764** · 19-08-2008, 01:12 PM

kakashi-san :
الله يحيك و يحي كل أهل الشرقية , التجمع راح يكون يومين الأربعاء 19 شعبان و الخميس 20 شعبان .
و الله يحيكم و يشرفنا وجودكم معنا ;) .

&فارس& :
أهلا فارس , و لو مكانك محجوز بالتجمع و عضويتك مسجلة عندنا خلاص .
الله يوفقك و مبروك مقدما على الملكة .

ن ع ر السعودية 0005 :
هلا فيك , حتى لو ما مداك تحضر التجمع , ترى إحنا بنتجمع هنا بجدة بشكل شبه يومي في المخازن الكبرى بطريق الملك من بعد صلاة العشاء و غالبا نكون بين الـ 5 و الـ 10 سيارات هذا إحنا إللي دائما مع بعض , فحياك الله بيننا .

black sherry :
ألف شكر حبيبي هيثم على الدعوة الحلوة و هذا من طيب أصلك حبيبي و نخدمك في الجايات إنشالله و يكفي إنك تكلمت بس :o .

يارب يكون التجمع زي ما نتوقع والقال انو حيجي وما جا ولا اعتذر راح نطردو من المنتدى :d

أوف , وش فيك معصب !؟
ترى إللي ما يقدر يجي ( معه عذر شرعي ) هذا بنسامحه و نقوله نشوفك بالتجمع الجاي ;) .
أما إللي يصف ( يجرد ) هذا أنا بأفلت عليه خوينا هيثم و خليه هو يتصرف معاه بطريقته و حسب مايشوف إنه يخدم مصلحة قروبنا :p .

شكرا على مروركم و تفاعلكم ياشباب ....

**مجنون الأكورد** · 19-08-2008, 03:28 PM

والله كان ودي احضر لكن للأسف ملكتي غير موجود ه حاليا خارج التغطيه متواجده في الصناعيه في ورشة الخليج عندها بعض التصليحات لكن ان شاء الله اكون متواجد في اقرب تجمع :(:(:(

**ميدو مشاكل** · 19-08-2008, 11:59 PM

.
.
.
حدثني اياد ,,, عن التجمع ورتّب معاي على ان اجي ,,, وان شاء الله اجيكم

عندي عمل يوم الاربعاء ,,, واخلص ع الساعه 6 لكن لجل عيونكم ,,, تهبيقه من 4.30 ,,, وان شاء الله الحقكم على آيه مول ,, واذا ما الله كتب تلقوني وراكم ع الحلبة

**دحوم** · 20-08-2008, 12:11 AM

تمنياتنا لجميع المشاركين بالتوفيق .

**tha power 220** · 20-08-2008, 02:28 AM

مشكوووووووور
وتمت معرفة الموقع
وغــــــدا" اللـــــقاء

**black sherry** · 20-08-2008, 10:17 AM

اليوم الموعود
شباب كل واحد فيكم يغسل سيارتو ويزبط سكسوكه فله;)
ولا اشوف احد يتأخر نبغى مواعيد انجليزي مو سعودي:d
الساعه 4 ونص يعني 4 ونص مو 6

اليبغى اي فزعه انا من دحين مجهز حالي لمساعده الاعضاء
0553352263
اي شي بس دق وسوبر هوندا يجيك على طول

**West Knight** · 20-08-2008, 10:45 AM

السلام عليكم شباب انا واحد لسا جديد في النادي وسايرتي مافيها اي شي مميز غير انها هوندا اكورد 2002
>>>مايحتاج

لونها ازرق وشد بلد

انتو كيف ؟؟؟؟؟؟:d

**MeedO** · 20-08-2008, 12:42 PM

معليش ياخالد ..دخلت غلط ...
يا west knight انت تعال على التجمع او اتصل على خالد ونسق معاه وابشر بالخير ....
:p

**West Knight** · 20-08-2008, 01:00 PM

ميمو
اخوي

انا حاب استفسر انتو تطلعو قروبات يعني في طريق الملك تمشو بس ولا كيف بعدين الهوندا الموقره حقي مافيها اي شي غير لمبات مع الاغاني تقعد تولع وتطفي والصدام ومحكحك شوي الخلفي والامامي

:d

**ACCORD 764** · 20-08-2008, 01:09 PM

أهلين بالشباب ...

مجنون الأكورد :
شفت سيارتك اليوم و خلاص نوفل شبك الصدام بس باقي الرش . و أحلى شي إنك V6 .
تمنياتي تجي يوم الخميس لو خلصت سيارتك بإذن الله .

ميدو مشاكل :
حبيبي إسمك مسجل معنا قبل ما تكتب هذا الرد , و ألف حيا الله من يجي من طرف حبيبنا إياد .

دحوم :
شكرا لك , و إنشالله تجمع يبيض الوجه .

tha power 220 :
اليوم تنزل مكة مو الأسبوع إللي فات :p , نتقابل في الخط ;) .
اصلا لو شفت أكورد أسود مكتم السيارة و كاتم الاسطبات الخلفية و ماشي طبلون و مع الخط الأصفر حتعرف إنو أنا .
أمزح معاك ما راح ادعس , الإسفلت حامي و الحرارة شديدة . فأحسن شي 120 وبس .

black sherry :
هلا بهيثم , مدري ليش أنا عندي إحساس إنك راح تحرك القروب و تخلينا ناخذ و نعطي مع بعض .
أجل سوبر هوندا ها ؟ تجرب ؟
يكفي إنك قير عادي يا شيخ .

West Knight :
زي ما قلتلك على الخاص و ياليت بسرعة ;) .

MeedO :
طول عمرك تدخل غلط ( لا تساقط ) , و كل ما أركب معاك ما في إلا تنقيز أو الله عليــــــك :d .
ما في زي حقت عبد الرحمن مع الوايت .

يا شباب اليوم الله يرحم والديكم لحد يتأخر عند الساعة 4.30 و بالكثير على 5 العصر لأننا نبغى نمشي كلنا مع بعض و راح يكون فيه تصوير من بداية دخول أول سيارة لمواقف آية مول إلى خروج آخر سيارة من الحلبة .

التجمع راح يكون فيه مفاجأة كبيرة و أشياء تصير لأول مرة , خلوها ساعتها ما راح أحرق عليكم الموضوع .

تحياتي لكم
و أعيد و أكرر , رقم جوالي : 0555671379
أخوكم / خالد .