السلام عليكم ورحمة الله وبركاته
الآب!!
اغلى انسان في الدنيا بعد الأم
ومايعرف قدره الا من فقده
دقات قلبي تزيد بحرة فيها ××× والدمع من مهجتي بالحزن ذرافي
من لوعة يا عسى ربي يجليها ××× حمى غشتني بغم وتنفض أطرافي
ليت الليالي تعود بحلو ما ضيها ××× هيهاتِ ترجع بما روَّح وما طافي
كل(ن) يعزي وأنا روحي أعزيها ××× رحيل أبوي اللي بالأفضال معطافي
آهـ من الوقت والدنيا أثنِّيها ××× دنيا تفرق شمل بالحيل تنعافي
بسمتك يا والدي ما ني بناسيها ××× تضحك إذا شفتني بالخير متعافي
ليت العمر ساعة تنباع واشريها ××× باغلى ثمن يايبه للعمر تنضافي
مسجدك مشتاق للآية وتاليها ××× ومنبرك من عقب ما فارقت له طافي
غرشة دهن عودك بدرجك أغطِّيها ××× أشم ريحه وكنك مقبل(ن) لافي
نظارتك شلتها حزني يبكِّيها ××× حتى المساويك ناحت بين الأرفافي
وعصاك مسنودة(ن) جيت أبحاكيها ××× تقول يكفيني ما فيني ترى كافي
وبستانك اللي به النخلات تسقيها ××× يبست سواقيه تمره دون خرافي
يبه .. يبه .. يا يبه لمن بأطرِّيها ××× هني من له أبو حي(ن) وينشافي
فنجال قهوة معاك أوقات نغليها ××× ويضمني بالشتاء في مشلح دافي
همزت رجليك أنا أفدى مواطيها ××× أرجي لبرِّك عسى ما تشكي خلافي
الأرض ضاقت علي باوسع فيافيها ××× ماذقت نوم هني والأنس متجافي
فضايلك يا يبه عجزان أوَفِّيها ××× لو وصلت بالشعر بيت الألف من قافي
يا ربي تجعله للفردوس ناصيها ××× ومن ثمار الجنان قطَّافي
اقدم اليكم انشوده رائعهـ
المنشد:سعد الطلحه
اللهم اغفر لوالدي وارزقه الفردوس الاعلى -وعوضه في شبابه-
وغفر الله لموتى المسلمين
.. أحبك أبي ليتك تعود ..
مواقع النشر (المفضلة)