محجوبة ... قصة وانتهت .. The Autobiography

**محجوب** · 28-07-2009, 05:42 PM

بسم الله الرحمن الرحيم
والصلاة والسلام على افضل الانبياء والمرسلين .. سيدنا محمد عليه وعلى اله وصحبه افضل الصلاة واتم التسليم ..

اما بعد ..

صدقوني ما ادري من وين أبدأ ... والى وين بانتهي .. بس راح اكتب اللي يجي على بالي وبدون تفكير .. وصدقوني راح احاول اختصر الكلام عليكم ..

حكايتي بدأت قبل 4 سنوات تقريبا .. لما قرر الوالد حفظه الله اني صرت واخيرا مستعد اني استلم سيارة وتكون في عهدتي .. كان عمري 18 سنة وكنت في ثالث ثانوي .. اشترط علي الوالد اني اخذ سيارة وكالة والميزانية ما تتعدى 65,000 ريال ... درت في الوكالات ورسيت على بيجو 307 فل كامل وباب واحد ولون اسود ومواصفاتها عد واغلط .. وكان الوعد اني يوم السبت راح ادفع الكاش للوكالة واخذ السيارة .. هالكلام يوم الربوع ... اللي صار اني يوم الخميس شفت اكورد 2004 للبيع لونها اخضر زيتي ونضيفة بحالة الوكالة وماشية 24,000 مستخدمة لمدة سنة وحدة ... شفتها الخميس .. والسبت بدل ما اروح لوكالة بيجو .. رحت واخذت الاكورد ولله الحمد مع انها كانت سبيشل وما فيها من مواصفات الا ايرباقين و ABS وفتحة سقف ..

ملاحظة لطيفة : صورة العداد هذي مو لسيارتي بس تمثل موديل السيارة :

وعندها كانت البداية .. واخيرا وقفت سيارتي على باب البيت ..

ملاحظة .. راح اسرد معظم القصة مع صور موثقة للاحداث ..

طبعا من اخذتها علطول بدأت بالتعديلات عليها بـ النظارات والزنون <<< ديك الايام كان سعر التجاري 1000 ريال .. والجناح ..... وبعد مدة نزلت السيارة بيايات رياضية صفرا وركبت الجنوط الـ18 والفلتر الرياضي ..

صورة في عز الظهر بجوالي الباندا خخخخخ

صورة مع شروق الشمس وهذي أول صورة بجوالي N73 هع

هذي الصورة ذكرى حلوة مرة .. أول يووووووووم للجنوط الـ18 .. كشخنا ..

وهذا اول فلتر رياضي ركبته .. عاد ديك الايام ما حصلت الا هـ الشي الغبي

وهذا اول تصميم لسيارتي سويته بنفسي

هنا ركبت رام اير تجاري تفصيل .. حزتها كنت في قمة السعادة وهو ما سوى شي الا انه طيح علي العز من التنسيم اللي فيه ومن حرارة البيب التجاري ..

تنزيلة رايقة ومحترمة

المهم عاد .... مشت الايام ومشيييينا ...

وركبت شمعات رياضية مع طقم زنون ابيض صافي :o

هنا صار اللي صار ... بعد اسبوع واحد من تركيب الشمعات الرياضية صار لي حادث شنيع .. محد من المنتدى درى عنه لأني اصلا ديك الايام كنت توي مسجل بالمنتدى ولا اشارك فيه الا قليل جدا ..

الحادث صار كـ التالي .. كنت امشي في حالي .. كابرس حديدي تسعاوي سقط علي فجأة وخففت والى هنا ما صار شي .. ثواني الا الالنترا جاي مليووووون من خلفي وطبفففف ... سنتر فيي انا وطيرني على الكابرس ..

الخسائر كما في الصور .. وجهية كاملة .. جسور داخلية ومرواح ورديترات وقربة ماي مساحات وغيرهم ... صدام خلفي والشكامين ... اعوجاج خفيف جدا في الشاصي ..

