:: تقرير تجمع الشرقية الثاني ::

**B Unique** · 28-10-2007, 02:51 PM

بسم الله الرحمن الرحيم

رغم كل الصعاب والعوائق ، رغم كل الظروف والجيوب ، ورغماً عن انف المتخلفين واصحاب العقد النفسية ، تم التجمع بنجاح ولله الحمد والمنه . وسجلنا في كتاب تاريخ نادينا العزيز صفحة جديدة من الذكريات الجميلة

اليكم التفاصيل :

قبل التجمع

يوم الاربعاء الموافق 12/10/1428 هــ

كنا على موعد مع الاعضاء اللي بيجون من الرياض والقصيم . وهم :

ابو عزوز
ل ن ن 1 1 8
كوكو كورد
Juventus
مطنش

وبما ان اهل الرياض والقصيم محرومين من نسيم البحر ولونه الازرق الخيالي كانت الخطة انا نستقبلهم انا وعزوز (م م و) في الهاف مون (شاطئ نصف القمر) ونضبط لهم طلعة بسيطة هناك .

وصلت انا وعزوز الساعة 8:30 الليل وفرشنا في مكان مناسب على الشاطئ ونزلنا الاغراض وكلها نص ساعة والشباب واصلين عندنا . كانوا جايين بسيارتين ، سيارة ل ن ن وسيارة JUVENTUS . وبعدهم بدقايق وصل ZO6 لكنه قبل ما يوصلنا قلط على ناس حولنا بالغلط . الرجال شاف معهم اكوردات وقال بس هذول عيال المنتدى وقعد يتقهوا معهم ويسولف :d لكنه استوعب الوضع ومن حسن حظه انه كان يعرف واحد من اللي جالسين . في اللحظات هذي ماهر (Accord 2007) كان جاي من بقيق . وبعد الاستقبال راحوا ثلاثه من الشباب وجابوا الوافي من بيته .

المهم .. بعد ما اكتملوا الاعضاء وبعد الترحيب والتقطيع في ابو عزوز ، شبينا النار وجهزنا اغراض الشوي وجلسنا نتقهوا ونسولف . بدينا الشوي الساعة 10:00 وكلها ساعة ونص وحنا مخلصين وحاطين السفرة . بعد ما تعشينا وحمدنا الله على النعمة قربنا المنقل وحطيناه في نص الجلسة وقربنا حوله لان الجو وقتها كان هوا وبارد نوعاً ما . وعشان تكتمل الوناسة ضبطنا لنا براد شاهي على الجمر تحبه قلوبكم . وبصراحة كان له جو خاص مع البرد والسوالف وجمعة الشباب اللي ما تنمل .

وهذي صورة للذكرى :

يوم التجمع

يوم الخميس الموافق 13/10/1428 هـ

كانت بداية التجمع بحضور الاعضاء الى واجهة كورنيش الدمام البحرية بعد صلاة العصر . وكان اول الحضور wald 3rb اللي اقلقني بالاتصالات من الساعة من الظهر . ومن زود الحماس كان مسنتر في موقع التجمع من الساعة 3:00 العصر وبدوا الاعضاء يجتمعون عنده وفرشوا الفرش وضبطوا الجلسة (الله يعطيهم العافية) .

تأخرت انا والشباب اللي جاوا يوم الاربعاء من الرياض والقصيم في مغسلة سيارات وبعد ما خلصنا انطلقنا لموقع التجمع . وصلنا موقع التجمع قبل المغرب وكان قدامنا عدد جيد من الاعضاء والسيارات وعلى رأسهم منسق التجمع الراس الكبيرة الوافي . بعدها بدقايق وصل محجوب وthe sun ووراهم accord 2005 والتحلية (accord2002) اللي فاجأنا بجيته بعد ما كان يتغلى علينا في موضوع التجمع . بدينا بتعارف بسيط وتعليقات من بعض الاعضاء الملاقيف << ترى ما يقصد احد . بعد التعارف رحنا نصلي المغرب . بدينا في ترتيب السيارات للتصوير واول ما بدينا في الترتيب جانا واحد معاق نفسياً (الله لا يبلانا) معه تويوتا FJ Crouser وصف معنا . انا شفته شباب جيته وكلمته بكل احترام وطلبته يغير مكان سيارته حتى ننتهي من التصوير وبعدها يوقف في المكان اللي يعجبه . توقعوا وش كان رده ؟! يقول وش ناوين تسوون ؟ حراج !! قلت له وش اللي حراج ؟! من غير ما اطول السالفة معك .. حنا اخويا مجتمعين ونبي نصور سياراتنا وسلامتك . قال انتوا قاعدين تصورون ولا تلعبون ؟! << ملاحظين قلة الحياء والبثارة في كلامه ؟!

