الموضوع: افضل طريقة للحصول على سيارة بالتفصيل الممل

المشاركة الأصلية كتبت بواسطة أبو درب

أخي دحوم,,

جميل موضوعك

لكن أنا عن نفسي لاأويد التأجير المنتهي بالتمليك ,,

1- إختلاف المفتين على تحليله لانه عقدين في عقد واحد

2- كثرت القصص اللي سمعناها والمشاكل

3- خرابيطه كثيره ومشاكله كثيره

4-وش فايده السياره إذا ماكانت باسمك

5-وجهه نظر


((اختلاف الأراء .. لا يفسد للود قضية))

تحياتي,,

وأزيد سبب مهم جدا ، الكوريلا فيها فئة قيمتها نقد 50 الف ريال ، لما تسأل عن قيمتها بالتأجير تطلع عليك بحدود 78 الف ريال ، على 3 سنوات ونص ، يعني الزيادة ضربت فوق الـ 50% من قيمة السيارة .
ولو أخذتها تقسيط تطلع عليك بـ 64 الف ريال .
بعدين شغلة التأمين خارجه من تحت فلوسك ، لان التأمين الشامل عند التعاونية للتأمين ما يزيد بالسنة عن 1200 ريال ولو قلنا التأجير على 5 سنوات يا رجال مو لازم 3 ونص 1200 × 5 = 6000 ريال .
شفت الغبنة كيف .
أعطيك قصة
أخوي شاري فورد مونديو فل اوبشن بنظام التقسيط اللي تكون السيارة مرهونة باسم الشركة حتى يخلص الاقساط ، يعني تأجير بدون دفعة أخيرة .
هذا هو ورطان فيها لانه دفع دفعة أولى حوالي 14 الف ريال ، ومدة التقسيط اربع سنوات ، راح منها سنة ، السيارة ما جازت له لكثرة خراباتها الاليكترونية وتعقد تصليحها الا بالشركة اللي يوم شفت اسعارها قلت والله وكالة الهوندا رحمة ، غير قطع الغيار الاستهلاكية الفاحشة الغلاء .
هل يرضى واحد ياخذ منك سيارة مستعملة ويكمل أقساطها اللي ممكن تصير على ظهر المشتري الاول قرابة 50 الف ، يا اخي هذي قيمة سيارة جديدة بالتقسيط ، بعدين الدفعة رايحة رايحة على اخوي ، لان الشركة تقول لنا بواحد يكمل الاقساط انت او غيرك ما يفرق لكن الدفعة الاولى بكيفكم تاخذونها او تاخذون نصها من المستعمل الجديد للسيارة احنا مالنا علاقة .
وهذا هو صابر عليها ، رغم اذلال الشركة اللي كل شهر مرسلين له رسالة على جواله سدد وإلا سيتم سحب السيارة ، هذا وهو مسدد اجل لو تأخر شهر ، طارت الفلوس اللي دفعها .
الله يغني الجميع عن الحاجة للشركات ، والله انها جشع بجشع ، وتشوف مالك يسرق وغصب عنك توافق لانك تحتاج سيارة .
يعطيك العافية