لكن على قولتهم ما يهزك ريح .. حاولوا الكثير انهم يقنعوني ابيع سيارتي .. عييت ولا بعتها .. في الحادث قدروا الخطأ 100% على الالنترا الي صدمني .. وعوضوني التأمين بشيك قدره 16,000 ريال صرفته كله في استعادة محجوبتي الى الحياة :o

والحمد لله .. هذي صورة بعد الاصلاح مع سيارة العضو The Sun وركبنا للموتر عدسات جديدة ولا يزعل :d

بعد مدة قصيرة رجعت اشارك بالمنتدى بقوة وصار التجمع الاول للشرقية .. وشاركت فيه ( بدون ما احد يزعل .. افضل واحلى واجمل واروع تجمع حضرته لليوم )

صورة رائعة مدحها الكل .. من تصوير العضو الغالي كوكو كورد :o

ومشت الايام ومشييييييينا

و وصلنا للتجمع الثاني .. تجمع ما عليه غبار

صورتين في نهاية عام 2007 ..

ومشت الايام ومشييييييييينا .

تلميعة خفيفة على القلب من ضمير للمحجوبة .. وتستاهل :o..

ومشييييييييييييينا زيادة حبتين

ووصلنا لتجمع الشرقية الرابع ( ما يحتاج تركبوا فوق خخخ التجمع الثالث ما حضرته ) ..

للي يتسائلون ... اي نعم هذي خشتي :d

صورة غبية على الطاير ولا احد يسأل كيف :d ..

في هذي الصورة ... أخيرا ركبت فلتر ورام اير رياضي اصلي كامل.. والشكر واصل للعضو العزيز B Unique الله يجزاك بالخير ..

ثم رجعنا ومشينا

يتبع ..
.
.
.
.
.
.

**محجوب** · 28-07-2009, 05:47 PM

ووصلنا الى قبل سنة بالضبط ... مهرجان الامير محمد بن فهد الثاني للسيارات المعدلة ... شاركت فيه مع محجوبتي .. وصح ان المنظمين رموني برااا الصالة .. بس الحمدلله كان الوضع حلو وكانت تجربة شيقة .. حصلنا على درع تكريمي لطيف من اللجة

محجوب اللي ع اليمين في هـ الصورة ... اللي ع اليسار هو احد المنظمين .. وفي نفس الوقت هو احد اعضاء المنتدى بس ما ادري مسموح لي أقول اسمه او لأ :d

عدة صور من تصوير صديقي المحترف جواد السادة

منظر حلووو مع لمبات اللكزس والشكر واصل لأخوي محمد بن عبدالعزيز

بعد المهرجان بأسبوع تقريبا .. صار التجمع الخامس للشرقية وحضرت فيه ..

بعد مدة ليست بقصيرة .. وتعرفون الحال عندنا كيف .. عج وخدوش وحوادث غبية وبسيطة .. اتجمعت كلها في الصدام الامامي وقررت اغيره .. ركبت الصدام الاسيوي للأكورد 2003-2005 .. تجاري طبعا وميزته ان كشافاته منه وفيه .. والفتحة السفلية فيه اوسع من صدام شد بلد وتنفع لتركيب لحية بدون قص

بعدها مشينا ومشييييييييينا

ومشيييييييييييييييييييييييييييييييينا

وكمان مشييييييييييييينا

ثم وقفنا .... وهذا اول يوم بعد تركيب اللحية في الصدام الامامي ;)

صورة على الطاير في ربوع الدمام
واشكر الاخ العضو Mr.Accord .. هو اللي طلب لي الشبك من امريكا الله يجزاه بالخير ..

ومشينا <<<< معليش مللتكم من كثر المشي :d بس القصة كذا :p

وصلنا لآخر تجمع من تجمعات الشرقية .. التجمع السادس .. أكبر تجمع في عدد السيارات .. تجمع مو سهل أبدا ..

صورة بعد ما طردتنا الدوريات من التجمع .. مع شوية تعديل بالالوان والاضاءة

من بعد التجمع السادس .. انا بدأت أمل من سوالف التعديل .. مب لأنها تملل لأ ... كله من الدوريات الـ***** ... لا تعامل ولا اخلاق ولا تفهم .. واطيين في التعامل وتحس بالقرف كل ما تشوف احد منهم .. امتلى رصيدي من المخالفات (تهبيط, زنون, تظليل, استكرات,,,, الخ) .. وبما اني طالب جامعي وموب فاضي لهالشغلات قررت اني ارجع السيارة الى حالة جائزة قانونياً ... رفعت السيارة وشلت التظليل والزنون ورجعت جنوط شد بلد .. ... وهالكلام طبعا من بعد ما مشييييييييييييينا :d

صورة في مواقف الجامعة والسيارة مرفوعة ع الآخر

صورة عند البيت

عارفين اش باقوووول :d

قربنا للنهاية .... رحت المرور وقدمت على لوايح طويلة ... واستبلتها بالجديدة ..