وهذي صورة سيارته واقفة ورا الاكورد البيضاء

ويبدو ان العداوة الازلية بين الهوندا والتويوتا ماهي بين والاكورد والكامري بس

طبعاً انا ارتفع ضغطي منه الف !! لكني ما بغيت اغلط عليه واخرب التجمع بمشكلة سببها (بزر) :p . عودت قلت له خلك محلك وآسفين على ازعاجك . تلخبط الترتيب اللي في راسي وكان فيه سيارات تمنيت انها تكون في المقدمة لتميزها عن السيارات الباقية لكن حصل اللي حصل والحمدلله كانت الصور جيدة . من السيارات اللي كنت اتمنى انها تكون في المقدمة سيارة مصرقع الشرقية (سيفيك كوبيه) . هذا كنت ابي آخذ له صور خاصة لكن الله يهديه مشى وخلانا بدون ما يستأذن ولا يعتذر . على العموم ان شاء الله ما يكون زعل علينا ويفكر انا ما عطيناه وجه .

واترككم اللحين تستمعون بالصور
عدد السيارات : 22 سيارة

يتبع ..

**B Unique** · 28-10-2007, 04:41 PM

وقت التصوير كان التحلية عايش اجواء العيد وشغال تفجير في الالعاب النارية :d لكنه للاسف تركنا في غمضة عين ومشى بدري بسبب ظروف واجهته .. الله يستر عليه

:(

خلال التصوير ما كنت منتبه للشباب . واثاريهم تحرشوا في المتخلف وسببوا لنا مشكلة معه وفي النهاية كلم الشرطة . وبعد ما انتهيت من التصوير جات دورية الشرطة وبدا الفيلم

لقيت ماهر وسعد واقفين عند الدورية ومعهم عسكري . واول ما بدينا نجتمع حولهم طردنا العسكري وصار بينه وبين ماهر وسعد كلام ونقاش حاد . وقتها كان سعد عاقل ومؤدب ومحترم ويتكلم بلباقة بعكس ماهر اللي ما كان باقي له الا يمسك العسكري مع حلقه !! وشوي ناداني العسكري واخذ اثباتاتنا انا وماهر وسعد وفتح باب الدورية وقال يالله اركبوا . وش اللي نركب ؟ وش السالفة اصلاً ؟ ووش تبي انت اللحين ؟ ليه موقفنا ؟! العسكري الغبي يدري ان ما فيه مشكلة اصلاً واكتشفت من كلامه ان راعي التويوتا طلع خويه وعلى باله انه يبي يمشي كلمته علينا . المهم .. العسكري شافنا معاندين فراح يبلغ . وليته بلغ من زمان !!

وعشان ما ندخل في متاهات ومشاكل مع المرور والشرطة بعد قلت للشباب يعطون ارقام جوالاتهم لـ JUVENTUS ويحركون سياراتهم حتى تنتهي المشكلة ونتصل عليهم . بعد ما مشوا الشباب جانا عسكري محترم معه جيب دورية . سألنا وش السالفة وعطيناه اياها . قال طيب وش المشكلة ؟ وانتوا وش تبون من راعي التويوتا ؟ قلنا حنا ما ندري اصلاً خويك ليه موقفنا ؟ وراعي التويوتا هو اللي مبلغ ؟ وش يبي بالضبط ؟! بعد ما عرف ان جيته ما كان لاهي داعي والموضوع ما يستاهل راح صوب راعي التويوتا وجا بعده ضابط راكب كراون فيكتوريا وجلسوا يكلمون المتخلف .

