السلام عليكم ورحمة الله وبركاته ... يسولفون عن شايب نوى يشتري له وايت علشان يسقي الحلال , وهذا الشايب متقاعد وشاري له رعية غنم
وفوقها 50 ناقة ماشاءالله , وأخذ يجمع له دراهم إلين ماصار عنده حول ال 85 ألف ريال ,
فقام وتوكل على الله وراح يدور له وايت ,
صدفه وهو يمشي إلا ذيك الناس متجمعة في أرض كبيرة وحولهم وايت واقف ,
عجب الشايب وهو ماشاءالله يبرق من بعيد ووقفته شيء عجيب , قال : بس لقيناه ,
خلني أروح أوصلهم وأشوف كم واصل سومه وإذا هم حادينه أشوف كم هو عليه ,
وصل عندهم الشايب ووقف يسمعهم يحرجون , وأستنانس بالحيل لأنه مهو بغالي ,
ولا ذاك الرجال ماسك مكرفون ويحرج : 50 ,, 52 ,, 55 ,, ومن قال زود ,
قال الشايب : بس شكلهم يحرجون على الوايت ولا هو بغالي , إن شاءالله يكون من نصيبي ,
وخش معهم بالحراج , 56 , ويزودون , ويزود , ويزودون , ويزود , المـــــهم
وصلوه 75 , وقام خربها وقالهم : 80 ,
هو قالهم : 80 يوم طخوا كلهم وسكتوا , ! , وهجدوا , !! , وألتفتوا عليه , !!!
يناظرونه ويناظرون بعضهم , يوم تغامزوا ونقزله واحد منهم , وسحبه على جنب ,
وقاله : شف يارجال أنت باين عليك أبن حلال وطيب بالحيل , وش رايك لو نعطيك شيك ب مليون ريال
ذا الحين ذا الحزه , بس مانشوف وجهك واقف معانا بالحراج ,
أنصدم خوينا الشايب وأفتر راسه وقال : هااااااا , وش السالفة ؟ بمليون ريال , وليه ؟؟؟
قال له الرجال (خويهم) : بس خذ هالشيك وتوكل على الله والله يستر عليك ولا لك بالطبخة ,
وش أسمك ؟ وعطاه أسمه وكتب له الشيك بمليون ريال وصرف الرجال وهو مايدري وش السالفة ,
طيييييييب وش السالفة ؟؟؟
أثر ذا الجماعة يحرجون على مخطط وواقفين بالصدفة جنب الوايت اللي جايبينه يرشون به الأرض علشان يحرجون
والحراج من اليوم ب 56 مليون و 75 مليون , وأبو الشباب (الشايب) خش عليهم عرض ولا يدري وش العلم ,
وهم بعد أخترشوا شوي يحسبونه هامور وبيلطش عليهم المخطط , قاموا صرفوه ب مليون ريال ,
وهو طاير من الفرحة (مليون) ويقول بخاطره :
عجزت وأنا أجمع 85 ألف وفجأة يجيني ذا الرزق من الله ,
فسبحان الله مقسم الأرزاق على عباده
منقـــــــول
رد مع اقتباس
المشاركة الأصلية كتبت بواسطة اتحادي
مواقع النشر (المفضلة)