اللوحة الجديدة

صورة في ربوع حرم جامعتنا الحلوة ... كيف دخلتها ؟؟ .... هنا الفن :d ..

وبعدها ... اي .. مشينا ... بس تعرفون شنو .... هذي اخر صورة صورتها لطبلون السيارة :(

وهذي اخر تلميعة للسيارة :(

لأن من بعدها خلاص ... اي نعم خلاص .... السيارة انباعت .... معظمها اسباب خاصة .. بس من ضمن الاسباب هو زيادة الاعطال فيها آخر الايام .. واكبر شي هو القير ... ما ودي اشرح اكثر ..

هنا كان الوداع الأخير .. بعت السيارة في معارض الدمام على شخص من مدينة الأحساء .. وجابت مبلغ جيد الحمدلله

.
.
.
.
.
بعد هالسالفة كلها ... أقولها بالفم المليان بكل صدق .. يا ناس حبيتها .. والله عشقتها :( ... بس الظروف تحول الانسان الى خروف شنسوي :d

ومن حبي لها .. صورتها على باب غرفتي :o

وحتى جهازي اللابتوب ... وديته ورشة سيارات وصبغته بلونها :o <<<<< مجنون صح ؟ :d

في الاخير ... كما لكل بداية نهاية ولكل قوة ضعفاً ولكل حياة موتاً... هنا انتهت حياتي مع محجوبة الحبوبة ..

لكن ان شاء الله هذي مو نهاية رحلتي معاكم في هـ المنتدى الرائع ..

حاليا استخدم سيارة الوالد كم شهر .. وان شاء الله بعدها اخذ السيارة اللي في بالي ... تلميح: محتار بين سيارتين وحدة منهم هي اكورد كوبيه 6 سلندر ;) ..

اتمنى انكم استمتعتم بالتقرير المتواضع ... ومع اني عندي كم مشكلة هالايم ومخي موب فاضي .. بس قلت الشباب يستاهلو ..
تحياتي .. اخوكم محجوب .. وان شاء الله قريبا .. ابنزل فيديو عن مغامراتي وحياتي بالمحجوبة ;) ..

والسلام عليكم ورحمة الله وبركاته ..

**AL_ADMIRAL** · 28-07-2009, 05:48 PM

السلام عليكم ورحمة الله

صدقوني ما ادري من وين أبدأ ...

أبدأ طال عمرك من يوم شريت السياره :d

موضوعك حلو وتشكر عليه (^_^)
وحـ أعلق على بعض الصور
\
/
\

يخلابيسو
على مافهمته أن الصوره في بدايت أمتلاكك لها
فلو شفتها وقتها كنت حأقلك ,,, الله يعطيك خيرها ويكفيك شرها ^_^

الله الله على الصوره هذي
الصراحه منظر الغروب مع النخلتين أبداااع
بس الله يصلحك لو وخرت السياره وقتها :d

حلوه نظراتها كانت

لاحول الله
شكلو أشان ماقلت ماشاء الله في الصوره الي فوقها :d
يالله شفت كيف مرت الأيام وسارت الصدمه ذكرايات (^_^)
وعلى فكره راعي سوناتا كان حيصدمني صدمه أليييمه
<<< يعني ياشباب خذو الحذر من الكوري :d:d

مني داري الكلام في السياره ولا في المصور , ولا في نسق الصوره 16:9
بس كلو على بعضو ضابط

ماشاء الله
وترى غيره وحسد أنهم مادخلو سيارتك :d

تستاااااهل والله
من ردودك الطيبه حسيت أنك تستاهل أكثر من كذا بكثير (^_^)
بس سامحهم عشاني

أمممم
غريبه الـ 0.7 مو لو صفرتها كانت أحلى

أهااا
أشان يمكن تضبط في المستقبل لحركه زي هاذي مثلا :d

بصراحه أهنيك على عقليتك الفذه ^_^
والله من جد ما أمزح مره عجبتني الفكره
\
/
\

ها بديت التصوير والكتابه في دفتر مذكراتك عن قصه الـ MR-V ؟!