العسكري الغبي رجع لنا وفتح باب الدورية مرة ثانية وقال لماهر اركب . عاند معه ماهر معه وقال اذا تبيني بألحقك بسيارتي . وشوي الا الضابط يناديه ويقول له قفل بابك وطف السيفتي عشان ما يصير تجمهر . وبعد ما اعطاه الظابط كم كلمه دخل الدوريه وطلع لنا بتعهد مكتوب فيه انا ما نتعرض للمتخلف وطلب تواقيعنا . وقعنا التعهد وانتهت المشكلة اللي ما كانت مشكلة اصلاً .

بعدها كلمنا الاعضاء اللي مشوا واستأنفنا التجمع . صلينا العشاء ورجعنا لجلستنا وتقهوينا وسولفنا ولا كأن شي صار . لكن المرة هذي كان ابو عزوز كأنه شارب شي مو مضبوط . جلس جنب سعيد (Accord 4 EvEr) وسوا لنا قلق ورجه . وكان ماخذ الجلسه بصوته وضحكته المزعجة !!

وغير كذا عندي عتاب لبعض لاعضاء الجدد اللي شرفونا بحضورهم . بصراحة اشكرهم على الحضور ويعلم الله اني كنت سعيد بشوفتهم لكن المشكلة انهم كانوا هاديييييييين ومستحين بشكل قاتل . وما كانوا معنا في الجو مرررررررره . ابيكم تعرفون ان الهدف من تجمعاتنا هو تجمع اعضاء وتعارف ماهو تجمع سيارات وتصوير . وترى كل الاعضاء اللي شفتونا نمون عليهم ونضحك معهم ما قابلناهم الا في التجمعات . والصداقة والاخوة اللي بيننا اللحين كانت نتيجة التجمعات السابقة

بعد العتاب نرجع لتجمعنا
وان شاء الله تكونون فهمتوا مقصدي

انتشروا الاعضاء في اطراف الجلسة . ما بين محادثات شخصية وبلوت وسوالف واستعراض لمميزات سيارات واكتشاف لمميزات سيارات اخرى << ما يقصد راعي الهوندا :d. وفي الوقت هذا طل علينا نور ابيض شديد الاضاءة من صوب البحر وظل يخترق الناس والسيارات حتى اقبل علينا بإبتسامة كنا نسيناها . تلك الابتسامة العطرة وذلك الوجه الصبوح القليلة رؤيته . هذا ابو العيال المشغول دائماً ، مشرف قسم الاكسسورات وصقيقي العزيز اكورداوي . بصراحة حضوره اضاف للتجمع والجلسة نكهة خاصة من السعادة والفرح الذي كان يبدو على وجوه الاعضاء الذين استقبلوه بالترحيب << يارب يحس ويرجع للمنتدى مثل اول . وبعد اكورداوي انضم لنا واحد من برى المنتدى معه اكورد لونها فيراني وبقى معنا حتى آخر التجمع .

وهذي صورة سيارته :

وبعده طبوا علينا 2 معهم دبابات هونداCBR
واصر الوافي الا ياخذ لهم صورة

وش رايكم في الدبابات ؟!

:d

للمعلومية تراها للبيع .. والبيع للجادين فقط !!

يتبع ..

**B Unique** · 28-10-2007, 05:04 PM

وبعدها اخذنا كم صورة لبعض السيارات المتميزة في التجمع

- اذكروا الله -

سيارة سلمان (ZO6)

وبصراحة كان ودي اجيب لكم صور لداخلية سيارة سلمان لانه معدلها تعديل راااااااايق وتستاهل انكم تشوفونها وتسجلون اعجابكم بصاحبها لكن للاسف الانارة ما كانت كافية للتصوير

سيارة massari

سيارة محجوب

بعد الدردشة والسوالف والتصوير جمعت القطة من الشباب ورحت انا والوافي وZO6 نجيب عشاء من هارديز . طبعاً العشاء حقنا جابوه في موكب من العمال لاننا كنا طالبين 18 وجبة وكانوا في اتم السعادة والانبساط لاني اعتقد انهم دخلوا ارباح اسبوعين قدام من طلبنا لحاله

:d

بعد العشاء قررنا نسوي مسيرة بسيطة على الكورنيش وصورنا السيارات وهي في المسيرة . لكن للاسف التصوير ما كان بالجودة المطلوبة . حتى الفيديو ما كان واضح وحاولت اعدل في الصور على الفوتوشوب لكن ما ضبطت معي .. يعني مالكم الا هيفا والصورتين هذي :

يتبع ..

