بسم الله الرحمن الرحيم
::.. تقرير تجمع القصيم الأول ..::
في يوم الخميس 10 \ 8 \ 1428هـ كان موعدنا في عنيزة ..
للمعلومية كان معنا أبان .. لكن كان حاضر بقلبه .. يتصل ويتطمن على أحوالنا وأخبارنا ..
وقتها حسيت أننا أولاده وهو أبونا >>ياخي كبرت الرجال طيب قول أخونا الكبير .. :d
توجهت إلى الشاليه قبل صلاة المغرب انتظرت الشباب ..
وصل العضو و ى ل من الرياض ومعه ولد خالته ..
بعد دقايق وصل كن فريد و كوكو كورد و الواافي ..
على غير العادة .. ماسوينا تعارف .. تدرون ليه ؟؟!!
أقلقنا وضع Accord 2007 -ماهر- .. نتصل علية وهو مايرد
كن فريد اتصل على أمن الطرق وسألهم عن الرجال ممكن لاقدر الله يكون صار عليه حادث .. قالوا ماجاء بلاغ ..
بعد صلاة المغرب طلع كن فريد وكوكو والواافي ..
عندهم مشوار قريب .. جلست مع و ى ل وولد خالته .. وأنا ساحب عليهم مستلم الجوال
أدقدق على ماهر .. ولا يرد
جاء العضو MAX 177 .. بعده العضو ل ن ن السعودية 811 ..
ثم أكوردي 2004 >>أقترح تغير اسمك إلى أكوردي 2002
جلسنا بالشاليه ... وتقهوينا ..
قبل صلاة العشاء بشوي جاء القرش>>خوي الأخطبوط ..كلهم مائيين
صلينا العشاء .. اتصل علي كن فريد يقول وش الحل مع ماهر
للمعلومية اخر اتصال مع ماهر .. يقول باقي على القصيم 50 كم
قلت لـ كن فريد ماعليك بطلع للخط السريع ..
مسكت السريع ومعي و ى ل .. ومشطت أبوه .. ودخلت لعنيزة من الجهة اللي يعرفها ماهر
ودورت بكل المحطات والمساجد ..وللاسف الشديد لا أحد
توجهت إلى مقر اجتماعنا ..وبالطريق اتصلت على 996 أمن الطرق
بلغت عنه ..وأخذو اسمه ورقم سيارته ..
وقالي العسكري بنعمم عليه جميع النقاط والدوريات وما يكون إلا كل خير ..
رجعت إلى الشباب وجاء بعدي كن فريد وكوكو و الواافي ..
طلعنا من الشاليه إلى المسطحات الخضراء على الدائري ..
أشرح صدر من الشاليه .. وخصوصاً العدد بدا بالزيادة
المسطحات الخضراء تبعد عن الشاليه كيلوين بس ..
لما وصلنا ..اتصل علي القرش .. يقول : انكسرت جميع مسامير الكفر الأمامي
والكفر يمشي على مسمار واحد ..
قلت له طيب الحين نجيك .. طلع له العضو أكوردي 2004
جلسو الشباب .. كن فريد قالي خلينا نروح نوقف سيارتي بمغسله
.. لي وقفة هنا ..
في أوقات التجمعات .. ولما يجي الموعد الرسمي للتجمع .. الناس تروح تسوي أشياء أقل أهمية .. يعني الاعضاء مجتمعين ..
وأنت تفكر بغسيل السيارة ..
ليه ماكان قبل ..
تجمع الشرقية : تأخر كن فريد عن الحضور .. عشان يغسل السيارة .. طيب أنت بديرتك ليه ماغسلتها قبل ..
تجمع الرياض : مغرب الخميس وقت التجمع الرسمي .. طلع ماهر وكن فريد والواافي و م م و يغسلون سيارتة ماهر ..
طيب ليه ماكان قبل الوقت هذا
^ ^ ^
أدري هذا ماله دخل بالتقرير لكن شي بخاطري أقوله
..نرجع للتقرير..
وقفنا سيارة كن فريد بالمغسلة .. وركب معي بالسيارة .. لكن كان جسد بلاروح
صدقوني أتكلم الرجال مايدري وين حنا فيه ..
