السلام عليكم
ندخل في الموضوع مباشرةً
قبل 7 أشهر تقريباً كان واحد من الشباب يبغى يشتري سياره
تم تحديد الفئة المطلوبه وعمل المقارنات بين السيارات من نفس الفئة
كان المطلوب سياره يابانيه متوسطة الحجم
تم ترشيح كلاً من
- تويوتا كامري
- نيسان ألتيما
- سوبارو ليجاسي
- هوندا أكورد
بدانا البحث والتقصي وتم استبعاد الاتي
- تويوتا كامري (لضعف المكينه وانعدام الرساوة)
- سوبارو ليجاسي (لغلاء اسعارها ولخبطة الوكيل)
ذهبنا شركات التأجير لتجربة السيارتين المتبقيتين
بدأنا بالنيسان التيما (اقل نوع)
- قمة التكنولوجيا
- رساوه جيده جدا
- قوة وسرعه عجيبه
- سعر طيب
بعد ذلك انتقلنا للهوندا اكورد
- تقليديه (مافيها تكنولوجيا مقارنة بالاتيما)
- رساوه طيبه
- قوه عاديه
- سعر مرتفع (مقارنة بالالتيما)
خلصت المقارنة ونسينا الموضوع
بعد فترة رحت للنيسان ابغى اخد الالتيما (4 سلندر) اقل نوع
بس كنت ابغى مثبت سرعة و (ABS) بس
طلع سعرها 74 الف ريال
جهزت الفلوس ورحت
لقيت الفرق بينها وبين الفل 10 الاف ريال
طلبت الفل واخترت اللون وتم طلب السياره
تاني يوم السياره موجوده عندهم وشفتها
جيت ادفع الفلوس عشان يعطوني المعامله
ابغى اطلع اللوحات بنفسي من المرور عشان اختار الاحرف والارقام
طلع عندهم مشكله انهم ياخدوا عموله عالكريدت كارد
بطلت وقالولي اجيب شيك مصدق من البنك
رحت جبت شيك مصدق وماقبلوه بحجة نقص التواقيع
رحت سحبت الفلوس كاش وجيتهم الخميس ودفعتها واخدت المعاملة
هذا االكلام كله اخد 3 اسابيع كل اسبوع انزلهم (عملي خارج جده)
طبعا كل يوم بأستخير مرتين
المهم
بعد ما استلمت المعامله اتصل عليا واحد من الشباب يسلم
وقلي انه خويي اللي كان بيطلع سياره وعملنا التجارب انا وهوا عالسيارات طلع هوندا اكورد كوبيه V6
انا اتفاجأت من الموضوع
احنا عاملين الدراسه سوى واتفقنا عالنيسان التيما
وفي نفس اليوم قابلت واحد تاني معاه نيسان التيما 2006
ونصحني اني ابتعد عنها لأنه تعبان معاها (غير راس مكينه 6 مرات)
وفجأه اتصل عليا واحد تاني من الشباب
هادا الواد مو مقتنع اني اطلع التيما
قلي انا موجود في عبدالله هاشم تعال هناك
عديت عليه ودخلت وشفت الكوبيه وأسرتني بسحرها
مع العلم اني ركبتها الف مره قبل كدا
بس سبحان الله انشرح صدري بشكل غريب عجيب لما شفتها في المعرض
مباشرةً تم تغيير الوجهه من نيسان التيما 4 سلندر فل
الى هوندا اكورد كوبيه 4 سلندر
وتم الاتفاق على كل التفاصيل في هوندا
طبعا انا ماكان عاجبني شكل الكوبيه بدون جناح
قلتلهم لو بركب الجناح كم يكلف
قالو 1200 ريال
قلت والجنوط
قال 9000 ريال
يعني 10200 ريال على جنوط وجناح بس
والفرق بين ال 4 سلندر وال 6 سلندر 15000 ريال بس
رحت على طوووول حولت عال V6
وسافرت الى مقر عملي بعد ان طلبت استعادة المبلغ من نيسان
اول مانزل المبلغ في حسابي حولته على حساب عبدالله هاشم
كان يومها الاثنين واخترت اللوحات رقم حلو و الاحرف (ا ك و) اختصار اكورد
نزلت الاربعاء بتاريخ 1 / ابريل / 2009 واستلمت السياره الساعه 8 ونص مساءً
والحمدلله على كل حال
قد ايش كنت مستعجل عالنيسان التيما وتعبت معاهم 4 اسابيع
وفجأة طلعت الاكورد في اقل من يومين
والحمدلله السياره زي العسل معايه
ماشاء الله تبارك الله فجأه سرت من عشاق الهوندا
واكتشفت المنتدى الخطير دا في نفس الوقت
ولو تلاحظو تاريخ تسجيلي في المنتدى نفس الفترة اللي اشتريت فيها السياره
في الختام اشكر كل القائمين على هذا المنتدى الرائع
واخص بالشكر اخي (سعودي ستايل) لأنه الهمني اني اكتب قصة حياتي الين اخدت الاكورد واتبعت نفس اسلوبه في عرض الموضوع مع الاحتفاظ بطابعي الخاص :o
شكراً لكم جميعاً
رد مع اقتباس
مواقع النشر (المفضلة)