**B Unique** · 28-10-2007, 05:44 PM

بعد المسيرة وقفنا السيارات في واحد من المواقف على الكورنيش واخذنا بعض الصور . وبعدها اختتمنا التجمع بجلسة بسيطة قريبة من الشاطئ عشان JUVENTUS يرمي احزانه هناك ومشينا بعد الفجر .

اليكم الصور
عدد السيارات : 14 سيارة

وهنا انضمت لنا سيارتين من برى المنتدى

بعد التجمع

يوم الجمعة الموافق 15/10/1428 هــ

بعد العصر تغدينا انا والشباب اهل القصيم والرياض (كبسة دمامية) << انصحكم بها ;) من مطعم ماضينا في الخبر . وبعد صلاة المغرب ودعتهم بحضور wald 3rb وماهر . الله يحفظهم ويستر عليهم

وبكذا يكون تجمعنا انتهى بنجاح ولله الحمد

اتمنى انكم استمتعتوا بالتقرير الطويييييييييييل جداً . وسامحونا على الاطالة لكن ما كان ودي اخلي شي يفوتكم . اشكر كل اللي شاركونا التجمع سواء كانوا من اهل الشرقية او الاعضاء اللي طوّعوا المسافات وشرفونا بحضروهم من الرياض والقصيم . لا هنتوا على الحضور والله يجمعنا بكم في القريب العاجل .

قائمة الحضور (28 عضو) :

الوااافي
JUVENTUS
أكورد 95
Z06
Accord 4 EvEr
ي ر ط 404
wald 3rb
massari
B Unique
م م و السعودية 755
Accord 2007
فهد الشمري
راعي الهوندا
ولد النمر
مطنش
ل ن ن 1 1 8
كوكو كورد
أبو عزوز
محجوب
the sun
مـشهور
accrd2002
accord 2005
اكورداوي
@ايدوول@
أكورد للأبد
الظل
الهادف

ضيوف التجمع من خارج المنتدى :

علي القرني
كامل القرني
خالد العميري

ارجو من الاعضاء اللي حضروا التجمع ونسيت اذكر اسماءهم يعطوني خبر في رد او على الخاص عشان اضيفهم للقائمة
وسامحونا على النسيان

والسلام عليكم ورحمة الله وبركاته

اخوكم / محمد البيشي

**Accord 4 EvEr** · 28-10-2007, 06:54 PM

ياسلآلآلآلآلآلآلآلآلآلآلآلآلآلآلآلآلآلآلآلآم عليك

يامببببببببببببببببببببببدع

يافنااااااااااااااااااااااااان

ياخطيرررررررررررررررررررررررررررررر

وربي تقرير رووووووووووووووووووووووووووووعه

بس ياليت هـ و ق كانت فيه :(

المهم اشكر كل الشباب اللي حضرووو

وياجماعه ترى الدعوه مزوح تجي وتروح

وكنت اتمنى اجلس معكم للنهايه لكن تجري الرياح سده واستريح

فوووتكوووو بعافيه

**B Useful** · 28-10-2007, 06:58 PM

الله الله الله .. ماشاء الله تبارك الله ... التقرير طلع احلى من التجمع نفسة خخخخخخخ
والله احلى ايام مرت علي بحياتي بعد تجمع الشرقية الاول ..
ذكريات حلوة مرت علي بهالتجمع ..
والاحلى السالفة الغبية اللي صارت لي مع القصمان خخخخ
كانو جايين من القصيم .. وخذوني من الرياض .. وانا اللي سقت فيهم من الرياض لين محل التجمع البسيط الاول على الهاف مون ...
طبعا B Unique والشباب كانو داخلين من طريق ...
واول ماوصلت كان (ل ن ن السعودية 811 ) طالع مع الدريشة ويصف لي لف يمين ... لف يسار ...
وانا توهقت واشوف قدامي رمل ولسة ماشفت الشباب اصلا .. وعبدالله يقول لي شفهم قدام ..
واروح قدام في الرمل ... ولا شوي اشوف السيارة ضعف عزمها .. يعني بديت اغرز ... يوم شفت الوضع مهو لي .. على طول رفعت رجلي عن البنزين وخليت السيارة عشان لا تغرز من جد ..
نزلت من السيارة الا ابو عزوز و (ل ن ن السعودية 811 ) قالبين علي .. يلي ما تعرف تسوق يا ... يا ... يا .... المشكلة القهر وين راحت رات الــ 397 كيلو من الرياض راحت عشان اخر 25 متر وقفت السيارة فيها ..و الله انكم اعضاء جدا كويسين وطلع ابو عزوز السيارة وراح للشباب وخلاني اروح لهم مشي :o ... خخخ
بس صراحة فلة ووناسة ...
شوي او كية اوكية اوكية ...
ومشاء الله م م و يعرف يقطع سلطة وانا اشهد ... حاولت اقطع طماط .. وجرحت يدي .. خخخخ