**CR@SH** · 28-07-2009, 05:59 PM

ما شاااء الله يا محجوب

و الله ذكريات مو بسيطة ابدا

و المحجوبة و انت ما قصرتوا الصراحة

بالتعديلات و القومات الحفلة الي صارت

الله يرزقك ان شاء الله بالعروسة الجديدة

و تشوفك مشارك بها في تجمع الظهران الرابع

تحياتي يا محجوب

و بالتوفيييييق

**الشمــــالـــي** · 28-07-2009, 06:12 PM

الله يامحجوب

" ومن الحب ماقتل "

عااد تبي الصراحة

والله إني حبيتها

والله يهني اللي شراها

ويعوّضك بأكورد 2010 كوبيه 6 سلندر

تحيــاتي لــك يامبــدع

**Mr.CaR** · 28-07-2009, 06:14 PM

*&&&&&&&&&*
!

مآشآء الله تبآركـ الرحمن

عليك و على محجوبه

واللي إشترآهآ الله يبآركـ له فيهآ ويعطيه من خيرهآ ...

وعقبآل مآنشوفكـ بالـ v6

وبإنتظآر فيديوهآتكـ الرآئعهـ

ألف شكر

**المباشر** · 28-07-2009, 06:18 PM

ماشاء الله على هالتقرير الحلو

كل واحد يحزن على فراق محبوبته بعد مده طويله معها :d اما صور على باب الغرفة فيهاكلام ثاني :d

ان شاء الله نشوفك كاشخ بالمحجوبة الجديدة

**حبيب هنادي** · 28-07-2009, 06:27 PM

صراحهــــــــ أندمجتــــ مع القصهــــ << ته ته ته

ورتفعــ ضغطيــ شوي من النت الخايس << طلعت الصور غصبــــــ

قصهـــ حزينهــ وما راحتــ تحب سيارهــ ثانيهــ بعد هذيـــ حتى لو كانتــ جديدهـــ

ومشكور على الصور وشرحـــ القصهــــ

اما الصورهــ الي تودعــ سيارتكــ في المعرض وكيهـــــــــــــــــــــــــ

تحياااتي

**abu khaled** · 28-07-2009, 06:32 PM

في الاخير ... كما لكل بداية نهاية ولكل قوة ضعفاً ولكل حياة موتاً... هنا انتهت حياتي مع محجوبة الحبوبة

بصيح

تقرير متعوب عليه الصراحة

**@اكورد وبس@** · 28-07-2009, 06:46 PM

ما شاء الله قصه محزنه :(..

عقبال موضوعي عن الياريس إذا بعتها :d..

المشكله ما صورتها الا كذا صوره :p..

يعطيك ألف عافيه على الموضوع الشيق والجميل

..

والله يزوجك أكورد كوبيه v6 ..

تحياتيـ)~

@اكورد وبس@.

**مجنون اكورد 07** · 28-07-2009, 07:37 PM

قصة محزنه ومؤثرة :(
ما شاء الله سيارة ماقصرت معك على كل ما صار لها باقي ماشية معك

ان شاء الله تاخذ السيارة اللي ببالك والله يوفقك يارب في كل خطوة

يعطيك العافيه على التقرير الحلو بس بصراحه انت

تصلح صحفي يا ولد اخس اخس :d

**المـــــلكـ اكـــــورد** · 28-07-2009, 07:43 PM

ماشاء الله تبارك الله تقرير روعه

اخاف بس يوصل خبر لسيارتي عن اللي سويته لسيارتك وتسوي لي قلق :d<<توه قايم من النوم لاحد يشره
^ ^
من جد ماشاء الله تبارك الله تعامل سيارتك كانها زوجتك ...

الله يبارك للي شراها ويعطيه خيرها ويكفيه شرها
والله يرزقك السياره (الزوجه) الجديده (محجوبه 2)<< والزوجه الحقيقة برضو :d

تحياتي لك

**Last Dream** · 28-07-2009, 07:45 PM

على قولتك يامحجوب عاشر من تعاشر لابد من الفراق ,,, بس مدري ليش احسك كنت

وانت تكتب التقرير

يلا عقبال محجوبه الجديده ;)