والله أول مرة اشوف أحد بحالة كن فريد .. كان خايف مرررررررررة
يهذري بأسم ماهر .. اسم ماهر على لسانه ..
وقتها حسيت بعلاقة الأخوان بينهم ..
يعني تخيل أعز أخوياك .. تتصل علية من 6 ساعات ولايرد .. ماتدري وش صاير عليه
الله لايعيدها من حالة
توجهنا إلى القرش وأكوردي 2004
ساعدناهم على اللمسات الأخيرة ..
في هذة الاثناء .. رجعت لي الحياة والبسمة من جديد !!!
تدرون ليه ؟؟!!!!
اتصل ماهر على كن فريد ................
توقعون الرجال وش فيه ؟؟؟؟!!!!!
أخونا في الله استأجر بفندق
وسحب نوووووووووووووووووووووم والجوال عالصامت>>عايش جو .. وحنا حالة الله أعلم بها
خلصنا سيارة القرش وتوجهنا إلى الشباب
.. شوي وجاء الغائب المنتظر .. ماهر
المهم الرجال قام يعتذر بأعذار واهية ..
وصلنا العضو عيال وايل .. طبعاً الشباب ماقصرو معه بالاسئلة .. أنت عيال وايل كلهم ..
وش سبب التسمية ؟؟ ولماذا ؟؟ ولأجل ؟؟
الشباب نشبو له نشبة طيبة .. :d
طلعت أنا وكن فريد وجبنا العشاء وتعشينا ..
اتصلت على العضو هـ و ا 707 .. الرجال شكلة بدأت أعراض الشيب تطلع ..
كان ناسي التجمع بأي يوم ... وقبل يومين متصل عليه وقايله ..
جاء هـ و ا 707 .. وبعده وصل العضو ل د ق
اكتمل العدد من غير هوندا.com .. الرجال صارت له ظروف اجبرته يطلع للرياض ..
تكينا إلى الفجر وصورنا .. وهذي الصور .. لعيونكم ..
تصوير كن فريد .. من كاميرا كوكو
صور جماعية من زوايا متعددة
وصور متفرقة لسيارات الاعضاء
(المبرقعة) سيارة الشويش .. والعضو هـ و ا 707
العضو MAX 177 .. والعضو ل ن ن 811
ل د ق & Acoord 2007
واخيراً .. وليس آخراً
سيارة العضو هـ و ا 707 (مرة اخرى) & العضو و ى ل السعودية 8 5 5
تفرق الشباب مع صلاة الفجر ..
كن فريد أخذ عياله ... عفواً قصدي أخوياه :d
اللي هم كوكو كورد و الواافي وتوجهوا للشاليه ومعهم و ى ل ..
أما ماهر يبغى يحلل قيمة إيجار الفندق .. وراح لغرفته بالفندق >>أكييد بالفندق يعني وين
بعد صلاة الجمعة جاء ماهر
و العضو ل ن ن جاء بحكم انه من عنيزة وبيتهم قريب ..
تغدينا ..
بعد الغداء .. قام كن فريد يلجلج على أخوياه .. يالله بنمشي .. يالله تأخرنا
وأخوياه يبغون يريحون شوي ... لكن أنتم تعرفون الشيبان مالهم إلا رايهم ..
في تمام الساعة الرابعة عصراً انطلق الشباب متوجهين إلى العاصمة بحفظ الله ورعايته ..
وهكذا يسدل الستار على التجمع الأول بالقصيم
وسامحونا على التأخير والتقصير
في الختام أتقدم بخالص الشكر والتقدير لكل من شاركنا بالتجمع بحضوره
وأقول : مهما طال حلو اللقاء فلابد من الفراق ..
تعجز الكلمات وتقف العبارات عن وصف مشاعري تجاه هذا التجمع ..
ولا أستطيع إلا أن أشكر كل من حضر بقلبه أو بجسده .. مع قبلة على رأس كل الحاضرين
::.. والسلام عليكم ورحمة الله وبركاته ..::
::.. تــقــريـر تــجـمـع الـقـصـيـم الأول ..::
رد مع اقتباس
مواقع النشر (المفضلة)