وماقصروا الشباب والله وعلى راسهم الشاويش فريد والمنظم الوااافي..

الله يديم المحبة بيننا .. وان شاء الله التجمع القادم يكون احلى واحلى ... واللي ماحضر التجمع ... اقولة .. هارد لك ..

.

**ZO6** · 28-10-2007, 07:01 PM

مشكووووووووووووووووووووور محمد على المجهود اللي بذلته واتوقع انه واضح وضوووووووح قمر الاربعاء الماضي تسلم على هيك تقرير وبصرااااااااااااااااااااااحه الصور في قمه الروعه والوضوووووح.

تسلم اناملك الذهبيه على هذا الجهد ...........

قرييييبا
v
v
v
v
v
v
v
v
v
v
v
v

**o-k-r** · 28-10-2007, 07:07 PM

يليت اني جيت

بس شسوي ماقدرت بسبب القرايب جو من الكويت
وشي طبيعي لازم ينزلون البحرين

ورحت معاهم

ونشالله اذا سويتوا تجمع انشالله بكون موجود
وسلملم^_^

**the sun** · 28-10-2007, 07:19 PM

تسلم تسلم احلى تقرير شفته بحياتي

الصراحة التجمع كان فلة والتقرير فلة اكثر

والله تصلح تكون صحفي يا محمد.............يستخف دمه الولد

و ان شاء الله انشوفكم في تجمعات ثانية ومشكور
سلام عليكم....

**محمد بن عبد العزيز** · 28-10-2007, 08:15 PM

السلام عليكم

احم احم<<ممكن المايك لو سمحت

نبدا .....
:d
اول شي احب ا ن اهني الجميييييييييييع على التجمع الرائع

والاروع حضوووور الشباب

واعتذر من الجميع :o

باني لم اطيل الجلسه معكم وودي اتعرف عليكم كل واحد باسمه

>>but<<
:(
الظروف تخلي الواحد طويل <;)

اللي صار معي ماهو شوي وصارت سواليف علىالخط وانا رايح للشرقيه وانا راجع على الخط

بس ربك ستر وماوصلت لسطحه

ولا صار حادث انقلاب
وان شاء الله مايصيبكم اي مكروه

والا ليت الزمن يرجع واراوي الا الليالي دور ويرجع وقتنا الاول وننعم في بساتنا

الا ياعيااااااال زمان اول احس انه زمان فيه صدق شعور نحب ونخلص النيه وتجمعنا محبتنا