**Honda*2008** · 28-07-2009, 07:48 PM

ما شاء الله عليكـ
صبرت عليها وحبيتها
بس انت قلتها
لكل بدايه نهايه

بس لا تفارقنا

وداعاً يا محجوبة

**راعي الكامري saad** · 28-07-2009, 08:21 PM

مشالله عليك والله وانا والله اندمجت مع القصه

وعلى ما قلت انت كل قصه لها نهايه :(

بس والله بصراحه عيني عليك بارده عندك افكار ماشالله عليك

ومشكور على الموضوع الشيق صراحه علقتني تراني انتظر الفيديوا والمغامرات الله يصبرني بس

والله انشالله يرزقك بي الكوبيه 2010

تحياتي للجميع سعودي

في الدوام وقرفان هههه

**B Useful** · 28-07-2009, 08:23 PM

ايام حلوة ..

كانت ايام حبكـ ..

كنت في روحي تسري ..

كنت بجنون احبكـ ..

هييك الحياة اخوي محجوب ..
من سرة زمن سائتة ازمان ..
لكل شي بداية ونهاية ..
وكل شي في هالدنيا الفانية فاني ،،

وكأنك تقول .. كل شي يا محجوبتي ينتهي ،، حبنا خآآآلد .. صفحة تشع من البيآآآض ،، الله بها شاهد ..

ولك منى احلى تثبيت ..تنسيق وقصة وتصوير ممتاز ..

**Mr-AlJoKeR** · 28-07-2009, 08:36 PM

... فلم هندي ...

:d

كنت بصيح ...

الحمدلله على كل حال ومبروك مقدما على السياره الجديدة

**اتحادي** · 28-07-2009, 09:18 PM

موضوع جميل و رائع

الله يرزقك بأكورد تحبها اكثر من اللي راحت

**the sun** · 28-07-2009, 09:59 PM

ماشاء الله عليك يامحجوب اسلوب راقي
ويلا هذي الدنيا ....
بس من جد اندمجت ويا الموضوع رغم اني مريت وياك بكل حاجة صارت في الصور ...
وان شاء الله الله يعوضك بالي في بالك....
سلام

**amer09** · 28-07-2009, 10:24 PM

والله تقرير متعوب عليه

وقصة حزينة لكنها حلوة

تقول محتار بين سيارتين قلت وحده باقي وحده <<<<< ملقووووف :p

احلى صورة

الرسمه اللي عليها

الله يعطي اللي اخذها خيرها ويكفيه شرها

والله يرزقك السيارة اللي في بالك

**YuSuF** · 28-07-2009, 10:43 PM

كتبت فأبدعت
وصورت فألصقت
وصدمت فسمكرت
ونظفت ووسخت
وركّبت ونزعت
استقبلت وودعت
واشتريت فبعت فحزنت وحزنا جميعا لحزنك

قصة محزنة اندمجت مع القصة أحلى شي إنها موثقة بالصور
مو ضوع رائع جدا واهتمامك بالمحجوبة كان ممتاز
الله يرزقك محجوبة 2 اللي تحبها أكثر من محجوبة 1
مع إنه مستحيل تنسى حبك الأول

تحياتي

**salamify** · 29-07-2009, 12:12 AM

بصراحة تقرير كافي ووافي ومجهود تشكر عليه أخوي محجوب والله يرزقك بأحسن منها بس أهم شيء تكون هوندا علشان ما تطنش المنتدى :d..

**MaLiK1987** · 29-07-2009, 12:34 AM

:(

**o-k-r** · 29-07-2009, 12:46 AM

ياسلام على الموضوع

والله ايام كانت معا الأكورد

ان شالله تجيك اللي بالك

وكل واحد له قصة معا سيارته طبعا

ومشكور

وعساك على القوة

**lotocoupe** · 29-07-2009, 12:47 AM

كآلـعآ’دهـ يآ’ محـجوب آبدآعآتـك ليس لهآ حدود

وآ’هـنيـك على الموضوع الشـيق جدن جدن جدددددن :d

ويالله يا هي كانت ايام حلوه مع المحجوبه رآ’حت والله يعـوضـك بمحجوبه ثانيه ., بس المثل يقول ., وما الحبُ الا للحبيب الاولي :o.,:d
بس هونها وتهون بكره تتعود على الفرآ’ق وتشوف من يقدرك ويهتم فيك ههههه :p

وربي يوفقك في اختيارك الجاي

تشكراتي لـك مره اخرى على الموضوع الممتع

تحيتي