<<خلاص عاااااااااد ترا بتنطرد

واهم شي انا اول شخص حضر التجمع

ورغم الظروووووووف اللي واجهتني

ومافيه اي واحد ينكر اني وصلت في وقت متاخر

والدليل اول سياره سيارتي

وعلشان تدرون

سيارة
العم بي يونيك
بالصفه الاولى بعد سيارتي

ولتدرون ميزة الـ2002 تتفوق على كل السيارات

<<بطل عاد لا تتصفق من( ؟؟؟؟؟؟؟؟ ) خخخخخخ

حبيت افضفض شوي عن هالموتر اللي خان العشره

وبعد هالزمن يخون في لحظه ماكنت اتوقعها

ولعلها وقت اخر

وتجمع الريااااااااااض قريباً باذن الله

نلقاكم على خييييييييييييير

نايس تو ميت اووووووووول

اخوكم / محمد بن عبدالعزيز

**The Godfather** · 28-10-2007, 08:19 PM

ياااااااااااااااا سلاااااااااااام

التجمع شكله كان رااااايق على الاخر

تسلم ايدك يا محمد على التقرير الراااااااااااااااااائع و الصور الاروع

لكن المرة هذي كان ابو عزوز كأنه شارب شي مو مضبوط

^^^^^^^^^^
تظن انه خربها على اساس ان اليوم خميس ؟

و يا بو عزوز لا تشرب شي مو مضبوط .... تعال لي و انا اضبطه لك :d <<< يقصد بيبسي مع ثلج .. لا تروحون بعيد

و اما حكايه راعي التيوتا .... شي يحير !!
انا منكم اقوله تعال بالوسط و احاوطه بالسيارات و ما اوخر السيارات لين اليوم الثاني

و حكاية كوكوكورد شي ثاني ...... اخر 25 متر يا ظالم... انا منك اكملها و ادخل البحر :d
ما اذكر مين من الاعضاء سواها من قبل .... اظن جوفينتوس !!
خخخخخخ

لكم مني تحيه
و مشكور يا بي يونيك على التقرير الرائع و مشكور يا الوافي على طرح فكرة التجمع

**يامطنش** · 28-10-2007, 08:32 PM

صراحه تخنقني العبره كل ما اتذكر الشباب الموجدين والذكرى الحلوه واقول ياليت

الزمن يرجع او

يوقف كان خليت الحياه كلها تجمعات عشان اتعرف بي الشباب الي حضرو ونورونا

اشكر الشويش فريد

والوافي

على اجتهادهم لي انجاح التجمع وكل من ساهم في الحضور

الله يعيدها من ايام ويجمعنا معاكم في جنات النعيم

**mhaster** · 28-10-2007, 08:35 PM

اخيرا ما بغى يطلع التقرير <<<اقول ما تعرف تشكر بدون تخنفر

والله مشكور على الريبورت <<<يا عمري انا يا ريبورت

وتراي زعلان عليك
لانك يوم خللصت الموضوع ما فكيت الأغلاق على طول
فا كان ودي اكون اول واحد يرد
تدري اني على الكمبيوتر من الساعه 3 اول ما حطيت الجزء الاول
وكل شوي اسوي ريفرش عشان اول ما تفتح الاغلاق ارد
لاكن عاد جت الساعه 5 ورحت اجيب سيارتي العزيزه من الوكاله
ولو انها خالصه الأربعاءاللي راح كان جيتكم
بس الجايات اكثر انشالله
على فكره :كان ودي احط حره الوكاله في ابو جيب تويتا وافقع وجهه

هو ترا شكله كان يبيكم تقولون له تعال نصور سيارتك
بس يوم طردتوه عند وقعد

انا لو اني محللكم كان خلليت السيارات القريبه منه يروحون الجهه الثانيه
عشان لو قرب
تقولون له : تبي نصورك يا بابا ؟؟
وافلقني لو ما استحى وراح

ومدري شكرتك فوق او لا بس مشكور على الموضوع

**تويتي** · 28-10-2007, 08:35 PM

يعطيك الف عافيه اخوي بي يونيك على التقرير الرائع
والف شكر لمن ساهم في انجاح التجمع الرائع الذي لم احضره ولكن الصورة ابلغ

وان شاء الله نشووووف الجميع في تجمع الرياض

**Accord 4 EvEr** · 28-10-2007, 08:36 PM

**أبو سليمان** · 28-10-2007, 08:37 PM

ماشاء الله :d

من ذا اللي يصور

ماصور إلا سيارتين بس

المفروض ياخذ مسافه كبيره ويقعد بالنص ويصور كل السيارات بلقطه واحده

أما الموكب الصراحه شيء خيالي

بس المصور الله يهديه :d

المفروض سالفه راعي التويوتا ما تصير :(

كلموه بأدب إلين يستحي على وجهه ويروح

وإذا كان بجيح بـ زيادة أنتم انقلوا السيارات للجهه الثاني

إذا قرب هنا احرجوه مب تتهاوشون معه :(

**The Stig** · 28-10-2007, 09:08 PM

بصراحه كل كلمة اقولها ماتحصي اللي صار ...

تحيه جبارة الى نائب ادارة النادي :d

بصراحه التقرير اكثر من رائع فعلا ,, بس حرقت قلبي اليوم . .
تكتب جزء وتروح تفرفر مع الشباب ;) وبعدين ترجع وتكمل جزء ثاني
بس والله انك مبدع !!!

اما ياشباب عشان راعي الاف جي ,, هذا توه في يعنوان شبابه :d
خلوه فرحان حبتين قبل لاتقلب عليه الحياه ,, ويشتري هوندا ويسجل بالمنتدى ’’

تحياتي ,, والله ابدعتو ,,
مافي تجمع مع عيد الاضحى :d

**ـبطرانـ2005ــ** · 28-10-2007, 09:58 PM

B Unique <<<<<<<<<ونعم والله

الصراحه انا اقر الموضوع اتخيل اني معك

اشكرك على تفاضيلك الحلوووه
ودمتم

**B Unique** · 28-10-2007, 10:01 PM

accord2002 ، ابو سليمان
اشكركم على التنبيه

:o

**مصرقع الشرقية** · 28-10-2007, 10:51 PM

واللة تشرفت بمعرفة الاعضاء والمشرفين والف شكر لكم واعذروني على اني تحركت
بدري بس خويي كان مستعجل ونفس الوقت حسيت السيفك جاية غلط بين الاكوردات

**Black Accord 2008** · 28-10-2007, 11:14 PM

B unique................... محمد البيشي

الله الله عليك .. يامبدع ..

أنا فعلاً كنت أنتظر التقرير عشان اعرف وش صار بالتجمع ..
بس مثل هيك تنظيم وتصوير رغم ان الكاميرا مش ولا بد ..
بس
رووووووووووووووووووعه ..

من جد أبدعت .. الله يعطيكم العافية جميعا .. بدون استثناء

المنظم (( الوافي)) والمصور ومعد التقرير ((B unique )) وجميع الحاضرين

أهنيكم بصراحه .. ياكذا التجمعات يابلاااااااش ..

يلا انشاء الله نغطي عليكم هنا بالرياض .. أنا ومعي حبيبة قلبي 2008
يااااااااااااااااااارب

تقبلوا تحياتي ..

**الاخطبوط** · 28-10-2007, 11:20 PM

ياسلام سلم

أخيرا نزل التقرير كنت متوقع ينزل بعد اسبوع

>>> ماينعطون وجه :d

ماشاء الله ماشاء الله عدد الحضور حلو جدا جدا

وان شاء الله بيجي اليوم اللي 100 هوندا متجمعه مع بعض

والاكشن اللي صار هذي ميزه أصلا حلاوة التجمعات انه يصير فيها أكشن

وزين وقفت على كذا ولازادت عن الحد

أسجل شكري لكم واعجابي بالتنظيم الرائع والتقرير المميز

لكن حبذا لو فيه صور زيادة >>> ترانا ناس نحب الصور

وماشاء الله صراحة أكورد سلمان وسيفيك مساري مسكتات من جد

**الـــظـــل** · 28-10-2007, 11:23 PM

أفااااااااااااااااااااااا ...... إسمي مش موجود .......... شكلكم ما عرفتوني !!!!!!!!! أنا إللي و وجهي منفخ من النووووووووم خخخخخخخخ <<< === والله فضيحه

**أبان الطباع** · 28-10-2007, 11:33 PM

ماشاء الله تبارك الله
أسفت جداً لعدم حضوري، لكن جاء التجمع بوقت غير مناسب أبداً ، بإذن الله أحضر التجمعات القادمة وأغطيها من ناحية التصوير.
جزاكم الله خيراً التجمع رائع والتقرير ممتع، خاصة صاحب التويوتا الذي جعل اسم سيارته يرفرف عالياً بشرف!، وددت لو كنت معكم أثناء هذه الأحداث، كنت صورت معكم :p

ماشاء الله تبارك الله جميع السيارات تقف شامخة، لكن سيارة سليمان الله يحفظها له من كل شر كانت نجمة التجمع

شرفنا الزوار بحضور التجمع وشكراً للأعضاء لاهتمامهم بالحضور، أتمنى أن يكون التجمع القادم أكبر وأفضل.